युद्धकाण्डम्Yuddha Kāṇḍa

te rāvaṇavadhaṁ dṛṣṭvā devagandharvadānavāḥ ।
jagmuḥ svaisvairvimānaiste kathayantaḥ śubhāḥ kathāḥ ।
6.115.1 ॥

rāvaṇasya vadhaṁ ghoraṁ rāghavasya parākramam ।
suyuddhaṁ vānarāṇāṁ ca sugrīvasya ca mantritam ।
6.115.2 ॥

anurāgaṁ ca vīryaṁ ca saumitrerlakṣmaṇasya ca ।
kathayanto mahābhāgā jagmurhṛṣṭā yathāgatam ।
6.115.3 ॥

rāghavastu rathaṁ divyamindradattaṁ śikhiprabham ।
anujñāya mahābhāgo mātaliṁ pratyapūjayat ।
6.115.4 ॥

rāghaveṇābhyanujñāto mātaliḥ śakrasārathiḥ ।
divyaṁ taṁ rathamāsthāya divamevāruroha saḥ ।
6.115.5 ॥

tasmiṁstu divamārūḍhe surasārathisattame ।
rāghavaḥ paramaprītaḥ sugrīvaṁ pariṣasvaje ।
6.115.6 ॥

pariṣvajya ca sugrīvaṁ lakṣmaṇena pracoditaḥ ।
pūjyamāno hariśreṣṭhairājagāma balālayam ।
6.115.7 ॥

abravīcca tadā rāmaḥ samīpaparivartinam ।
saumitriṁ satyasampannaṁ lakṣmaṇaṁ dīptatejasam ।
6.115.8 ॥

vibhīṣaṇamimaṁ saumya laṅkāyāmabhiṣecaya ।
anuraktaṁ ca bhaktaṁ ca mama caivopakāriṇam ।
6.115.9 ॥

eṣa me paramaḥ kāmo yadīmaṁ rāvaṇānujam ।
laṅkāyāṁ saumya paśyeyamabhiṣiktaṁ vibīṣaṇam ।
6.115.10 ॥

evamuktastu saumitrī rāghaveṇa mahātmanā ।
tathetyuktvā tu saṁhṛṣṭaḥ sauvarṇaṁ ghaṭamādade ।
6.115.11 ॥

taṁ ghaṭaṁ vānarendrāṇāṁ haste dattvā manojavān ।
ādideśa mahāsattvān samudrasalilānaye ।
6.115.12 ॥

iti śīghraṁ tato gatvā vānarāste mahābalāḥ ।
āgatāstajjalaṁ gṛhya samudrādvānarottamāḥ ।
6.115.13 ॥

tatastvekaṁ ghaṭaṁ gṛhya saṁsthāpya paramāsane ।
ghaṭena tena saumitrirabhyaṣiñcadvibhīṣaṇam ।
6.115.14 ॥

laṅkāyāṁ rakṣasāṁ madhye rājānaṁ rāmaśāsanāt ।
vidhinā mantradṛṣṭena suhṛdgaṇasamāvṛtam ।
abhyaṣiñcat sa dharmātmā śuddhātmānaṁ vibhīṣaṇam ।
6.115.15 ॥

tasyāmātyā jahṛṣire bhaktā ye cāsya rākṣasāḥ ।
dṛṣṭvā 'bhiṣiktaṁ laṅkāyāṁ rākṣasendraṁ vibhīṣaṇam ।
6.115.16 ॥

sa tadrājyaṁ mahat prāpya rāmadattaṁ vibhīṣaṇaḥ ।
prakṛtīḥ sāntvayitvā ca tato rāmamupāgamat ।
6.115.17 ॥

akṣatān modakān lājān divyāḥ sumanasastadā ।
ājahruratha saṁhṛṣṭāḥ paurāstasmai niśācarāḥ ।
6.115.18 ॥

sa tān gṛhītvā durdharṣo rāghavāya nyavedayat ।
maṅgalyaṁ maṅgalaṁ sarvaṁ lakṣmaṇāya ca vīryavān ।
6.115.19 ॥

kṛtakāryaṁ samṛddhārthaṁ dṛṣṭvā rāmo vibhīṣaṇam ।
pratijagrāha tat sarvaṁ tasyaiva priyakāmyayā ।
6.115.20 ॥

tataḥ śailopamaṁ vīraṁ prāñjaliṁ pārśvataḥ sthitam ।
abravīdrāghavo vākyaṁ hanumantaṁ plavaṅgamam ।
6.115.21 ॥

anumānyaṁ mahārājamimaṁ saumya vibhīṣaṇam ।
6.115.22 ॥

gaccha saumya purīṁ laṅkāmanujñāpya yathāvidhi ।
praviśya rāvaṇagṛhaṁ vijayenābhinandya ca ।
6.115.23 ॥

vaidehyai māṁ kuśalinaṁ sasugrīvaṁ salakṣmaṇam ।
ācakṣva jayatāṁ śreṣṭha rāvaṇaṁ ca mayā hatam ।
6.115.24 ॥

priyametadudāhṛtya maithilyāstvaṁ harīśvara ।
pratigṛhya ca sandeśamupāvartitumarhasi ।
6.115.25 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe pañcadaśottaraśatatamaḥ sargaḥ ।
115 ॥