युद्धकाण्डम्Yuddha Kāṇḍa

evamuktā tu vaidehī paruṣaṁ romaharṣaṇam ।
rāghaveṇa saroṣeṇa bhṛśaṁ pravyathitā 'bhavat ।
6.119.1 ॥

sā tadaśrutapūrvaṁ hi jane mahati maithilī ।
śrutvā bhartṛvaco rūkṣaṁ lajjayā vrīḍitā 'bhavat ।
6.119.2 ॥

praviśantīva gātrāṇi svānyeva janakātmajā ।
vākchalyaistaiḥ saśalyeva bhṛśamaśrūṇyavartayat ।
6.119.3 ॥

tato bāṣpaparikliṣṭaṁ pramārjantī svamānanam ।
śanairgadgadayā vācā bhartāramidamabravīt ।
6.119.4 ॥

kiṁ māmasadṛśaṁ vākyamīdṛśaṁ śrotradāruṇam ।
rūkṣaṁ śrāvayase vīra prākṛtaḥ prākṛtāmiva ।
6.119.5 ॥

na tathā 'smi mahābāho yathā tvamavagacchasi ।
pratyayaṁ gaccha me yena cāritreṇaiva te śape ।
6.119.6 ॥

pṛthakstrīṇāṁ pracāreṇa jātiṁ tāṁ pariśaṅkase ।
parityajemāṁ śaṅkāṁ tu yadi te 'haṁ parīkṣitā ।
6.119.7 ॥

yadyahaṁ gātrasaṁsparśaṁ gatā 'smi vivaśā prabho ।
kāmakāro na me tatra daivaṁ tatrāparādhyati ।
6.119.8 ॥

madadhīnaṁ tu yattanme hṛdayaṁ tvayi vartate ।
parādhīneṣu gātreṣu kiṁ kariṣyāmyanīśvarā ।
6.119.9 ॥

sahasaṁvṛddhabhāvācca saṁsargeṇa ca mānada ।
yadyahaṁ te na vijñātā hatā tenāsmi śāśvatam ।
6.119.10 ॥

preṣitaste yadā vīro hanumānavalokakaḥ ।
laṅkāsthā 'haṁ tvayā vīra kiṁ tadā na visarjitā ।
6.119.11 ॥

pratyakṣaṁ vānarendrasya tadvākyasamanantaram ।
tvayā santyaktayā vīra tyaktaṁ syājjīvitaṁ mayā ।
6.119.12 ॥

na vṛthā te śramo 'yaṁ syāt saṁśaye nyasya jīvitam ।
suhṛjjanaparikleśo na cāyaṁ niṣphalastava ।
6.119.13 ॥

tvayā tu naraśārdūla krodhamevānuvartatā ।
laghuneva manuṣyeṇa strītvameva puraskṛtam ।
6.119.14 ॥

apadeśena janakānnotpattirvasudhātalāt ।
mama vṛttaṁ ca vṛttajña bahu te na puraskṛtam ।
6.119.15 ॥

na pramāṇīkṛtaḥ pāṇirbālye bālena pīḍitaḥ ।
mama bhaktiśca śīlaṁ ca sarvaṁ te pṛṣṭhataḥ kṛtam ।
6.119.16 ॥

evaṁ bruvāṇā rudatī bāṣpagadgadabhāṣiṇī ।
abravīllakṣmaṇaṁ sītā dīnaṁ dhyānaparaṁ sthitam ।
6.119.17 ॥

citāṁ me kuru saumitre vyasanasyāsya bheṣajam ।
mithyopaghātopahatā nāhaṁ jīvitumutsahe ।
6.119.18 ॥

aprītasya guṇairbhartustyaktāyā janasaṁsadi ।
yā kṣamā me gatirgantuṁ pravekṣye havyavāhanam ।
6.119.19 ॥

evamuktastu vaidehyā lakṣmaṇaḥ paravīrahā ।
amarṣavaśamāpanno rāghavānanamaikṣata ।
6.119.20 ॥

sa vijñāya tataśchandaṁ rāmasyākārasūcitam ।
citāṁ cakāra saumitrirmate rāmasya vīryavān ।
6.119.21 ॥

adhomukhaṁ tadā rāmaṁ śanaiḥ kṛtvā pradakṣiṇam ।
upāsarpata vaidehī dīpyamānaṁ hutāśanam ।
6.119.22 ॥

praṇamya devatābhyaśca brāhmaṇebhyaśca maithilī ।
baddhāñjalipuṭā cedamuvācāgnisamīpataḥ ।
6.119.23 ॥

yathā me hṛdayaṁ nityaṁ nāpasarpati rāghavāt ।
tathā lokasya sākṣī māṁ sarvataḥ pātu pāvakaḥ ।
6.119.24 ॥

yathā māṁ śuddhacāritrāṁ duṣṭāṁ jānāti rāghavaḥ ।
tathā lokasya sākṣī māṁ sarvataḥ pātu pāvakaḥ ।
6.119.25 ॥

karmaṇā manasā vācā yathā nāticarāmyaham ।
rāghavaṁ sarvadharmajñaṁ tathā māṁ pātu pāvakaḥ ।
6.119.26 ॥

ādityo bhagavān vāyurdiśaścandrastathaiva ca ।
ahaścāpi tathā sandhye rātriśca pṛthivī tathā ।
yathānye 'pi vijānanti tathā cāritrasaṁyutām ।
6.119.27 ॥

evamuktvā tu vaidehī parikramya hutāśanam ।
viveśa jvalanaṁ dīptaṁ nissaṅgenāntarātmanā ।
6.119.28 ॥

janaḥ sa sumahāṁstrasto bālavṛddhasamākulaḥ ।
dadarśa maithilīṁ tatra praviśantīṁ hutāśanam ।
6.119.29 ॥

sā taptanavahemābhā taptakāñcanabhūṣaṇā ।
papāta jvalanaṁ dīptaṁ sarvalokasya sannidhau ।
6.119.30 ॥

dadṛśustāṁ mahābhāgāṁ praviśantīṁ hutāśanam ।
sītāṁ kṛtsnāstrayo lokāḥ puṇyāmājyāhutīmiva ।
6.119.31 ॥

pracukruśuḥ striyaḥ sarvāstāṁ dṛṣṭvā havyavāhane ।
patantīṁ saṁskṛtāṁ mantrairvasordhārāmivādhvare ।
6.119.32 ॥

dadṛśustāṁ trayo lokā devagandharvadānavāḥ ।
śaptāṁ patantīṁ niraye tridivāddevatāmiva ।
6.119.33 ॥

tasyāmagniṁ viśantyāṁ tu hāheti vipulasvanaḥ ।
rakṣasāṁ vānarāṇāṁ ca sambabhūvādbhutopamaḥ ।
6.119.34 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe ekonaviṁśatyuttaraśatatamaḥ sargaḥ ।
119 ॥