युद्धकाण्डम्Yuddha Kāṇḍa

pratiprayāte kākutsthe mahendraḥ pākaśāsanaḥ ।
abravīt paramaprīto rāghavaṁ prāñjaliṁ sthitam ।
6.123.1 ॥

amoghaṁ darśanaṁ rāma tavāsmākaṁ parantapa ।
prītiyuktāḥ sma tena tvaṁ brūhi yanmanasecchasi ।
6.123.2 ॥

evamuktastu kākutsthaḥ pratyuvāca kṛtāñjaliḥ ।
lakṣmaṇena saha bhrātrā sītayā saha bhāryayā ।
6.123.3 ॥

yadi prītiḥ samutpannāmayi sarvasureśvara ।
vakṣyāmi kuru te satyaṁ vacanaṁ vadatāṁ vara ।
6.123.4 ॥

mama hetoḥ parākrāntā ye gatā yamasādanam ।
te sarve jivitaṁ prāpya samuttiṣṭhantu vānarāḥ ।
6.123.5 ॥

matkṛte viprayuktā ye putrairdāraiśca vānarāḥ ।
matpriyeṣvabhiyuktāśca na mṛtyuṁ gaṇayanti ca ।
6.123.6 ॥

tvatprasādāt sameyuste varametadahaṁ vṛṇe ।
6.123.7 ॥

nīrujo nirvraṇāṁścaiva sampannabalapauruṣān ।
golāṅgūlāṁstathaivarkṣān draṣṭumicchāmi mānada ।
6.123.8 ॥

akāle cāpi mukhyāni mūlāni ca phalāni ca ।
nadyaśca vimalāstatra tiṣṭheyuryatra vānarāḥ ।
6.123.9 ॥

śrutvā tu vacanaṁ tasya rāghavasya mahātmanaḥ ।
mahendraḥ pratyuvācedaṁ vacanaṁ prītilakṣaṇam ।
6.123.10 ॥

mahānayaṁ varastāta tvayokto raghunandana ।
dvirmayā noktapūrvaṁ hi tasmādetadbhaviṣyati ।
6.123.11 ॥

samutthāsyanti harayo ye hatā yudhi rākṣasaiḥ ।
ṛkṣāśca sahagopucchā nikṛttānanabāhavaḥ ।
nīrujo nirvraṇāścaiva sampannabalapauruṣāḥ ।
6.123.12 ॥

samutthāsyanti harayaḥ suptā nidrākṣaye yathā ।
suhṛdbhirbāndhavaiścaiva jñātibhiḥ svajanairapi ।
sarva eva sameṣyanti saṁyuktāḥ parayā mudā ।
6.123.13 ॥

akāle puṣpaśabalāḥ phalavantaśca pādapāḥ ।
bhaviṣyanti maheṣvāsa nadyaśca salilāyutāḥ ।
6.123.14 ॥

savraṇaiḥ prathamaṁ gātraiḥ saṁvṛttairnirvraṇaiḥ punaḥ ।
6.123.15 ।
ca salilāyutāḥ ।
6.123.14 ॥

tataḥ samutthitāḥ sarve suptveva haripuṅgavāḥ ।
babhūvurvānarāḥ sarve kimetaditi vismitāḥ ।
6.123.16 ॥

te sarve vānarāstasmai rāghavāyābhyavādayan ।
6.123.17 ॥

kākutsthaṁ paripūrṇārthaṁ dṛṣṭvā sarve surottamāḥ ।
ūcuste prathamaṁ stutvā stavārhaṁ sahalakṣmaṇam ।
6.123.18 ॥

gacchāyodhyāmito vīra visarjaya ca vānarān ।
6.123.19 ॥

maithilīṁ sāntvayasvaināmanuraktāṁ tapasvinīm ।
śatrughnaṁ ca mahātmānaṁ māta'ḥ sarvāḥ parantapa ।
6.123.20 ॥

bhrātaraṁ paśya bharataṁ tvacchokādvratadhāriṇam ।
abhiṣecaya cātmānaṁ paurān gatvā praharṣaya ।
6.123.21 ॥

evamuktvā tamāmantrya rāmaṁ saumitriṇā saha ।
vimānaiḥ sūryasaṅkāśairhṛṣṭā jagmuḥ surā divam ।
6.123.22 ॥

abhivādya ca kākutsthaḥ sarvāṁstāṁstridaśottamān ।
lakṣmaṇena saha bhrātrā vāsamājñāpayattadā ।
6.123.23 ॥

tatastu sā lakṣmaṇarāmapālitā mahācamūrhṛṣṭajanā yaśasvinī ।
śriyā jvalantī virarāja sarvato niśā praṇīteva hi śītaraśminā ।
6.123.24 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe trayoviṁśatyuttaraśatatamaḥ sargaḥ ।
123 ॥