युद्धकाण्डम्Yuddha Kāṇḍa

sa rathaṁ sārathirhṛṣṭaḥ parasainyapradharṣaṇam ।
gandharvanagarākāraṁ samucchritapatākinam ।
6.108.1 ॥

yuktaṁ paramasampannairvājibhirhemamālibhiḥ ।
yuddhopakaraṇaiḥ pūrṇaṁ patākādhvajamālinam ।
6.108.2 ॥

grasantamiva cākāśaṁ nādayantaṁ vasundharām ।
praṇāśaṁ parasainyānāṁ svasainyānāṁ praharṣaṇam ।
rāvaṇasya rathaṁ kṣipraṁ codayāmāsa sārathiḥ ।
6.108.3 ॥

tamāpatantaṁ sahasā svanavantaṁ mahāsvanam ।
rathaṁ rākṣasarājasya nararājo dadarśa ha ।
6.108.4 ।
kṛṣṇavājisamāyuktaṁ yuktaṁ raudreṇa varcasā ।
taḍitpatākāgahanaṁ darśitendrāyudhāyudham ।
6.108.5 ॥

śaradhārā vimuñcantaṁ dhārāsāramivāmbudam ।
taṁ dṛṣṭvā meghasaṅkāśamāpatantaṁ rathaṁ ripoḥ ।
6.108.6 ॥

girairvajrābhimṛṣṭasya dīryataḥ sadṛśasvanam ।
visphārayan vai vegena bālacandranataṁ dhanuḥ ।
6.108.7 ॥

uvāca mātaliṁ rāmaḥ sahasrākṣasya sārathim ।
6.108.8 ॥

mātale paśya saṁrabdhamāpatantaṁ rathaṁ ripoḥ ।
6.108.9 ॥

yathā ' 'pasavyaṁ patatā vegena mahatā punaḥ ।
samare hantumātmānaṁ tathā tena kṛtā matiḥ ।
6.108.10 ॥

tadapramādamātiṣṭhan pratyudgaccha rathaṁ ripoḥ ।
vidhvaṁsayitumicchāmi vāyurmeghamivotthitam ।
6.108.11 ॥

aviklavamasambhrāntamavyagrahṛdayekṣaṇam ।
raśmisañcāraniyataṁ pracodaya rathaṁ drutam ।
6.108.12 ॥

kāmaṁ na tvaṁ samādheyaḥ purandararathocitaḥ ।
yuyutsurahamekāgraḥ smāraye tvāṁ na śikṣaye ।
6.108.13 ॥

parituṣṭaḥ sa rāmasya tena vākyena mātaliḥ ।
pracodayāmāsa rathaṁ surasārathisattamaḥ ।
6.108.14 ॥

apasavyaṁ tataḥ kurvan rāvaṇasya mahāratham ।
cakrotkṣiptena rajasā rāvaṇaṁ vyavadhānayat ।
6.108.15 ॥

tataḥ kruddho daśagrīvastāmravisphāritekṣaṇaḥ ।
rathapratimukhaṁ rāmaṁ sāyakairavadhūnayat ।
6.108.16 ॥

dharṣaṇāmarṣito rāmo dhairyaṁ roṣeṇa lambhayan ।
jagrāha sumahāvegamaindraṁ yudhi śarāsanam ।
śarāṁśca sumahātejāḥ sūryaraśmisamaprabhān ।
6.108.17 ॥

tadopoḍhaṁ mahadyuddhamanyonyavadhakāṅkṣiṇoḥ ।
parasparābhimukhayordṛptayoriva siṁhayoḥ ।
6.108.18 ॥

tato devāḥ sagandharvāḥ siddhāśca paramarṣayaḥ ।
sameyurdvairathaṁ dṛṣṭuṁ rāvaṇakṣayakāṅkṣiṇaḥ ।
6.108.19 ॥

samutpeturathotpātā dāruṇā romaharṣaṇāḥ ।
rāvaṇasya vināśāya rāghavasya jayāya ca ।
6.108.20 ॥

vavarṣa rudhiraṁ devo rāvaṇasya rathopari ।
vātā maṇḍalinastīkṣṇā hyapasavyaṁ pracakramuḥ ।
6.108.21 ॥

mahad gṛdhrakulaṁ cāsya bhramamāṇaṁ nabhassthale ।
yena yena ratho yāti tena tena pradhāvati ।
6.108.22 ॥

sandhyayā cāvṛtā laṅkā japāpuṣpanikāśayā ।
dṛśyate sampradīpteva divase 'pi vasundharā ।
6.108.23 ॥

sanirghātā maholkāśca sampracerurmahāsvanāḥ ।
viṣādayaṁste rakṣāṁsi rāvaṇasya tadā 'hitāḥ ।
6.108.24 ॥

rāvaṇaśca yatastatra sañcacāla vasundharā ।
rakṣasāṁ ca praharatāṁ gṛhītā iva bāhavaḥ ।
6.108.25 ॥

tāmrāḥ pītāḥ sitāśvetāḥ patitāḥ sūryaraśmayaḥ ।
dṛśyante rāvaṇasyāṅge parvatasyeva dhātavaḥ ।
6.108.26 ॥

gṛdhrairanugatāścāsya vamantyo jvalanaṁ mukhaiḥ ।
praṇedurmukhamīkṣantyaḥ saṁrabdhamaśivaṁ śivāḥ ।
6.108.27 ॥

pratikūlaṁ vavau vāyū raṇe pāṁsūn samākiran ।
tasya rākṣasarājasya kurvan dṛṣṭivilopanam ।
6.108.28 ॥

nipeturindrāśanayaḥ sainye cāsya samantataḥ ।
durviṣahyasvanā ghorā vinā jaladharasvanam ।
6.108.29 ॥

diśaśca pradiśaḥ sarvā babhūvustimirāvṛtāḥ ।
pāṁsuvarṣeṇa mahatā durdarśaṁ ca nabho 'bhavat ।
6.108.30 ॥

kurvantyaḥ kalahaṁ ghoraṁ śārikāstadrathaṁ prati ।
nipetuḥ śataśastatra dāruṇaṁ dāruṇārutāḥ ।
6.108.31 ॥

jaghanebhyaḥ sphuliṅgāṁśca netrebhyo 'śrūṇi santatam ।
mumucustasya turagāstulyamagniṁ ca vāri ca ।
6.108.32 ॥

evamprakārā bahavaḥ samutpātā bhayāvahāḥ ।
rāvaṇasya vināśāya dāruṇāḥ samprajajñire ।
6.108.33 ॥

rāmasyāpi nimittāni saumyāni ca śubhāni ca ।
babhūvurjayaśaṁsīni prādurbhūtāni sarvaśaḥ ।
6.108.34 ॥

nimittāni ca saumyāni rāghavaḥ svajayāya ca ।
dṛṣṭvā paramasaṁhṛṣṭo hataṁ mene ca rāvaṇam ।
6.108.35 ॥

tato nirīkṣyātmagatāni rāghavo raṇe nimittāni nimittakovidaḥ ।
jagāma harṣaṁ ca parāṁ ca nirvṛttiṁ cakāra yuddhe hyadhikaṁ ca vikramam ।
6.108.36 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe aṣṭottaraśatatamaḥ sargaḥ ।
108 ॥