युद्धकाण्डम्Yuddha Kāṇḍa

sa tena tu tathā krodhāt kākutsthenārdito raṇe ।
rāvaṇaḥ samaraślāghī mahākrodhamupāgamat ।
6.105.1 ॥

sa dīptanayano roṣāccāpamāyamya vīryavān ।
abhyardayat susaṅkruddho rāghavaṁ paramāhave ।
6.105.2 ॥

bāṇadhārāsahasraistaiḥ sa toyada ivāmbarāt ।
rāghavaṁ rāvaṇo bāṇaistaṭākamiva pūrayat ।
6.105.3 ॥

pūritaḥ śarajālena dhanurmuktena saṁyuge ।
mahāgiririvākampyaḥ kākutstho na prakampate ।
6.105.4 ॥

sa śaraiḥ śarajālāni vārayan samare sthitaḥ ।
gabhastīniva sūryasya pratijagrāha vīryavān ।
6.105.5 ॥

tataḥ śarasahasrāṇi kṣiprahasto niśācaraḥ ।
nijaghānorasi kruddho rāghavasya mahātmanaḥ ।
6.105.6 ॥

sa śoṇita samādigdhaḥ samare lakṣmaṇāgrajaḥ ।
dṛṣṭaḥ phulla ivāraṇye sumahān kiṁśukadrumaḥ ।
6.105.7 ॥

śarābhighātasaṁrabdhaḥ so 'pi jagrāha sāyakān ।
kākutsthaḥ sumahātejā yugāntādityatejasaḥ ।
6.105.8 ॥

tato 'yonyaṁ susaṁrabdhāvubhau tau rāmarāvaṇau ।
śarāndhakāre samare nopālakṣayatāṁ tadā ।
6.105.9 ॥

tataḥ krodhasamāviṣṭo rāmo daśarathātmajaḥ ।
uvāca rāvaṇaṁ vīraḥ prahasya paruṣaṁ vacaḥ ।
6.105.10 ॥

mama bhāryā janasthānādajñānādrākṣasādhama ।
hṛtā te vivaśā yasmāttasmāttvaṁ nāsi vīryavān ।
6.105.11 ॥

mayā virahitāṁ dīnāṁ vartamānāṁ mahāvane ।
vaidehīṁ prasabhaṁ hṛtvā śūro 'hamiti manyase ।
6.105.12 ॥

strīṣu śūra vināthāsu paradārābhimarśaka ।
kṛtvā kāpuruṣaṁ karma śūro 'hamiti manyase ।
6.105.13 ॥

bhinnamaryāda nirlajja cāritreṣvanavasthita ।
darpānmṛtyumupādāya śūro 'hamiti manyase ।
6.105.14 ॥

śūreṇa dhanadabhrātrā balaiḥ samuditena ca ।
ślāghanīyaṁ yaśasyaṁ ca kṛtaṁ karma mahattvayā ।
6.105.15 ॥

utsekenābhipannasya garhitasyāhitasya ca ।
karmaṇaḥ prāpnuhīdānīṁ tasyādya sumahat phalam ।
6.105.16 ॥

śūro 'hamiti cātmānamavagacchasi durmate ।
naiva lajjā 'sti te sītāṁ coravad vyapakarṣataḥ ।
6.105.17 ॥

yadi matsannidhau sītā dharṣitā syāttvayā balāt ।
bhrātaraṁ tu kharaṁ paśyestadā matsāyakairhataḥ ।
6.105.18 ॥

diṣṭyā 'si mama duṣṭātmaṁścakṣurviṣayamāgataḥ ।
adya tvāṁ sāyakaistīkṣṇairnayāmi yamasādanam ।
6.105.19 ॥

adya te maccharaiśchinnaṁ śiro jvalitakuṇḍalam ।
kravyādā vyapakarṣantu vikīrṇaṁ raṇapāṁsuṣu ।
6.105.20 ॥

nipatyorasi gṛdhrāste kṣitau kṣiptasya rāvaṇa ।
pibantu rudhiraṁ tarṣāccharaśalyāntarotthitam ।
6.105.21 ॥

adya madbāṇabhinnasya gatāsoḥ patitasya te ।
karṣantvantrāṇi patagā garutmanta ivoragān ।
6.105.22 ॥

ityevaṁ saṁvadan vīro rāmaḥ śatrunibarhaṇaḥ ।
rākṣasendraṁ samīpasthaṁ śaravarṣairavākirat ।
6.105.23 ॥

babhūva dviguṇaṁ vīryaṁ balaṁ harṣaśca saṁyuge ।
rāmasyāstrabalaṁ caiva śatrornidhanakāṅkṣiṇaḥ ।
6.105.24 ॥

prādurbabhūvurastrāṇi sarvāṇi viditātmanaḥ ।
praharṣācca mahātejāḥ śīghrahastataro 'bhavat ।
6.105.25 ॥

śubhānyetāni cihnāni vijñāyātmagatāni saḥ ।
bhūya evārdayadrāmo rāvaṇaṁ rākṣasāntakṛt ।
6.105.26 ॥

harīṇāṁ cāśmanikaraiḥ śaravarṣaiśca rāghavāt ।
hanyamāno daśagrīvo vighūrṇahṛdayo 'bhavat ।
6.105.27 ॥

yadā ca śastraṁ nārebhe na vyakarṣaccharāsanam ।
nāsya pratyakarodvīryaṁ viklevenāntarātmanā ।
6.105.28 ॥

kṣiptāścāpi śarāstena śastrāṇi vividhāni ca ।
na raṇārthāya vartante mṛtyukāle 'bhivartataḥ ।
6.105.29 ॥

sūtastu rathanetā 'sya tadavasthaṁ samīkṣya tam ।
śanairyuddhādasambhrānto rathaṁ tasyāpavāhayat ।
6.105.30 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe pañcottaraśatatamaḥ sargaḥ ।
105 ॥