युद्धकाण्डम्Yuddha Kāṇḍa

sa uvāca mahāprājñamabhigamya plavaṅgamaḥ ।
rāmaṁ vacanamarthajño varaṁ sarvadhanuṣmatām ।
6.117.1 ॥

yannimitto 'yamārambhaḥ karmaṇāṁ ca phalodayaḥ ।
tāṁ devīṁ śokasantaptāṁ maithilīṁ draṣṭumarhasi ।
6.117.2 ॥

sā hi śokasamāviṣṭā bāṣpaparyākulekṣaṇā ।
maithilī vijayaṁ śrutvā tava harṣamupāgamat ।
6.117.3 ॥

pūrvakāt pratyayāccāhamukto viśvastayā tayā ।
bhartāraṁ draṣṭumicchāmi kṛtārthaṁ sahalakṣmaṇam ।
6.117.4 ॥

evamukto hanumatā rāmo dharmabhṛtāṁ varaḥ ।
agacchat sahasā dhyānamīṣadbāṣpapariplutaḥ ।
6.117.5 ॥

dīrghamuṣṇaṁ viniśvasya medinīmavalokayan ।
uvāca meghasaṅkāśaṁ vibhīṣaṇamupasthitam ।
6.117.6 ॥

divyāṅgarāgāṁ vaidehīṁ divyābharaṇabhūṣitām ।
iha sītāṁ śirassnātāmupasthāpaya mā ciram ।
6.117.7 ॥

evamuktastu rāmeṇa tvaramāṇo vibhīṣaṇaḥ ।
praviśyāntaḥpuraṁ sītāṁ svābhiḥ strībhiracodayat ।
6.117.8 ॥

divyāṅgarāgā vaidehi divyābharaṇabhūṣitā ।
yānamāroha bhadraṁ te bhartā tvāṁ draṣṭumicchati ।
6.117.9 ॥

evamuktā tu vedehī pratyuvāca vibhīṣaṇam ।
asnātā draṣṭumicchāmi bhartāraṁ rākṣasādhipa ।
6.117.10 ॥

tasyāstadvacanaṁ śrutvā pratyuvāca vibhīṣaṇaḥ ।
yadāha rājā bhartā te tattathā kartumarhasi ।
6.117.11 ॥

tasya tadvacanaṁ śrutvā maithilī bhartṛdevatā ।
bhartṛbhaktivratā sādhvī tatheti pratyabhāṣata ।
6.117.12 ॥

tataḥ sītāṁ śirassnātāṁ yuvatībhiralaṅkṛtām ।
mahārhābharaṇopetāṁ mahārhāmbaradhāriṇīm ।
6.117.13 ॥

āropya śibikāṁ dīptāṁ parārdhyāmbarasaṁvṛtām ।
rakṣobhirbahubhirguptāmājahāra vibhīṣaṇaḥ ।
6.117.14 ॥

so 'bhigamya mahātmānaṁ jñātvā 'pi dhyānamāsthitam ।
praṇataśca prahṛṣṭaśca prāptaṁ sītāṁ nyavedayat ।
6.117.15 ॥

tāmāgatāmupaśrutya rakṣogṛhaciroṣitām ।
harṣo dainyaṁ ca roṣaśca trayaṁ rāghavamāviśat ।
6.117.16 ॥

tataḥ pārśvagataṁ dṛṣṭvā savimarśaṁ vicārayan ।
vibhīṣaṇamidaṁ vākyamahṛṣṭaṁ rāghavo 'bravīt ।
6.117.17 ॥

rākṣasādhipate saumya nityaṁ madvijaye rata ।
vaidehī sannikarṣaṁ me śīghraṁ samupagacchatu ।
6.117.18 ॥

sa tadvacanamājñāya rāghavasya vibhīṣaṇaḥ ।
tūrṇamutsāraṇe yatnaṁ kārayāmāsa sarvataḥ ।
6.117.19 ॥

kañcukoṣṇīṣiṇastatra vetrajarjarapāṇayaḥ ।
utsārayantaḥ puruṣāḥ samantāt paricakramuḥ ।
6.117.20 ॥

ṛkṣāṇāṁ vānarāṇāṁ ca rākṣasānāṁ ca sarvaśaḥ ।
vṛndānyutsāryamāṇāni dūramutsasṛjustadā ।
6.117.21 ॥

teṣāmutsāryamāṇānāṁ sarveṣāṁ dhvanirutthitaḥ ।
vāyunodvartamānasya sāgarasyeva nisvanaḥ ।
6.117.22 ॥

utsāryamāṇāṁstān dṛṣṭvā samantājjātasambhramān ।
dākṣiṇyāttadamarṣācca vārayāmāsa rāghavaḥ ।
6.117.23 ॥

saṁrabdhaścābravīdrāmaścakṣuṣā pradahanniva ।
vibhīṣaṇaṁ mahāprājñaṁ sopālambhamidaṁ vacaḥ ।
6.117.24 ॥

kimarthaṁ māmanādṛtya kliśyate 'yaṁ tvayā janaḥ ।
nivartayainamudyogaṁ jano 'yaṁ svajano mama ।
6.117.25 ॥

na gṛhāṇi na vastrāṇi na prākārāstiraskriyāḥ ।
nedṛśā rājasatkārā vṛttamāvaraṇaṁ striyāḥ ।
6.117.26 ॥

vyasaneṣu na kṛcchreṣu na yuddheṣu svayaṁvare ।
na krutau na vivāhe ca darśanaṁ duṣyati striyāḥ ।
6.117.27 ॥

saiṣā yuddhagatā caiva kṛcchre ca mahati sthitā ।
darśane 'syā na doṣaḥ syānmatsamīpe viśeṣataḥ ।
6.117.28 ॥

tadānaya samīpaṁ me śīghramenāṁ vibhīṣaṇa ।
sītā paśyatu māmeṣā suhṛdgaṇavṛtaṁ sthitam ।
6.117.29 ॥

evamuktastu rāmeṇa savimarśo vibhīṣaṇaḥ ।
rāmasyopānayat sītāṁ sannikarṣaṁ vinītavat ।
6.117.30 ॥

tato lakṣmaṇasugrīvau hanumāṁśca plavaṅgamaḥ ।
niśamya vākyaṁ rāmasya babhūvurvyathitā bhṛśam ।
6.117.31 ॥

kalatranirapekṣaiśca iṅgitairasya dāruṇaiḥ ।
aprītamiva sītāyāṁ tarkayanti sma rāghavam ।
6.117.32 ॥

lajjayā tvavalīyantī sveṣu gātreṣu maithilī ।
vibhīṣaṇenānugatā bhartāraṁ sā 'bhyavartata ।
6.117.33 ॥

sā vastrasaṁruddhamukhī lajjayā janasaṁsadi ।
rurodāsādya bhartāramāryaputreti bhāṣiṇī ।
6.117.34 ॥

vismayācca praharṣācca snehācca patidevatā ।
udaikṣata mukhaṁ bhartuḥ saumyaṁ somyatarānanā ।
6.117.35 ॥

atha samapanudanmanaḥklamaṁ sā suciramadṛṣṭamudīkṣya vai priyasya ।
vadanamuditapūrṇacandrakāntaṁ vimalaśaśāṅkanibhānanā tadānīm ।
6.117.36 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe saptadaśottaraśatatamaḥ sargaḥ ।
117 ॥