युद्धकाण्डम्Yuddha Kāṇḍa

atha tasminnimittāni dṛṣṭvā lakṣmaṇapūrvajaḥ ।
sugrīvaṁ sampariṣvajya tadā vacanamabravīt ।
6.41.1 ॥

asammantrya mayā sārddhaṁ tadidaṁ sāhasaṁ kṛtam ।
evaṁ sāhasakarmāṇi na kurvanti janeśvarāḥ ।
6.41.2 ॥

saṁśaye sthāpya māṁ cedaṁ balaṁ ca savibhīṣaṇam ।
kaṣṭaṁ kṛtamidaṁ vīra sāhasaṁ sāhasapriya ।
6.41.3 ॥

idānīṁ mā kṛthā vīra evaṁvidhamacintitam ।
tvayi kiñcit samāpanne kiṁ kāryaṁ sītayā mama ।
6.41.4 ॥

bharatena mahābāho lakṣmaṇena yavīyasā ।
śatrughnena ca śatrughna svaśarīreṇa vā punaḥ ।
6.41.5 ।
punaḥpunaḥ ॥

tvayi cānāgate pūrvamiti me niścitā matiḥ ।
jānataścāpi te vīryaṁ mahendravaruṇopama ।
6.41.6 ॥

hatvā 'haṁ rāvaṇaṁ yuddhe saputrabalavāhanam ।
abhiṣicya ca laṅkāyāṁ vibhīṣaṇamathāpi ca ।
bharate rājyamāveśya tyakṣye dehaṁ mahābala ।
6.41.7 ॥

tamevaṁ vādinaṁ rāmaṁ sugrīvaḥ pratyabhāṣata ।
6.41.8 ॥

tava bhāryāpahartāraṁ dṛṣṭvā rāghava rāvaṇam ।
marṣayāmi kathaṁ vīra jānan pauruṣamātmanaḥ ।
6.41.9 ॥

ityevaṁ vādinaṁ vīramabhinandya sa rāghavaḥ ।
lakṣmaṇaṁ lakṣmisampannamidaṁ vacanamabravīt ।
6.41.10 ॥

parigṛhyodakaṁ śītaṁ vanāni phalavanti ca ।
balaughaṁ saṁvibhajyemaṁ vyūhya tiṣṭhema lakṣmaṇa ।
6.41.11 ॥

lokakṣayakaraṁ bhīmaṁ bhayaṁ paśyāmyupasthitam ।
nibarhaṇaṁ pravīrāṇāmṛkṣavānararakṣasām ।
6.41.12 ॥

vātāśca paruṣā vānti kampate ca vasundharā ।
parvatāgrāṇi vepante patanti dharaṇīruhāḥ ।
6.41.13 ॥

meghāḥ kravyādasaṅkāśāḥ paruṣāḥ paruṣasvanāḥ ।
krūrāḥ krūraṁ pravarṣanti miśraṁ śoṇitabindubhiḥ ।
6.41.14 ॥

raktacandanasaṅkāśā sandhyā paramadāruṇā ।
jvalacca nipatatyetadādityādagnimaṇḍalam ।
6.41.15 ॥

ādityamabhivāśyanti janayanto mahadbhayam ।
dīnā dīnasvarā ghorā apraśastā mṛgadvijāḥ ।
6.41.16 ॥

rajanyāmaprakāśaśca santāpayati candramāḥ ।
kṛṣṇaraktāntaparyanto yathā lokasya saṅkṣaye ।
6.41.17 ॥

hrasvo rūkṣo 'praśastaśca pariveṣaḥ sulohitaḥ ।
6.41.18 ॥

ādityamaṇḍale nīlaṁ lakṣma lakṣmaṇa dṛśyate ।
dṛśyante na yathāvacca nakṣatrāṇyabhivartate ।
yugāntamiva lokasya paśya lakṣmaṇa śaṁsati ।
6.41.19 ॥

kākāḥ śyenāstathā gṛdhrā nīcaiḥ paripatanti ca ।
śivāścāpyaśivā vācaḥ pravadanti mahāsvanāḥ ।
6.41.20 ॥

kṣipramadya durādharṣāṁ laṅkāṁ rāvaṇapālitām ।
abhiyāma javenaiva sarvato haribhirvṛtāḥ ।
6.41.21 ॥

ityevaṁ saṁvadan vīro lakṣmaṇaṁ lakṣmaṇāgrajaḥ ।
tasmādavātaracchīvraṁ parvatāgrānmahābalaḥ ।
6.41.22 ॥

avatīryaṁ ca dharmātmā tasmācchailāt sa rāghavaḥ ।
paraiḥ paramadurdharṣaṁ dadarśa balamātmanaḥ ।
6.41.23 ॥

sannahya tu sasugrīvaḥ kapirājabalaṁ mahat ।
kālajño rāghavaḥ kāle saṁyugāyābhyacodayat ।
6.41.24 ॥

tataḥ kāle mahābāhurbalena mahatāvṛtaḥ ।
prasthitaḥ purato dhanvī laṅkāmabhimukhaḥ purīm ।
6.41.25 ॥

taṁ vibhīṣaṇasugrīvau hanumān jāmbavānnalaḥ ।
ṛkṣarājastathā nīlo lakṣmaṇaścānvayustadā ।
6.41.26 ॥

tataḥ paścāt sumahatī pṛtanarkṣavanaukasām ।
pracchādya mahatīṁ bhūmimanuyāti sma rāghavam ।
6.41.27 ॥

śailaśṛṅgāṇi śataśaḥ pravṛddhāṁśca mahīruhān ।
jagṛhuḥ kuñjaraprakhyā vānarāḥ paravāraṇāḥ ।
6.41.28 ॥

tau tu dīrgheṇa kālena bhrātarau rāmalakṣmaṇau ।
rāvaṇasya purīṁ laṅkāmāsedaturarindamau ।
6.41.29 ॥

patākamālinīṁ ramyāmudyānavanaśobhitām ।
citravaprāṁ suduṣprāpāmuccaiḥ prākāratoraṇām ।
6.41.30 ॥

tāṁ surairapi durdharṣāṁ rāmavākyapracoditāḥ ।
yathāniveśaṁ sampīḍya nyaviśanta vanaukasaḥ ।
6.41.31 ॥

laṅkāyāstūttaradvāraṁ śalaśṛṅgamivonnatam ।
rāmaḥ sahānujo dhanvī jugopa ca rurodha ca ।
6.41.32 ॥

laṅkāmupaniviṣṭaśca rāmo daśarathātmajaḥ ।
lakṣmaṇānucaro vīraḥ purīṁ rāvaṇapālitām ।
uttaradvāramāsādya yatra tiṣṭhati rāvaṇaḥ ।
6.41.33 ॥

nānyo rāmāddhi taddvāraṁ samarthaḥ parirakṣitum ।
rāvaṇādhiṣṭhitaṁ bhīmaṁ varuṇeneva sāgaram ।
6.41.34 ॥

sāyudhai rākṣasairbhīmairabhiguptaṁ samantataḥ ।
laghūnāṁ trāsajananaṁ pātālamiva dānavaiḥ ।
6.41.35 ॥

vinyastāni ca yodhānāṁ bahūni vividhāni ca ।
dadarśāyudhajālāni tatraiva kavacāni ca ।
6.41.36 ॥

pūrvaṁ tu dvāramāsādya nīlo haricamūpatiḥ ।
atiṣṭhat saha maindena dvividena ca vīryavān ।
6.41.37 ॥

aṅgado dakṣiṇadvāraṁ jagrāha sumahābalaḥ ।
ṛṣabheṇa gavākṣeṇa gajena gavayena ca ।
6.41.38 ॥

hanumān paścimadvāraṁ rarakṣa balavān kapiḥ ।
pramāthipraghasābhyāṁ ca vīrairanyaiśca saṅgataḥ ।
6.41.39 ॥

madhyame ca svayaṁ gulme sugrīvaḥ samatiṣṭhata ।
saha sarvaihariśreṣṭhaiḥ suparṇaśvasanopamaiḥ ।
6.41.40 ॥

vānārāṇāṁ tu ṣaṭtriṁśat koṭyaḥ prakhyātayūthapāḥ ।
nipīḍyopaniviṣṭāśca sugrīvo yatra vānaraḥ ।
6.41.41 ॥

śāsanena tu rāmasya lakṣmaṇaḥ savibhīṣaṇaḥ ।
dvāre dvāre harīṇāṁ tu koṭiṁ koṭiṁ nyaveśayat ।
6.41.42 ॥

paścimena tu rāmasya sugrīvaḥ sahajāmbavān ।
adūrānmadhyame gulme tasthau bahubalānugaḥ ।
6.41.43 ॥

te tu vānaraśārdūlāḥ śārdūlā iva daṁṣṭriṇaḥ ।
gṛhītvā drumaśailāgrān hṛṣṭā yuddhāya tasthire ।
6.41.44 ॥

sarve vikṛtalāṅgūlāḥ sarve daṁṣṭrānakhāyudhāḥ ।
sarve vikṛtacitrāṅgāḥ sarve ca vikṛtānanāḥ ।
6.41.45 ॥

daśanāgabalāḥ kecit keciddaśaguṇottarāḥ ।
kecinnāgasahasrasya babhūvustulyavikramāḥ ।
6.41.46 ॥

santi caughabalāḥ kecit kecicchataguṇottarāḥ ।
aprameyabalāścānye tatrāsan hariyūthapāḥ ।
6.41.47 ॥

adbhutaśca vicitraśca teṣāmāsīt samāgamaḥ ।
tatra vānarasainyānāṁ śalabhānāmivodyamaḥ ।
6.41.48 ॥

paripūrṇamivākāśaṁ sañchanneva ca medinī ।
laṅkāmupaniviṣṭaiśca sampatadbhiśca vānaraiḥ ।
6.41.49 ॥

śataṁ śatasahasrāṇāṁ pṛthagṛkṣavanaukasām ।
laṅkādvārāṇyupājagmuranye yoddhuṁ samantataḥ ।
6.41.50 ॥

āvṛtaḥ sa giriḥ sarvaistaiḥ samantāt plavaṅgamaiḥ ।
6.41.51 ॥

ayutānāṁ sahasraṁ ca purīṁ tāmabhyavartata ।
6.41.52 ॥

vānarairbalavadbhiśca babhūva drumapāṇibhiḥ ।
saṁvṛtā sarvato laṅkā duṣpraveśāpi vāyunā ।
6.41.53 ॥

rākṣasā vismayaṁ jagmuḥ sahasā 'bhinipīḍitāḥ ।
vānarairmeghasaṅkāśaiḥ śakratulyaparākramaiḥ ।
6.41.54 ॥

mahān śabdo 'bhavattatra balaughasyābhivartataḥ ।
sāgarasyeva bhinnasya yathā syāt salilasvanaḥ ।
6.41.55 ॥

tena śabdena mahatā saprākārā satoraṇā ।
laṅkā pracalitā sarvā saśailavanakānanā ।
6.41.56 ॥

rāmalakṣmaṇaguptā sā sugrīveṇa ca vāhinī ।
babhūva durdharṣatarā sarvairapi surāsuraiḥ ।
6.41.57 ॥

rāghavaḥ sanniveśyaiva sainyaṁ svaṁ rakṣasāṁ vadhe ।
sammantrya mantribhiḥ sārdhaṁ niścitya ca punaḥpunaḥ ।
ānantaryamabhiprepsuḥ kramayogārthatattvavit ।
6.41.58 ॥

vibhīṣaṇasyānumate rājadharmanusmaran ।
aṅgadaṁ vālitanayaṁ samāhūyedamabravīt ।
6.41.59 ॥

tya ca punaḥpunaḥ ।
gatvā somya daśagrīvaṁ bruhi madvacanāt kape ।
laṅghayitvā purīṁ laṅkāṁ bhayaṁ tyaktvā gatavyathaḥ ।
6.41.60 ॥

bhraṣṭaśrīkagataiśvarya mumūrṣo naṣṭacetana ।
ṛṣīṇāṁ devatānāṁ ca gandharvāpsarasāṁ tathā ।
6.41.61 ॥

nāgānāmatha yakṣāṇāṁ rājñāṁ ca rajanīcara ।
yacca pāpaṁ kṛtaṁ mohādavaliptena rākṣasa ।
6.41.62 ॥

nūnamadya gato darpaḥ svayambhūvaradānajaḥ ।
yasya daṇḍadharaste 'haṁ dārāharaṇakarśitaḥ ।
daṇḍaṁ dhārayamāṇastu laṅkādvāre vyavasthitaḥ ।
6.41.63 ॥

padavīṁ devatānāṁ ca maharṣīṇāṁ ca rākṣasa ।
rājarṣīṇāṁ ca sarveṣāṁ gamiṣyasi mayā hataḥ ।
6.41.64 ॥

balena yena vai sītāṁ māyayā rākṣasādhama ।
māmatikrāmayitvā tvaṁ hṛtavāṁstannidarśaya ।
6.41.65 ॥

arākṣasamimaṁ lokaṁ kartāsmi niśitaiḥ śaraiḥ ।
na ceccharaṇamabhyeṣi māmupādāya maithilīm ।
6.41.66 ॥

dharmātmā rakṣasāṁ śreṣṭhaḥ samprāpto 'yaṁ vibhīṣaṇaḥ ।
laṅkaiśvaryaṁ dhruvaṁ śrīmānayaṁ prāpnotyakaṇṭakam ।
6.41.67 ॥

na hi rājyamadharmeṇa bhoktuṁ kṣaṇamapi tvayā ।
śakyaṁ mūrkhasahāyena pāpenāviditātmanā ।
6.41.68 ॥

yuddhyasva vā dhṛtiṁ kṛtvā śauryamālambya rākṣasa ।
maccharaistvaṁ raṇe śāntastataḥ pūto bhaviṣyasi ।
6.41.69 ॥

yadvā viśasi lokāṁstrīn pakṣibhūto manojavaḥ ।
mama cakṣuṣpathaṁ prāpya na jīvan pratiyāsyasi ।
6.41.70 ॥

bravīmi tvāṁ hitaṁ vākyaṁ kriyatāmaurdhvadaihikam ।
sudṛṣṭā kriyatāṁ laṅkā jīvitaṁ te mayi sthitam ।
6.41.71 ॥

ityuktaḥ sa tu tāreyo rāmeṇākliṣṭakarmaṇā ।
jagāmākāśamāviśya mūrtimāniva havyavāṭ ।
6.41.72 ॥

so 'tipatya muhūrtena śrīmānrāvaṇamandiram ।
dadarśāsīnamavyagraṁ rāvaṇaṁ sacivaiḥ saha ।
6.41.73 ॥

tatastasyāvidūre sa nipatya haripuṅgavaḥ ।
dīptāgnisadṛśastasthāvaṅgadaḥ kanakāṅgadaḥ ।
6.41.74 ॥

tadrāmavacanaṁ sarvamanyūnādhikamuttamam ।
sāmātyaṁ śrāvayāmāsa nivedyātmānamātmanā ।
6.41.75 ॥

dūto 'haṁ kosalendrasya rāmasyākliṣṭakarmaṇaḥ ।
vāliputro 'ṅgado nāma yadi te śrotramāgataḥ ।
6.41.76 ॥

āha tvāṁ rāghavo rāmaḥ kausalyānandavardhanaḥ ।
niṣpatya pratiyuddhyasva nṛśaṁsa puruṣo bhava ।
6.41.77 ॥

hantāsmi tvāṁ sahāmātyaṁ saputrajñātibāndhavam ।
nirudvignāstrayo lokā bhaviṣyanti hate tvayi ।
6.41.78 ॥

devadānavayakṣāṇāṁ gandharvoragarakṣasām ।
śatrumadyoddhariṣyāmi tvāmṛṣīṇāṁ ca kaṇṭakam ।
6.41.79 ॥

vibhīṣaṇasya caiśvaryaṁ bhaviṣyati hate tvayi ।
na cet satkṛtya vaidehīṁ praṇipatya pradāsyasi ।
6.41.80 ॥

ityevaṁ paruṣaṁ vākyaṁ bruvāṇe haripuṅgave ।
amarṣavaśamāpanno niśācaragaṇeśvaraḥ ।
6.41.81 ॥

tataḥ sa roṣatāmrākṣaḥ śaśāsa sacivāṁstadā ।
gṛhyatāmeṣa durmedhā vadhyatāmiti cāsakṛt ।
6.41.82 ॥

rāvaṇasya vacaḥ śrutvā dīptāgnisamatejasaḥ ।
jagṛhustaṁ tato ghorāścatvāro rajanīcarāḥ ।
6.41.83 ॥

grāhayāmāsa tāreyaḥ svayamātmānamātmavān ।
balaṁ darśayituṁ vīro yātudhānagaṇe tadā ।
6.41.84 ॥

sa tān bāhudvaye saktānādāya patagāniva ।
prāsādaṁ śailasaṅkāsamutpapātāṅgadastadā ।
6.41.85 ॥

te 'ntarikṣādvinirdhūtāstasya vegena rākṣasāḥ ।
bhūmau nipatitāḥ sarve rākṣasendrasya paśyataḥ ।
6.41.86 ॥

tataḥ prāsādaśikharaṁ śailaśṛṅgamivonnatam ।
dadarśa rākṣasendrasya vāliputraḥ pratāpavān ।
6.41.87 ॥

tatpaphāla padākrāntaṁ daśagrīvasya paśyataḥ ।
purā himavataḥ śṛṅgaṁ vajriṇeva vidāritam ।
6.41.88 ॥

bhaṅktvā prāsādaśikharaṁ nāma viśrāvya cātmanaḥ ।
vinadya sumahānādamutpapāta vihāyasam ।
6.41.89 ॥

vyathayan rākṣasān sarvān harṣayaṁścāpi vānarān ।
sa vānarāṇāṁ madhye tu rāmapārśvamupāgataḥ ।
6.41.90 ॥

rāvaṇastu paraṁ cakre krodhaṁ prāsādadharṣaṇāt ।
vināśaṁ cātmanaḥ paśyanniśvāsaparamo 'bhavat ।
6.41.91 ॥

rāmastu bahubhirhṛṣṭairninadadbhiḥ plavaṅgamaiḥ ।
vṛto ripuvadhākāṅkṣī yuddhāyaivābhyavartata ।
6.41.92 ॥

suṣeṇastu mahāvīryo girikūṭopamo hariḥ ।
bahubhiḥ saṁvṛtastatra vānaraiḥ kāmarūpibhiḥ ।
6.41.93 ॥

caturdvārāṇi sarvāṇi sugrīvavacanāt kapiḥ ।
paryakrāmata durdharṣo nakṣatrāṇīva candramāḥ ।
6.41.94 ॥

teṣāmakṣauhiṇiśataṁ samavekṣya vanaukasām ।
laṅkāmupaniviṣṭānāṁ sāgaraṁ cābhivartatām ।
6.41.95 ॥

rākṣasā vismayaṁ jagmustrāsaṁ jagmustathā 'pare ।
apare samaroddharṣāddharṣameva prapedire ।
6.41.96 ॥

kṛtsnaṁ hi kapibhirvyāptaṁ prākāraparikhāntaram ।
dadṛśū rākṣasā dīnāḥ prākāraṁ vānarīkṛtam ।
6.41.97 ॥

hāhākāraṁ prakurvanti rākṣasā bhayamohitāḥ ।
6.41.98 ॥

tasmin mahābhīṣaṇake pravṛtte kolāhale rākṣasarājadhānyām ।
pragṛhya rakṣāṁsi mahāyudhāni yugāntavātā iva saṁviceruḥ ।
6.41.99 ॥