युद्धकाण्डम्Yuddha Kāṇḍa

ādityahṛdayaprārambhaḥ ।
tato yuddhapariśrantaṁ samare cintayā sthitam ।
rāvaṇaṁ cāgrato dṛṣṭvā yuddhāya samupasthitam ।
6.107.1 ॥

daivataiśca samāgamya draṣṭumabhyāgato raṇam ।
upāgamyābravīdrāmamagastyo bhagavānṛṣiḥ ।
6.107.2 ॥

rāma rāma mahābāho śṛṇu guhyaṁ sanātanam ।
yena sarvānarīn vatsa samare vijayiṣyasi ।
6.107.3 ॥

ādityahṛdayaṁ puṇyaṁ sarvaśatruvināśanam ।
jayāvahaṁ japennityamakṣayyaṁ paramaṁ śivam ।
6.107.4 ॥

sarvamaṅgalamaṅgalyaṁ sarvapāpapraṇāśanam ।
cintāśokapraśamanamāyurvardhanamuttamam ।
6.107.5 ॥

raśmimantaṁ samudyantaṁ devāsuranamaskṛtam ।
pūjayasva vivasvantaṁ bhāskaraṁ bhuvaneśvaram ।
6.107.6 ॥

sarvadevātmako hyeṣa tejasvī raśmibhāvanaḥ ।
eṣa devāsuragaṇān lokān pāti gabhistibhiḥ ।
6.107.7 ॥

eṣa brahmā ca viṣṇuśca śivaḥ skandaḥ prajāpatiḥ ।
mahendro dhanadaḥ kālo yamaḥ somo hyapāṁ patiḥ ।
6.107.8 ॥

pitaro vasavaḥ sādhyā hyaśvinau maruto manuḥ ।
vāyurvahniḥ prajāpāṇa ṛtukartā prabhākaraḥ ।
6.107.9 ॥

ādityaḥ savitā sūryaḥ khagaḥ pūṣā gabhastimān ।
suvarṇasadṛśo bhānurhiraṇyaretā divākaraḥ ।
6.107.10 ॥

haridaśvaḥ sahasrārciḥ saptasaptirmarīcimān ।
timironmathanaḥ śambhustvaṣṭā mārtaṇḍa aṁśumān ।
6.107.11 ॥

hiraṇyagarbhaḥ śiśirastapano bhāskaro raviḥ ।
agnigarbho 'diteḥ putraḥ śaṅkhaḥ śiśiranāśanaḥ ।
6.107.12 ॥

vyomanāthastamobhedī ṛgyajussāmapāragaḥ ।
ghanavṛṣṭirapāṁ mitro vindhyavīthīplavaṅgamaḥ ।
6.107.13 ॥

ātapī maṇḍalī mṛtyuḥ piṅgalaḥ sarvatāpanaḥ ।
kavirviśvo mahātejā raktaḥ sarvabhavodbhavaḥ ।
6.107.14 ॥

nakṣatragrahatārāṇāmadhipo viśvabhāvanaḥ ।
tejasāmapi tejasvī dvādaśātmannamo 'stu te ।
6.107.15 ॥

namaḥ pūrvāya giraye paścime giraye namaḥ ।
jyotirgaṇānāṁ pataye dinādhipataye namaḥ ।
6.107.16 ॥

jayāya jayabhadrāya haryaśvāya namo namaḥ ।
namo namaḥ sahasrāṁśo ādityāya namo namaḥ ।
6.107.17 ॥

nama ugrāya vīrāya sāraṅgāya namo namaḥ ।
namaḥ padmaprabodhāya mārtāṇḍāya namo namaḥ ।
6.107.18 ॥

brahmośānācyuteśāya sūryāyādityavarcase ।
bhāsvate sarvabhakṣāya raudrāya vapuṣe namaḥ ।
6.107.19 ॥

tamoghnāya himadhnāya śatrughnāyāmitātmane ।
kṛtaghnaghnāya devāya jyotiṣāṁ pataye namaḥ ।
6.107.20 ॥

taptacāmīkarābhāya vahnaye viśvakarmaṇe ।
namastamobhinighnāya rucaye lokasākṣiṇe ।
6.107.21 ॥

nāśayatyeṣa vai bhūtaṁ tadeva sṛjati prabhuḥ ।
pāyatyeṣa tapatyeṣa varṣatyeṣa gabhastibhiḥ ।
6.107.22 ॥

eṣa supteṣu jāgarti bhūteṣu pariniṣṭhitaḥ ।
eṣa evāgnihotraṁ ca phalaṁ caivāgnihotriṇām ।
6.107.23 ॥

vedāśca kratavaścaiva kratūnāṁ phalameva ca ।
yāni kṛtyāni lokeṣu sarva eṣa raviḥ prabhuḥ ।
6.107.24 ॥

enamāpatsu kṛcchreṣu kāntāreṣu bhayeṣu ca ।
kīrtayan puruṣaḥ kaścinnāvasīdati rāghava ।
6.107.25 ॥

pūjayasvainamekāgro devadevaṁ jagatpatim ।
etatriguṇitaṁ japtvā yuddheṣu vijayiṣyasi ।
6.107.26 ॥

asmin kṣaṇe mahābāho rāvaṇaṁ tvaṁ vadhiṣyasi ।
evamuktvā tadā 'gastyo jagāma ca yathāgatam ।
6.107.27 ॥

etacchutvā mahātejā naṣṭaśoko 'bhavattadā ।
dhārayāmāsa suprīto rāghavaḥ prayatātmavān ।
6.107.28 ॥

ādityaṁ prekṣya japtvā tu paraṁ harṣamavāptavān ।
trirācamya śucirbhūtvā dhanurādāya vīryavān ।
6.107.29 ॥

rāvaṇaṁ prekṣya hṛṣṭātmā yuddhāya samupāgamat ।
sarvayatnena mahatā vadhe tasya dhṛto 'bhavat ।
6.107.30 ॥

atha raviravadannirīkṣya rāmaṁ muditamanāḥ paramaṁ prahṛṣyamāṇaḥ ।
niśicarapatisaṅkṣayaṁ viditvā suragaṇamadhyagato vacastvareti ।
6.107.31 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe saptottaraśatatamaḥ sargaḥ ।
107 ॥