युद्धकाण्डम्Yuddha Kāṇḍa

tāṁ tu pārśvasthitāṁ prahvāṁ rāmaḥ samprekṣya maithilīm ।
hṛdayāntargatakrodho vyāhartumupacakrame ।
6.118.1 ॥

eṣā 'si nirjitā bhadre śatruṁ jitvā mayā raṇe ।
pauruṣādyadanuṣṭheyaṁ tadetadupapāditam ।
6.118.2 ॥

gato 'smyantamamarṣasya dharṣaṇā sampramārjitā ।
avamānaśca śatruśca mayā yugapaduddhṛtau ।
6.118.3 ॥

adya me pauruṣaṁ dṛṣṭamadya me saphalaḥ śramaḥ ।
adya tīrṇapratijñatvāt prabhavāmīha cātmanaḥ ।
6.118.4 ॥

yā tvaṁ virahitā nītā calacittena rakṣasā ।
daivasampādito doṣo mānuṣeṇa mayā jitaḥ ।
6.118.5 ॥

samprāptamavamānaṁ yastejasā na pramārjati ।
kastasya puruṣārtho 'sti puruṣasyālpatejasaḥ ।
6.118.6 ॥

laṅghanaṁ ca samudrasya laṅkāyāścāvamardanam ।
saphalaṁ tasya tacchlādhyaṁ mahat karma hanūmataḥ ।
6.118.7 ॥

yuddhe vikramataścaiva hitaṁ mantrayataśca me ।
sugrīvasya sasainyasya saphalo 'dya pariśramaḥ ।
6.118.8 ॥

nirguṇaṁ bhrātaraṁ tyaktvā yo māṁ svayamupasthitaḥ ।
vibhīṣaṇasya bhaktasya saphalo 'dya pariśramaḥ ।
6.118.9 ॥

ityevaṁ bruvatastasya sītā rāmasya tadvacaḥ ।
mṛgīvotphullanayanā babhūvāśrupariplutā ।
6.118.10 ॥

paśyatastāṁ tu rāmasya bhūyaḥ krodho vyavardhata ।
prabhūtājyāvasiktsya pāvakasyeva dīpyataḥ ।
6.118.11 ॥

sa baddhvā bhrukuṭīṁ vaktre tiryakprekṣitalocanaḥ ।
abravīt paruṣaṁ sītāṁ madhye vānararakṣasām ।
6.118.12 ॥

yat kartavyaṁ manuṣyeṇa dharṣaṇāṁ parimārjatā ।
tat kṛtaṁ sakalaṁ sīte śatruhastādamarṣaṇāt ।
6.118.13 ॥

nirjitā jīvalokasya tapasā bhāvitātmanā ।
agastyena durādharṣā muninā dakṣiṇeva dik ।
6.118.14 ॥

viditaścāstu te bhadre yo 'yaṁ raṇapariśramaḥ ।
sa tīrṇaḥ suhṛdāṁ vīryānna tvadarthaṁ mayā kṛtaḥ ।
6.118.15 ॥

rakṣatā tu mayā vṛttamapāvadaṁ ca sarvaśaḥ ।
prakhyātasyātmavaṁśasya nyaṅgaṁ ca parirakṣatā ।
6.118.16 ॥

prāptacāritrasandehā mama pratimukhe sthitā ।
dīpo netrāturasyeva pratikūlā 'si me dṛḍham ।
6.118.17 ॥

tadgaccha hyabhyanujñātā yatheṣṭaṁ janakātmaje ।
etā daśa diśo bhadre kāryamasti na me tvayā ।
6.118.18 ॥

kaḥ pumān hi kule jātaḥ striyaṁ paragṛhoṣitām ।
tejasvī punarādadyāt suhṛllekhyena cetasā ।
6.118.19 ॥

rāvaṇāṅkaparibhraṣṭāṁ dṛṣṭāṁ duṣṭena cakṣuṣā ।
kathaṁ tvāṁ punarādadyāṁ kulaṁ vyapadiśan mahat ।
6.118.20 ॥

tadarthaṁ nirjitā me tvaṁ yaśaḥ pratyāhṛtaṁ mayā ।
nāsti me tvayyabhiṣvaṅgo yatheṣṭaṁ gamyatāmitaḥ ।
6.118.21 ॥

iti pravyāhṛtaṁ bhadre mayaitat kṛtabuddhinā ।
lakṣmaṇe bharate vā tvaṁ kuru buddhiṁ yathāsukham ।
6.118.22 ॥

sugrīve vānarendre vā rākṣasendre vibhīṣaṇe ।
niveśaya manaḥ sīte yathā vā sukhamātmanaḥ ।
6.118.23 ॥

na hi tvāṁ rāvaṇo dṛṣṭvā divyarūpāṁ manoramām ।
marṣayeta ciraṁ sīte svagṛhe parivartinīm ।
6.118.24 ॥

tataḥ priyārhaśravaṇā tadapriyaṁ priyādupaśrutya cirasya maithilī ।
mumoca bāṣpaṁ subhṛśaṁ pravepitā gajendrahastābhihateva sallakī ।
6.118.25 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe aṣṭādaśottaraśatatamaḥ sargaḥ ।
118 ॥