युद्धकाण्डम्Yuddha Kāṇḍa

bhrātaraṁ nihataṁ dṛṣṭvā śayānaṁ rāmanirjitam ।
śokavegaparītātmā vilalāpa vibhīṣaṇaḥ ।
6.112.1 ॥

vīra vikrānta vikhyāta vinīta nayakovida ।
mahārhaśayanopeta kiṁ śeṣe 'dya hato bhuvi ।
6.112.2 ॥

vikṣipya dīrghau niśceṣṭau bhujāvaṅgadabhūṣitau ।
mukuṭenāpavṛttena bhāskarākāravarcasā ।
6.112.3 ॥

tadidaṁ vīra samprāptaṁ mayā pūrvaṁ samīritam ।
kāmamohaparītasya yatte na rucitaṁ vacaḥ ।
6.112.4 ॥

yanna darpāt prahasto vā nendrajinnāpare janāḥ ।
na kumbhakarṇo 'tiratho nātikāyo narāntakaḥ ।
na svayaṁ tvamamanyethāstasyodarko 'yamāgataḥ ।
6.112.5 ॥

gataḥ setuḥ sunītānāṁ gato dharmasya vigrahaḥ ।
gataḥ sattvasya saṅkṣepaḥ prastāvānāṁ gatirgatā ।
6.112.6 ॥

ādityaḥ patito bhūmau magnastamasi candramāḥ ।
6.112.7 ॥

citrabhānuḥ praśāntārcirvyavasāyo nirudyamaḥ ।
asminnipatite bhūmau vīre śastrabhṛtāṁ vare ।
6.112.8 ॥

kiṁ śeṣamiva lokasya hatavīrasya sāmpratam ।
raṇe rākṣasaśārdūle prasupta iva pāṁsuṣu ।
6.112.9 ॥

dhṛtipravālaḥ prasahāgryapuṣpastapobalaḥ śauryanibaddhamūlaḥ ।
raṇe mahān rākṣasarājavṛkṣaḥ sammardito rāghavamārutena ।
6.112.10 ॥

tejoviṣāṇaḥ kulavaṁśavaṁśaḥ kopaprasādāparagātrahastaḥ ।
ikṣvākusiṁhāvagṛhītadehaḥ suptaḥ kṣitau rāvaṇagandhahastī ।
6.112.11 ॥

parākramotsāhavijṛmbhitārcirniśvāsadhūmaḥ svabalapratāpaḥ ।
pratāpavān saṁyati rākṣasāgnirnirvāpito rāmapayodhareṇa ।
6.112.12 ॥

siṁharkṣalāṅgūlakakudviṣāṇaḥ parābhijidgandhanagandhahastī ।
rakṣovṛṣaścāpalakarṇacakṣuḥ kṣitīśvaravyāghrahato 'vasannaḥ ।
6.112.13 ॥

vadantaṁ hetumadvākyaṁ parimṛṣṭārthaniścayam ।
rāmaḥ śokasamāviṣṭamityuvāca vibhīṣaṇam ।
6.112.14 ॥

nāyaṁ vinaṣṭo niśceṣṭaḥ samare caṇḍavikramaḥ ।
atyunnatamahotsāhaḥ patito 'yamaśaṅkitaḥ ।
6.112.15 ॥

naivaṁ vinaṣṭāḥ śocyante kṣatradharmamavasthitāḥ ।
vṛddhimāśaṁsamānā ye nipatanti raṇājire ।
6.112.16 ॥

yena sendrāstrayo lokāstrāsitā yudhi dhīmatā ।
tasmin kālasamāyukte na kālaḥ pariśocitum ।
6.112.17 ॥

naikāntavijayo yuddhe bhūtapūrvaḥ kadācana ।
parairvā hanyate vīraḥ parān vā hanti saṁyuge ।
6.112.18 ॥

iyaṁ hi pūrvaiḥ sandiṣṭā gatiḥ kṣatriyasammatā ।
kṣatriyo nihataḥ saṅkhye na śocya iti niścaya ।
6.112.19 ॥

tadevaṁ niścayaṁ dṛṣṭvā tattvamāsthāya vijvaraḥ ।
yadihānantaraṁ kāryaṁ kalpyaṁ tadanucintaya ।
6.112.20 ॥

tamuktavākyaṁ vikrāntaṁ rājaputraṁ vibhīṣaṇaḥ ।
uvāca śokasantapto bhrāturhitamanantaram ।
6.112.21 ॥

yo 'yaṁ vimardeṣu na bhagnapūrvaḥ suraiḥ sametaiḥ saha vāsavena ।
bhavantamāsādya raṇe vibhagno velāmivāsādya yathā samudraḥ ।
6.112.22 ॥

anena dattāni supūjitāni bhuktāśca bhogā nibhṛtāśca bhṛtyāḥ ।
dhanāni mitreṣu samarpitāni vairāṇyamitreṣu ca yāpitāni ।
6.112.23 ॥

eṣohitāgniśca mahātapāśca vedāntagaḥ karmasu cāgryavīryaḥ ।
etasya yat pretagatasya kṛtyaṁ tat kartumicchāmi tava prasādāt ।
6.112.24 ॥

sa tasya vākyaiḥ karuṇairmahātmā sambodhitaḥ sādhu vibhīṣaṇena ।
ājñāpayāmāsa narendrasūnuḥ svargīyamādhānamadīnasattvaḥ ।
6.112.25 ॥

maraṇāntāni vairāṇi nirvṛttaṁ naḥ prayojanam ।
kriyatāmasya saṁskāro mamāpyeṣa yathā tava ।
6.112.26 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe dvādaśottaraśatatamaḥ sargaḥ ।
112 ॥