युद्धकाण्डम्Yuddha Kāṇḍa

atha saṁsmārayāmāsa rāghavaṁ mātalistadā ।
ajānanniva kiṁ vīra tvamenamanuvartase ।
6.111.1 ॥

visṛjāsmai vadhāya tvamastraṁ paitāmahaṁ prabho ।
vināśakālaḥ kathito yaḥ suraiḥ so 'dya vartata ।
6.111.2 ॥

tataḥ saṁsmārito rāmastena vākyena mātaleḥ ।
jagrāha saśaraṁ dīptaṁ niśvasantamivoragam ।
6.111.3 ॥

yamasmai prathamaṁ prādādagastyo bhagavānṛṣiḥ ।
brahmadattaṁ mahābāṇamamoghaṁ yudhi vīryavān ।
6.111.4 ॥

brahmaṇā nirmitaṁ pūrvamindrārthamamitaujasā ।
dattaṁ surapateḥ pūrvaṁ trilokajayakāṅkṣiṇaḥ ।
6.111.5 ॥

yasya vājeṣu pavanaḥ phale pāvakabhāskarau ।
śarīramākāśamayaṁ gaurave merumandarau ।
6.111.6 ॥

jājvalyamānaṁ vapuṣā supuṅkhaṁ hemabhūṣitam ।
tejasā sarvabhūtānāṁ kṛtaṁ bhāskaravarcasam ।
6.111.7 ॥

sadhūmamiva kālāgniṁ dīptamāśīviṣaṁ yathā ।
paranāgāśvavṛndānāṁ bhedanaṁ kṣiprakāriṇam ।
6.111.8 ॥

dvārāṇāṁ parighāṇāṁ ca girīṇāmapi bhedanam ।
nānārudhirasiktāṅgaṁ medodigdhaṁ sudāruṇam ।
6.111.9 ॥

vajrasāraṁ mahānādaṁ nānāsamitidāraṇam ।
sarvavitrāsanaṁ bhīmaṁ śvasantamiva pannagam ।
6.111.10 ॥

kaṅkagṛdhravalānāṁ ca gomāyugaṇarakṣasām ।
nityaṁ bhakṣyapradaṁ yuddhe yamarūpaṁ bhayāvaham ।
6.111.11 ॥

nandanaṁ vānarendrāṇāṁ rakṣasāmavasādanam ।
vājitaṁ vividhairvājaiścārucitrairgarutmataḥ ।
6.111.12 ॥

tamuttameṣuṁ lokānāmikṣvākubhayanāśanam ।
dviṣatāṁ kīrtiharaṇaṁ praharṣakaramātmanaḥ ।
6.111.13 ॥

abhimantrya tato rāmastaṁ maheṣuṁ mahābalaḥ ।
vedaproktena vidhinā sandadhe kārmuke balī ।
6.111.14 ॥

tasmin sandhīyamāne tu rāghaveṇa śarottame ।
sarvabhūtāni vitresuścacāla ca vasundharā ।
6.111.15 ।
sa rāvaṇāya saṅkruddho bhṛśamāyamya kārmukam ।
cikṣepa paramāyattastaṁ śaraṁ marmaghātinam ।
6.111.16 ॥

sa vajra iva durdharṣo vajribāhuvisarjitaḥ ।
kṛtānta iva cāvāryo nyapatadrāvaṇorasi ।
6.111.17 ॥

sa visṛṣṭo mahāvegaḥ śarīrāntakaraḥ śaraḥ ।
bibheda hṛdayaṁ tasya rāvaṇasya durātmanaḥ ।
6.111.18 ॥

rudhirāktaḥ sa vegena jīvitāntakaraḥ śaraḥ ।
rāvaṇasya haran prāṇān viveśa dharaṇītalam ।
6.111.19 ॥

sa śaro rāvaṇaṁ hatvā rudhirārdīkṛtacchaviḥ ।
kṛtakarmā nibhṛtavat svatūṇīṁ punarāgamat ।
6.111.20 ॥

tasya hastāddhatasyāśu kārmukaṁ tat sasāyakam ।
nipapāta saha prāṇairbhraśyamānasya jīvitāt ।
6.111.21 ॥

gatāsurbhīmavegastu nairṛtendro mahādyutiḥ ।
papāta syandanādbhūmau vṛtro vajrahato yathā ।
6.111.22 ॥

taṁ dṛṣṭvā patitaṁ bhūmau hataśeṣā niśācarāḥ ।
hatanāthā bhayatrastāḥ sarvataḥ sampradudruvuḥ ।
6.111.23 ॥

nardantaścābhipetustān vānarā drumayodhinaḥ ।
6.111.24 ॥

daśagrīvavadhaṁ dṛṣṭvā vijayaṁ rāghavasya ca ।
arditā vānarairhṛṣṭairlaṅkāmabhyapatan bhayāt ।
gatāśrayatvāt karuṇairbāṣpaprasravaṇairmukhaiḥ ।
6.111.25 ॥

tato vineduḥ saṁhṛṣṭā vānarā jitakāśinaḥ ।
vadanto rāghavajayaṁ rāvaṇasya ca tadvadham ।
6.111.26 ॥

athāntarikṣe vyanadat saumyastridaśadundubhiḥ ।
divyagandhavahastatra mārutaḥ sasukho vavau ।
6.111.27 ॥

nipapātāntarikṣācca puṣpavṛṣṭistadā bhuvi ।
kirantī rāghavarathaṁ duravāpā manoramā ।
6.111.28 ॥

rāghavastavasaṁyuktā gagane 'pi ca śuśruve ।
sādhu sādhviti vāgagryā daivatānāṁ mahātmanām ।
6.111.29 ॥

āviveśa mahāharṣo devānāṁ cāraṇaiḥ saha ।
rāvaṇe nihate raudre sarvalokabhayaṅkare ।
6.111.30 ॥

tataḥ sakāmaṁ sugrīvamaṅgadaṁ ca mahābalam ।
cakāra rāghavaḥ prīto hatvā rākṣasapuṅgavam ।
6.111.31 ॥

tataḥ prajagmuḥ praśamaṁ marudgaṇā diśaḥ prasedurvimalaṁ nabho 'bavat ।
mahī cakampe na hi māruto vavau sthiraprabhaścāpyabhavaddivākaraḥ ।
6.111.32 ॥

tatastu sugrīvavibhīṣaṇādayaḥ suhṛdviśeṣāḥ sahalakṣmaṇāstadā ।
sametya hṛṣṭā vijayena rāghavaṁ raṇe 'bhirāmaṁ vidhinā hyapūjayan ।
6.111.33 ॥

sa tu nihataripuḥ sthirapratijñaḥ svajanabalābhivṛto raṇe rarāja ।
raghukulanṛpanandano mahaujāstridaśagaṇairabhisaṁvṛto yathendraḥ ।
6.111.34 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe ekādaśottaraśatatamaḥ sargaḥ ।
111 ॥