युद्धकाण्डम्Yuddha Kāṇḍa

tataḥ pravṛttaṁ sukrūraṁ rāmarāvaṇayostadā ।
sumahaddvairathaṁ yuddhaṁ sarvalokabhayāvaham ।
6.109.1 ॥

tato rākṣasasainyaṁ ca harīṇāṁ ca mahadbalam ।
pragṛhītapraharaṇaṁ niśceṣṭaṁ samatiṣṭhata ।
6.109.2 ॥

samprayuddhau tato dṛṣṭvā balavannararākṣasau ।
vyākṣiptahṛdayāḥ sarve paraṁ vismayamāgatāḥ ।
6.109.3 ॥

nānāpraharaṇairvyagrairbhujairvismitabuddhayaḥ ।
sarpantaṁ prekṣya saṅgrāmaṁ nābhijagmuḥ parasparam ।
6.109.4 ॥

rakṣasāṁ rāvaṇaṁ cāpi vānarāṇāṁ ca rāghavam ।
paśyatāṁ vismitākṣāṇāṁ sainyaṁ citramivābabhau ।
6.109.5 ॥

tau tu tatra nimittāni dṛṣṭvā rāvaṇarāghavau ।
kṛtabuddhī sthirāmarṣau yuyudhāte byabhītavat ।
6.109.6 ॥

jetavyamiti kākutstho martavyamiti rāvaṇaḥ ।
dhṛtau svavīryasarvasvaṁ yuddhe 'darśayatāṁ tadā ।
6.109.7 ॥

tataḥ krodhāddaśagrīvaḥ śarān sandhāya vīryavān ।
mumoca dhvajamuddiśya rāghavasya rathe sthitam ।
6.109.8 ॥

te śarāstamanāsādya purandararathadhvajam ।
rathaśaktiṁ parāmṛśya nipeturdharaṇītale ।
6.109.9 ॥

tato rāmo 'bhisaṅkruddhaścāpamāyamya vīryavān ।
kṛtapratikṛtaṁ kartuṁ manasā sampracakrame ।
6.109.10 ॥

rāvaṇadhvajamuddiśya mumoca niśitaṁ śaram ।
mahāsarpamivāsahyaṁ jvalantaṁ svena tejasā ।
6.109.11 ॥

jagāma sa mahīṁ chittvā daśagrīvadhvajaṁ śaraḥ ।
sa nikṛtto 'patadbhūmau rāvaṇasya rathadhvajaḥ ।
6.109.12 ॥

dhvajasyonmathanaṁ dṛṣṭvā rāvaṇaḥ sumahābalaḥ ।
sampradīpto 'bhavat krodhādamarṣāt pradahanniva ।
6.109.13 ॥

sa roṣavaśamāpannaḥ śaravarṣaṁ mahadvaman ।
rāmasya turagān dīptaiḥ śarairvivyādha rāvaṇaḥ ।
6.109.14 ॥

te viddhā harayastatra nāskhalannāpi babhramuḥ ।
babhūvuḥ svasthahṛdayāḥ padmanālairivāhatāḥ ।
6.109.15 ॥

teṣāmasambhramaṁ dṛṣṭvā vājināṁ rāvaṇastadā ।
bhūya eva susaṅkruddhaḥ śaravarṣaṁ mumoca ha ।
6.109.16 ॥

gadāśca parighāścaiva cakrāṇi musalāni ca ।
giriśṛṅgāṇi vṛkṣāṁśca tathā śūlaparaśvadhān ।
6.109.17 ॥

māyāvihitametattu śastravarṣamapātayat ।
tumulaṁ trāsajananaṁ bhīmaṁ bhīmapratisvanam ।
6.109.18 ॥

tadvarṣamabhavadyuddhe naikaśastramayaṁ mahat ।
vimucya rāghavarathaṁ samāntādvānare bale ।
6.109.19 ॥

sāyakairantarikṣaṁ ca cakārāśu nirantaram ।
sahasraśastato bāṇānaśrāntahṛdayodyamaḥ ।
mumoca ca daśagrīvo nissaṅgenā 'ntarātmanā ।
6.109.20 ॥

vyāyacchamānaṁ taṁ dṛṣṭvā tatparaṁ rāvaṇaṁ raṇe ।
prahasanniva kākutsthaḥ sandadhe sāyakān śitān ।
6.109.21 ॥

sa mumoca tato bāṇān raṇe śatasahasraśaḥ ।
tān dṛṣṭvā rāvaṇaścakre svaśaraiḥ khaṁ nirantaram ।
6.109.22 ॥

tatastābhyāṁ pramuktena śaravarṣeṇa bhāsvatā ।
śarabaddhamivābhāti dvitīyaṁ bhāsvadambaram ।
6.109.23 ॥

nānimitto 'bhavadbāṇo nātibhettā na niṣphalaḥ ।
6.109.24 ॥

anyonyamabhisaṁhatya nipeturdharaṇītale ।
tathā visṛjatorbāṇān rāmarāvaṇayormṛdhe ।
6.109.25 ॥

prāyuddhyatāmavicchinnamasyantau savyadakṣiṇam ।
cakratuśca śaraughaistau nirucchvāsamivāmbaram ।
6.109.26 ॥

rāvaṇasya hayān rāmo hayān rāmasya rāvaṇaḥ ।
jaghnatustau tathā 'nyonyaṁ kṛtānukṛtakāriṇau ।
6.109.27 ॥

evaṁ tau tu susaṅkruddhau cakraturyuddhamadbhutam ।
muhūrtamabhavadyuddhaṁ tumulaṁ romaharṣaṇam ।
6.109.28 ॥

prayudhyamānau samare mahābalau śitaiḥ śarai rāvaṇalakṣmaṇāgrajau ।
dhvajāvapātena sa rākṣasādhipo bhṛśaṁ pracukrodha tadā raghūttame ।
6.109.29 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe navottaraśatatamaḥ sargaḥ ।
109 ॥