युद्धकाण्डम्Yuddha Kāṇḍa

tau tadā yuddhyamānau tu samare rāmarāvaṇau ।
dadṛśuḥ sarvabhūtāni vismitenāntarātmanā ।
6.110.1 ॥

ardayantau tu samare tayostau syandanottamau ।
parasparamabhikruddhau parasparamabhidrutau ।
6.110.2 ॥

parasparavadhe yuktau ghorarūpau babhūvatuḥ ।
maṇḍalāni ca vīthīśca gatapratyāgatāni ca ।
darśayantau bahuvidhāṁ sūtasārathyajāṁ gatim ।
6.110.3 ॥

ardayan rāvaṇaṁ rāmo rāghavaṁ cāpi rāvaṇaḥ ।
gativegaṁ samāpannau pravartananivartane ।
6.110.4 ॥

kṣipatoḥ śarajālāni tayostau syandanottamau ।
ceratuḥ saṁyugamahīṁ sāsārau jaladau yathā ।
6.110.5 ॥

darśayitvā tathā tau tu gatiṁ bahuvidhāṁ raṇe ।
parasparasyābhimukhau punarevāvatasthatuḥ ।
6.110.6 ॥

dhuraṁ dhureṇa rathayorvaktraṁ vaktreṇa vājinām ।
patākāśca patākābhiḥ sameyuḥ sthitayostadā ।
6.110.7 ॥

rāvaṇasya tato rāmo dhanurmuktaiḥ śitaiḥ śaraiḥ ।
caturbhiścaturo dīptairhayān pratyapasarpayat ।
6.110.8 ॥

sa krodhavaśamāpanno hayānāmapasarpaṇe ।
mumoca niśitān bāṇān rāghavāya niśācaraḥ ।
6.110.9 ॥

so 'tividdho balavatā daśagrīveṇa rāghavaḥ ।
jagāma na vikāraṁ ca na cāpi vyathito 'bhavat ।
6.110.10 ॥

cikṣepa ca punarbāṇān vajrapātasamasvanān ।
sārāthiṁ vajrahastasya samuddiśya niśācaraḥ ।
6.110.11 ॥

mātalestu mahāvegāḥ śarīre patitāḥ śarāḥ ।
na sūkṣmamapi sammohaṁ vyathāṁ vā pradaduryudhi ।
6.110.12 ॥

tayā dharṣaṇayā kruddho mātalerna tathā ' 'tmanaḥ ।
cakāra śarajālena rāghavo vimukhaṁ ripum ।
6.110.13 ॥

viṁśataṁ triṁśataṁ ṣaṣṭiṁ śataśo 'tha sahasraśaḥ ।
mumoca rāghavo vīraḥ sāyakān syandane ripoḥ ।
6.110.14 ॥

rāvaṇo 'pi tataḥ kruddho rathastho rākṣaseśvaraḥ ।
gadāmusalavarṣeṇa rāmaṁ pratyardayadraṇe ।
6.110.15 ॥

tatpravṛttaṁ mahadyuddhaṁ tumulaṁ romaharṣaṇam ।
6.110.16 ॥

gadānāṁ musalānāṁ ca parighāṇāṁ ca nisvanaiḥ ।
śarāṇāṁ puṅkhapātaiśca kṣubhitāḥ sapta sāgarāḥ ।
6.110.17 ॥

kṣubdhānāṁ sāgarāṇāṁ ca pātālatalavāsinaḥ ।
vyathitāḥ pannagāḥ sarve dānavāśca sahasraśaḥ ।
6.110.18 ॥

cakampe medinī kṛtsnā saśailavanakānanā ।
bhāskaro niṣprabhaścāsīnna vavau cāpi mārutaḥ ।
6.110.19 ॥

tato devāḥ sagandharvāḥ siddhāśca paramarṣayaḥ ।
cintāmāpedire sarve sakinnaramahoragāḥ ।
6.110.20 ॥

svasti gobrāhmaṇebhyastu lokāstiṣṭhantu śāśvatāḥ ।
jayatāṁ rāghavaḥ saṅkhye rāvaṇaṁ rākṣaseśvaram ।
6.110.21 ॥

evaṁ japanto 'paśyaṁste devāḥ sarṣigaṇāstadā ।
rāmarāvaṇayoryuddhaṁ sughoraṁ romaharṣaṇam ।
6.110.22 ॥

gandharvāpsarasāṁ saṅghā dṛṣṭvā yuddhamanūpamam ।
6.110.23 ॥

gaganaṁ gaganākāraṁ sāgaraḥ sāgaropamaḥ ।
rāmarāvaṇayoryuddhaṁ rāmarāvaṇayoriva ।
evaṁ bruvanto dadṛśustadyuddhaṁ rāmarāvaṇam ।
6.110.24 ॥

tataḥ kruddho mahābāhū raghūṇāṁ kīrtivardhanaḥ ।
sandhāya dhanuṣā rāmaḥ kṣuramāśīviṣopamam ।
6.110.25 ॥

rāvaṇasya śiro 'cchindacchrīmajjvalitakuṇḍalam ।
tacchiraḥ patitaṁ bhūmau dṛṣṭvaṁ lokaistribhistadā ।
6.110.26 ॥

tasyaiva sadṛśaṁ cānyadrāvaṇasyotthitaṁ śiraḥ ।
tat kṣipraṁ kṣiprahastena rāmeṇa kṣiprakāriṇā ।
6.110.27 ॥

dvitīyaṁ rāvaṇaśiraśchinnaṁ saṁyati sāyakaiḥ ।
chinnamātraṁ tu tacchīrṣaṁ punaranyat sma dṛśyate ।
6.110.28 ॥

tadapyaśanisaṅkāśaiśchinnaṁ rāmeṇa sāyakaiḥ ।
evamekaśataṁ chinnaṁ śirasāṁ tulyavarcasām ।
6.110.29 ॥

na caiva rāvaṇasyānto dṛśyate jīvitakṣaye ।
6.110.30 ॥

tataḥ sarvāstravidvīraḥ kausalyānandavardhanaḥ ।
mārgaṇairbahubhiryuktaścintayāmāsa rāghavaḥ ।
6.110.31 ॥

mārīco nihato yaistu kharo yaistu sadūṣaṇaḥ ।
krauñcāvane virādhastu kabandho daṇḍakāvane ।
6.110.32 ॥

yaiḥ sālā girayo bhagnā vālī ca kṣubhito 'mbudhiḥ ।
ta ime sāyakāḥ sarve yuddhe prātyayikā mama ।
kiṁ nu tatkāraṇaṁ yena rāvaṇe mandatejasaḥ ।
6.110.33 ॥

iti cintāparaścāsīdapramattaśca saṁyuge ।
vavarṣa śaravarṣāṇi rāghavo rāvaṇorasi ।
6.110.34 ।
ā mama ।
rāvaṇo 'pi tataḥ kruddho rathastho rākṣaseśvaraḥ ।
gadāmusalavarṣeṇa rāmaṁ pratyardayadraṇe ।
6.110.35 ॥

tat pravṛttaṁ mahadyuddhaṁ tumulaṁ romaharṣaṇam ।
antarikṣe ca bhūmau ca punaśca girimūrdhani ।
6.110.36 ॥

devadānavayakṣāṇāṁ piśācoragarakṣasām ।
paśyatāṁ tanmahadyuddhaṁ sarvarātramavartata ।
6.110.37 ॥

naiva rātraṁ na divasaṁ na muhūrtaṁ na ca kṣaṇam ।
rāmarāvaṇayoryuddhaṁ virāmamupagacchati ।
6.110.38 ॥

daśarathasutarākṣasendrayorjayamanavekṣya raṇe sa rāghavasya ।
suravararathasārathirmahān raṇagatamenamuvāca vākyamāśu ।
6.110.39 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe daśottaraśatatamaḥ sargaḥ ।
110 ॥