युद्धकाण्डम्Yuddha Kāṇḍa

iti pratisamādiṣṭo hanumān mārutātmajaḥ ।
praviveśa purīṁ laṅkāṁ pūjyamāno niśācaraiḥ ।
6.116.1 ॥

praviśya ca mahātejā rāvaṇasya niveśanam ।
dadarśa mṛjayā hīnāṁ sātaṅkāmiva rohiṇīm ।
vṛkṣamūle nirānandāṁ rākṣasībhiḥ samāvṛtām ।
6.116.2 ॥

nibhṛtaḥ praṇataḥ prahvaḥ so 'bhigamyābhivādya ca ।
6.116.3 ॥

dṛṣṭvā tamāgataṁ devī hanumantaṁ mahābalam ।
tūṣṇīmāsta tadā dṛṣṭvā smṛtvā pramuditā 'bhavat ।
6.116.4 ॥

saumyaṁ dṛṣṭvā mukhaṁ tasyā hanumān plavagottamaḥ ।
rāmasya vacanaṁ sarvamākhyātumupacakrame ।
6.116.5 ॥

vaidehi kuśalī rāmaḥ sahasugrīvalakṣmaṇaḥ ।
vibhīṣaṇasahāyaśca harīṇāṁ sahito balaiḥ ।
6.116.6 ॥

kuśalaṁ cāhu siddhārtho hataśatrurarindamaḥ ।
6.116.7 ॥

vibhīṣaṇasahāyena rāmeṇa haribhiḥ saha ।
nihato rāvaṇo devi lakṣmaṇasya nayena ca ।
6.116.8 ॥

pṛṣṭvā tu kuśalaṁ rāmo vīrastvāṁ raghunandanaḥ ।
abravīt paramaprītaḥ kṛtārthenāntarātmanā ।
6.116.9 ॥

priyamākhyāmi te devi tvāṁ tu bhūyaḥ sabhājaye ।
diṣṭyā jīvasi dharmajñe jayena mama saṁyuge ।
6.116.10 ॥

labdho no vijayaḥ sīte svasthā bhava gatavyathā ।
rāvaṇaśca hataḥ śatrurlaṅkā ceyaṁ vaśe sthitā ।
6.116.11 ॥

mayā hyalabdhanidreṇa dṛḍhena tava nirjaye ।
pratijñaiṣā vinistīrṇā baddhvā setuṁ mahodadhau ।
6.116.12 ॥

sambhramaśca na gantavyo vartantyā rāvaṇālaye ।
vibhīṣaṇavidheyaṁ hi laṅkaiśvaryamidaṁ kṛtam ।
6.116.13 ॥

tadāśvasihi viśvastā svagṛhe parivartase ।
ayaṁ cābhyeti saṁhṛṣṭastvaddarśanasamutsukaḥ ।
6.116.14 ॥

evamuktā samutpatya sītā śaśinibhānanā ।
praharṣeṇāvaruddhā sā vyājahāra na kiñcana ।
6.116.15 ॥

abravīcca hariśreṣṭhaḥ sītāmapratijalpatīm ।
kiṁ nu cintayase devi kiṁ nu māṁ nābhibhāṣase ।
6.116.16 ॥

evamuktā hanumatā sītā dharme vyavasthitā ।
abravīt paramaprītā harṣagadgadayā girā ।
6.116.17 ॥

priyametadupaśrutya bharturvijayasaṁśritam ।
praharṣavaśamāpannā nirvākyā 'smi kṣaṇāntaram ।
6.116.18 ॥

na hi paśyāmi sadṛśaṁ cintayantī plavaṅgama ।
matpriyākhyānākasyeha tava pratyabhinandanam ।
6.116.19 ॥

na hi paśyāmi tat saumya pṛthivyāmapi vānara ।
sadṛśaṁ matpriyākhyāne tava dātuṁ bhavet samam ।
6.116.20 ॥

hiraṇyaṁ vā suvarṇaṁ vā ratnāni vividhāni ca ।
rājyaṁ vā triṣu lokeṣu naitadarhati bhāṣitum ।
6.116.21 ॥

evamuktastu vaidehyā pratyuvāca plavaṅgamaḥ ।
gṛhītaprāñjalirvākyaṁ sītāyāḥ pramukhe sthitaḥ ।
6.116.22 ॥

bhartuḥ priyahite yukte bharturvijayakāṅkṣiṇi ।
snigdhamevaṁvidhaṁ vākyaṁ tvamevārhasi bhāṣitum ।
6.116.23 ॥

tavaitadvacanaṁ saumye sāravat snigdhameva ca ।
ratnaughādvividhāccāpi devarājyādviśiṣyate ।
6.116.24 ॥

arthataśca mayā prāptā devarājyādayo guṇāḥ ।
hataśatruṁ vijayinaṁ rāmaṁ paśyāmi susthitam ।
6.116.25 ॥

tasya tadvacanaṁ śrutvā maithilī janakātmajā ।
tataḥ śubhataraṁ vākyamuvāca pavanātmajam ।
6.116.26 ॥

atilakṣaṇasampannaṁ mādhuryaguṇabhūṣitam ।
buddhyā hyaṣṭāṅgayā yuktaṁ tvamevārhasi bhāṣitum ।
6.116.27 ॥

ślāghanīyo 'nilasya tvaṁ putraḥ paramadhārmikaḥ ।
balaṁ śauryaṁ śrutaṁ sattvaṁ vikramo dākṣyamuttamam ।
6.116.28 ॥

tejaḥ kṣamādhṛtirdhairyaṁ vinītatvaṁ na saṁśayaḥ ।
ete cānye ca bahavo guṇāstvayyeva śobhanāḥ ।
6.116.29 ॥

athovāca punaḥ sītāmasambhrānto vinītavat ।
pragṛhītāñjalirharṣāt sītāyāḥ pramukhe sthitaḥ ।
6.116.30 ॥

imāstu khalu rākṣasyo yadi tvamanumanyase ।
hantumicchāmyahaṁ sarvā yābhistvaṁ tarjitā purā ।
6.116.31 ॥

kliśyantīṁ patidevāṁ tvāmaśokavanikāṁ gatām ।
6.116.32 ॥

ghorarūpasamācārāḥ krūrāḥ krūratarekṣaṇāḥ ।
rākṣasyo dāruṇakathā varametat prayaccha me ।
6.116.33 ।
muṣṭibhiḥ pāṇibhiḥ sarvāścaraṇaiścaiva śobhane ।
icchāmi vividhairghātairhantumetāḥ sudāruṇāḥ ।
6.116.34 ॥

ghātairjānuprahāraiśca daśanānāṁ ca pātanaiḥ ।
bhakṣaṇaiḥ karṇanāsānāṁ keśānāṁ luñcanaistathā ।
6.116.35 ॥

nakhaiḥ śuṣkamukhībhiśca dāraṇairlaṅghanairhataiḥ ।
nipātya hantumicchāmi tava vipriyakāriṇīḥ ।
6.116.36 ॥

evaṁprakārairbahubhirviprakārairyaśasvini ।
hantumicchāmyahaṁ devi tavemāḥ kṛtakilbiṣāḥ ।
6.116.37 ॥

evamuktā hanumatā vaidehī janakātmajā ।
uvāca dharmasahitaṁ hanumantaṁ yaśasvinī ।
6.116.38 ॥

rājasaṁśrayavaśyānāṁ kurvantīnāṁ parājñayā ।
vidheyānāṁ ca dāsīnāṁ kaḥ kupyedvānarottama ।
6.116.39 ॥

bhāgyavaiṣamyayogena purāduścaritena ca ।
mayaitat prāpyate sarvaṁ svakṛtaṁ hyupabhujyate ।
6.116.40 ॥

prāptavyaṁ tu daśāyogānmayaitaditi niścitam ।
dāsīnāṁ rāvaṇasyāhaṁ marṣayāmīha durbalā ।
6.116.41 ॥

ājñaptā rāvaṇenaitā rākṣasyo māmatarjayan ।
hate tasminna kuryurhi tarjanaṁ vānarottama ।
6.116.42 ॥

ayaṁ vyāghrasamīpe tu purāṇo dharmasaṁsthitaḥ ।
ṛkṣeṇa gītaḥ śloko me tannibodha plavaṅgama ।
6.116.43 ॥

na paraḥ pāpamādatte pareṣāṁ pāpakarmaṇām ।
samayo rakṣitavyastu santaścāritrabhūṣaṇāḥ ।
6.116.44 ॥

pāpānāṁ vā śubhānāṁ vā vadhārhāṇāṁ plavaṅgama ।
kāryaṁ karuṇamāryeṇa na kaścinnāparādhyati ।
6.116.45 ॥

lokahiṁsāvihārāṇāṁ rakṣasāṁ kāmarūpiṇām ।
kurvatāmapi pāpāni naiva kāryamaśobhanam ।
6.116.46 ॥

evamuktastu hanumān sītayā vākyakovidaḥ ।
pratyuvāca tataḥ sītāṁ rāmapatnīṁ yaśasvinīm ।
6.116.47 ॥

yuktā rāmasya bhavatī dharmapatnī yaśasvinī ।
pratisandiśa māṁ devi gamiṣye yatra rāghavaḥ ।
6.116.48 ॥

evamuktā hanumatā vaidehī janakātmajā ।
abravīddraṣṭumicchāmi bhartāraṁ vānarottama ।
6.116.49 ॥

tasyāstadvanaṁ śrutvā hanumān mārutātmajaḥ ।
harṣayan maithilīṁ vākyamuvācedaṁ mahādyutiḥ ।
6.116.50 ॥

pūrṇacandrānanaṁ rāmaṁ drakṣyasyārye salakṣmaṇam ।
sthiramitraṁ hatāmitraṁ śacīva tridaśeśvaram ।
6.116.51 ॥

tāmevamuktvā rājantīṁ sītāṁ sākṣādiva śriyam ।
ājagāma mahāvego hanumān yatra rāghavaḥ ।
6.116.52 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe ṣoḍaśottaraśatatamaḥ sargaḥ ।
116 ॥