युद्धकाण्डम्Yuddha Kāṇḍa

rāvaṇaṁ nihataṁ śrutvā rāghaveṇa mahātmanā ।
antaḥpurādviniṣpetū rākṣasyaḥ śokakarśitāḥ ।
6.113.1 ॥

vāryamāṇāḥ subahuśo veṣṭantyaḥ kṣitipāṁsuṣu ।
vimuktakeśyo duḥkhārtā gāvo vatsahatā iva ।
6.113.2 ॥

uttareṇa viniṣkramya dvāreṇa saha rākṣasaiḥ ।
praviśyāyo dhanaṁ ghoraṁ vicinvantyo hataṁ patim ।
6.113.3 ॥

rājaputreti vādinyo hā nātheti ca sarvaśaḥ ।
paripetuḥ kabandhāṅkāṁ mahīṁ śoṇitakardamām ।
6.113.4 ॥

tā bāṣpaparipūrṇākṣyo bhartṛśokaparājitāḥ ।
kareṇva iva nardantyo vinedurhatayūthapāḥ ।
6.113.5 ॥

dadṛśustaṁ mahāvīryaṁ mahākāyaṁ mahādyutim ।
rāvaṇaṁ nihataṁ bhūmau nīlāñjanacayopamam ।
6.113.6 ॥

tāḥ patiṁ sahasā dṛṣṭvā śayānaṁ raṇapāṁsuṣu ।
nipetustasya gātreṣu cchinnā vanalatā iva ।
6.113.7 ॥

bahumānāt pariṣvajya kācidenaṁ ruroda ha ।
caraṇau kācidāliṅgya kācit kaṇṭhe 'valambya ca ।
6.113.8 ॥

uddhṛtya ca bhujau kācidbhūmau sma parivartate ।
hatasya vadanaṁ dṛṣṭvā kācinmohamupāgamat ।
6.113.9 ॥

kācidaṅke śiraḥ kṛtvā ruroda mukhamīkṣatī ।
snāpayantī mukhaṁ bāṣpaistuṣārairiva paṅkajam ।
6.113.10 ॥

evamārtāḥ patiṁ dṛṣṭvā rāvaṇaṁ nihataṁ bhuvi ।
cukruśurbahudhā śokādbhūyastāḥ paryadevayan ।
6.113.11 ॥

yena vitrāsitaḥ śakro yena vitrāsito yamaḥ ।
yena vaiśravaṇo rājā puṣpakeṇa viyojitaḥ ।
6.113.12 ॥

gandharvāṇāmṛṣīṇāṁ ca surāṇāṁ ca mahātmanām ।
bhayaṁ yena mahaddattaṁ so 'yaṁ śete raṇe hataḥ ।
6.113.13 ॥

asurebhyaḥ surebhyo vā pannagebhyo 'pi vā tathā ।
na bhayaṁ yo vijānāti tasyedaṁ mānuṣādbhayam ।
6.113.14 ॥

avadhyo devatānāṁ yastathā dānavarakṣasām ।
hataḥ so 'yaṁ raṇe śete mānuṣeṇa padātinā ।
6.113.15 ॥

yo na śakyaḥ surairhantuṁ na yakṣairnāsuraistathā ।
so 'yaṁ kaścidivāsattvo mṛtyuṁ martyena lambhitaḥ ।
6.113.16 ॥

evaṁ vadantyo bahudhā rurudustasya tāḥ striyaḥ ।
bhūya eva ca duḥkhārtā vilepuśca punaḥpunaḥ ।
6.113.17 ॥

aśṛṇvatā ca suhṛdāṁ satataṁ hitavādinām ।
maraṇāyāhṛtā sītā ghātitāśca niśācarāḥ ।
6.113.18 ॥

etāḥ samamidānīṁ te vayamātmā ca pātitāḥ ।
bruvāṇo 'pi hitaṁ vākyamiṣṭo bhrātā vibīṣaṇaḥ ।
dhṛṣṭaṁ paruṣito mohāttvayā ' 'tmavadhakāṅkṣiṇā ।
6.113.19 ॥

yadi niryātitā te syāt sītā rāmāya maithilī ।
na naḥ syād vyasanaṁ ghoramidaṁ mūlaharaṁ mahat ।
6.113.20 ॥

vṛttakāmo bhavedbhrātā rāmo mitrakulaṁ bhavet ।
vayaṁ cāvidhavāḥ sarvāḥ sakāmā na ca śatravaḥ ।
6.113.21 ॥

tvayā punarnṛśaṁsena sītāṁ saṁrundhatā balāt ।
rākṣasā vayamātmā ca trayaṁ tulyaṁ nipātitam ।
6.113.22 ॥

na kāmakāraḥ kāmaṁ vā tava rākṣasapuṅgava ।
daivaṁ ceṣṭayate sarvaṁ hataṁ daivena hanyate ।
6.113.23 ॥

vānarāṇāṁ vināśo 'yaṁ rakṣasāṁ ca mahāhave ।
tava caiva mahābāho daivayogādupāgataḥ ।
6.113.24 ॥

naivārthena na kāmena vikrameṇa na cājñayā ।
śakyā daivagatirloke nivartayitumudyatā ।
6.113.25 ॥

vilepurevaṁ dīnāstā rākṣasādhipayoṣitaḥ ।
kurarya iva duḥkhārtā bāṣpaparyākulekṣaṇāḥ ।
6.113.26 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe trayodaśottaraśatatamaḥ sargaḥ ।
113 ॥