युद्धकाण्डम्Yuddha Kāṇḍa

etacchrutvā śubhaṁ vākyaṁ rāghaveṇa subhāṣitam ।
idaṁ śubhataraṁ vākyaṁ vyājahāra maheśvaraḥ ।
6.122.1 ॥

puṣkarākṣa mahābāho mahāvakṣaḥ parantapa ।
diṣṭyā kṛtamidaṁ karma tvayā śastrabhṛtāṁ vara ।
6.122.2 ॥

diṣṭyā sarvasya lokasya pravṛddhaṁ dāruṇaṁ tamaḥ ।
apāvṛttaṁ tvayā saṅkhye rāma rāvaṇajaṁ bhayam ।
6.122.3 ॥

āśvāsya bharataṁ dīnaṁ kausalyāṁ ca yaśasvinīm ।
kaikeyīṁ ca sumitrāṁ ca dṛṣṭvā lakṣmaṇamātaram ।
6.122.4 ॥

prāpya rājyamayodhyāyāṁ nandayitvā suhṛjjanam ।
ikṣvākūṇāṁ kule vaṁśaṁ sthāpayitvā mahābala ।
6.122.5 ॥

iṣṭvā turagamedhena prāpya cānuttamaṁ yaśaḥ ।
brāhmaṇebhyo dhanaṁ dattvā tridivaṁ gantumarhasi ।
6.122.6 ॥

eṣa rājā vimānasthaḥ pitā daśarathastava ।
kākutstha mānuṣe loke gurustava mahāyaśāḥ ।
6.122.7 ॥

indralokaṁ gataḥ śrīmāṁstvayā putreṇa tāritaḥ ।
lakṣmaṇena saha bhrātrā tvamenamabhivādaya ।
6.122.8 ॥

mahādevavacaḥ śrutvā kākutsthaḥ sahalakṣmaṇaḥ ।
vimānaśikharasthasya praṇāmamakarot pituḥ ।
6.122.9 ॥

dīpyamānaṁ svayā lakṣmyā virajombaradhāriṇam ।
lakṣmaṇena saha bhrātrā dadarśa pitaraṁ vibhuḥ ।
6.122.10 ॥

harṣeṇa mahatā ' 'viṣṭo vimānastho mahīpatiḥ ।
prāṇaiḥ priyataraṁ dṛṣṭvā putraṁ daśarathastadā ।
6.122.11 ॥

āropyāṅkaṁ mahābāhurvarāsanagataḥ prabhuḥ ।
bāhubhyāṁ sampariṣvajya tato vākyaṁ samādade ।
6.122.12 ॥

na me svargo bahumataḥ sammānaśca surarṣibhiḥ ।
tvayā rāma vihīnasya satyaṁ pratiśṛṇomi te ।
6.122.13 ॥

adya tvāṁ nihatāmitraṁ dṛṣṭvā sampūrṇamānasam ।
nistīrṇavanavāsaṁ ca prītirāsīt parā mama ।
6.122.14 ॥

kaikeyyā yāni coktāni vākyāni vadatāṁ vara ।
tava pravājanārthāni sthitāni hṛdaye mama ।
6.122.15 ॥

tvāṁ tu dṛṣṭvā kuśalinaṁ pariṣvajya salakṣmaṇam ।
adya duḥkhādvimukto 'smi nīhārādiva bhāskaraḥ ।
6.122.16 ॥

tārito 'haṁ tvayā putra suputreṇa mahātmanā ।
aṣṭāvakreṇa dharmātmā tārito brāhmaṇo yathā ।
6.122.17 ॥

idānīṁ tu vijānāmi yathā saumya sureśvaraiḥ ।
vadhārthaṁ rāvaṇasyedaṁ vihitaṁ puruṣottama ।
6.122.18 ॥

siddhārthā khalu kausalyā yā tvāṁ rāma gṛhaṁ gatam ।
vanānnivṛttaṁ saṁhṛṣṭā drakṣyatyariniṣūdana ।
6.122.19 ॥

siddhārthāḥ khalu te rāma narā ye tvāṁ purīṁ gatam ।
jalārdramabhiṣiktaṁ ca drakṣyanti vasudhādhipam ।
6.122.20 ॥

anuraktena balinā śucinā dharmacāriṇā ।
icchāmi tvāmahaṁ draṣṭuṁ bharatena samāgatam ।
6.122.21 ॥

caturdaśa samāḥ saumya vane niryāpitāstvayā ।
vasatā sītayā sārdhaṁ lakṣmaṇena ca dhīmatā ।
6.122.22 ॥

nivṛttavanavāso 'si pratijñā saphalā kṛtā ।
rāvaṇaṁ ca raṇe hatvā devāste paritoṣitāḥ ।
6.122.23 ॥

kṛtaṁ karma yaśaḥ ślādhyaṁ prāptaṁ te śatrusūdana ।
bhrātṛbhiḥ saha rājyastho dīrghamāyuravāpnuhi ।
iti bruvāṇaṁ rājānaṁ rāmaḥ prāñjalirabravīt ।
6.122.24 ॥

kuru prasādaṁ dharmajña kaikeyyā bharatasya ca ।
saputrāṁ tvāṁ tyajāmīti yaduktā kaikayī tvayā ।
6.122.25 ॥

sa śāpaḥ kekayīṁ ghoraḥ saputrāṁ na spṛśet prabho ।
6.122.26 ॥

sa tatheti mahārājo rāmamuktvā kṛtāñjalim ।
lakṣmaṇaṁ ca pariṣvajya punarvākyamuvāca ha ।
6.122.27 ॥

rāmaṁ śuśrūṣatā bhaktyā vaidehyā saha sītayā ।
kṛtā mama mahāprītiḥ prāptaṁ dharmaphalaṁ ca te ।
6.122.28 ॥

dharmaṁ prāpsyasi dharmajña yaśaśca vipulaṁ bhuvi ।
rāme prasanne svargaṁ ca mahimānaṁ tathaiva ca ।
6.122.29 ॥

rāmaṁ śuśrūṣa bhadraṁ te sumitrānandavardhana ।
rāmaḥ sarvasya lokasya śubheṣvabhirataḥ sadā ।
6.122.30 ॥

ete sendrāstrayo lokāḥ siddhāśca paramarṣayaḥ ।
abhigamya mahātmānamarcanti puruṣottamam ।
6.122.31 ॥

etattaduktamavyaktamakṣaraṁ brahmanirmitam ।
devānāṁ hṛdayaṁ saumya guhyaṁ rāmaḥ parantapaḥ ।
6.122.32 ॥

avāptaṁ dharmacaraṇaṁ yaśaśca vipulaṁ tvayā ।
rāmaṁ śuśrūṣatā bhaktyā vaidehyā saha sītayā ।
6.122.33 ॥

sa tathoktvā mahābāhurlakṣmaṇaṁ prāñjaliṁ sthitam ।
uvāca rājā dharmātmā vaidehīṁ vacanaṁ śubham ।
6.122.34 ॥

kartavyo na tu vaidehi manyustyāgamimaṁ prati ।
rāmema tvadviśuddhyarthaṁ kṛtametaddhitaiṣiṇā ।
6.122.35 ॥

na tvaṁ subhru samādheyā patiśuśrūṣaṇaṁ prati ।
avaśyaṁ tu mayā vācyameṣa te daivataṁ param ।
6.122.36 ॥

iti pratisamādiśya putrau sītāṁ tathā snuṣām ।
indralokaṁ vimānena yayau daśaratho jvalan ।
6.122.37 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe dvāviṁśatyuttaraśatatamaḥ sargaḥ ।
122 ॥