युद्धकाण्डम्Yuddha Kāṇḍa

pūrṇe caturdaśe varṣe pañcamyāṁ lakṣmaṇāgrajaḥ ।
bharadvājaśramaṁ prāpya vavande niyato munim ।
6.127.1 ॥

so 'pṛcchadabhivādyainaṁ bharadvājaṁ tapodhanam ।
śṛṇoṣi kaccidbhagavan subhikṣānāmayaṁ pure ।
kaccicca yukto bharato jīvantyapi ca mātaraḥ ।
6.127.2 ॥

evamuktastu rāmeṇa bharadvājo mahāmuniḥ ।
pratyuvāca raghuśreṣṭhaṁ smitapūrvaṁ prahṛṣṭavat ।
6.127.3 ॥

paṅkadigdhastu bharato jaṭilastvāṁ pratīkṣate ।
pāduke te puraskṛtya sarvaṁ ca kuśalaṁ gṛhe ।
6.127.4 ॥

tvāṁ purā cīravasanaṁ praviśantaṁ mahāvanam ।
strītṛtīyaṁ cyutaṁ rājyāddharmakāmaṁ ca kevalam ।
padātiṁ tyaktasarvasvaṁ piturvacanakāriṇam ।
6.127.5 ॥

sarvabhogaiḥ parityaktaṁ svargacyutamivāmaram ।
dṛṣṭvā tu karuṇā pūrvaṁ mamāsīt samitiñjaya ।
6.127.6 ॥

kaikeyīvacane yuktaṁ vanyamūlaphalāśinam ।
6.127.7 ॥

sāmprataṁ susamṛddhārthaṁ samitragaṇabāndhavam ।
samīkṣya vijitāriṁ tvāṁ mama prītiranuttamā ।
6.127.8 ॥

sarvaṁ ca sukhaduḥkhaṁ te viditaṁ mama rāghava ।
6.127.9 ॥

yattvayā vipulaṁ prāptaṁ janasthānavadhādikam ।
brāhmaṇārthe niyuktasya rakṣituḥ sarvatāpasān ।
6.127.10 ॥

rāvaṇena hṛtā bhāryā babhūveyamaninditā ।
mārīcadarśanaṁ caiva sītonmathanameva ca ।
6.127.11 ॥

kabandhadarśanaṁ caiva pampābhigamanaṁ tathā ।
sugrīveṇa ca te sakhyaṁ yacca vālī hatastvayā ।
6.127.12 ॥

mārgaṇaṁ caiva vaidehyāḥ karma vātātmajasya ca ।
viditāyāṁ ca vaidehyāṁ nalaseturyathā kṛtaḥ ।
6.127.13 ॥

yathā vā dīpitā laṅkā prahṛṣṭairhariyūthapaiḥ ।
saputrabāndhavāmātyaḥ sabalaḥ sahavāhanaḥ ।
6.127.14 ॥

yathā vinihataḥ saṅkhye rāvaṇo devakamṭakaḥ ।
samāgamaśca tridaśairyathā dattaśca te varaḥ ।
sarvaṁ mamaitadviditaṁ tapasā dharmavatsala ।
6.127.15 ॥

ahamapyatra te dadmi varaṁ śastrabhṛtāṁ vara ।
ardhyamadya gṛhāṇedamayodhyāṁ śvo gamiṣyasi ।
6.127.16 ॥

tasya tacchirasā vākyaṁ pratigṛhya nṛpātmajaḥ ।
bāḍhamityeva saṁhṛṣṭo dhīmān varamayācata ।
akāle phalino vṛkṣāḥ sarve cāpi madhusravāḥ ।
6.127.17 ॥

phalānyamṛtakalpāni bahūni vividhāni ca ।
bhavantu mārge bhagavannayodhyāṁ prati gacchataḥ ।
6.127.18 ॥

tatheti ca pratijñāte vacanāt samanantaram ।
abhavan pādapāstatra svargapādapasannibhāḥ ।
6.127.19 ॥

niṣphalāḥ phalinaścāsan vipuṣpāḥ puṣpaśālinaḥ ।
śuṣkāḥ samagrapatrāste nagāścaiva madhusravāḥ ।
6.127.20 ॥

sarvato yojanāstisro gacchatāmabhavaṁstadā ।
6.127.21 ॥

tataḥ prahṛṣṭāḥ plavagarṣabhāste bahūni divyāni phalāni caiva ।
kāmādupāśnanti sahasraśaste mudā 'nvitāḥ svargajito yathaiva ।
6.127.22 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe saptaviṁśatyuttaraśatatamaḥ sargaḥ ।
127 ॥