युद्धकाण्डम्Yuddha Kāṇḍa

tasya kruddhasya vadanaṁ dṛṣṭvā rāmasya dhīmataḥ ।
sarvabhūtāni vitresuḥ prākampata ca medinī ।
6.104.1 ॥

siṁhaśārdūlavān śailaḥ sañcacāla caladrumaḥ ।
babhūva cātikṣubhitaḥ samudraḥ saritāṁ patiḥ ।
6.104.2 ॥

khagāśca kharanirghoṣā gagane paruṣā ghanāḥ ।
autpātikāni nardantaḥ samantāt paricakramuḥ ।
6.104.3 ॥

rāmaṁ dṛṣṭvā susaṅkruddhamutpātāṁśca sudāruṇān ।
vitresuḥ sarvabhūtāni rāvaṇasyābhavadbhayem ।
6.104.4 ॥

vimānasthāstadā devā gandharvāśca mahoragāḥ ।
ṛṣidānavadaityāśca garutmantaśca khecarāḥ ।
6.104.5 ॥

dadṛśuste mahāyuddhaṁ lokasaṁvartasaṁsthitam ।
nānāpraharaṇairbhīmaiḥ śūrayoḥ samprayuddhyatoḥ ।
6.104.6 ॥

ūcuḥ surāsurāḥ sarve tadā vigrahamāgatāḥ ।
prekṣamāṇā mahadyuddhaṁ vākyaṁ bhaktyā prahṛṣṭavat ।
6.104.7 ॥

daśagrīvaṁ jayetyāhurasurāḥ samavasthitāḥ ।
devā rāmamathocuste tvaṁ jayeti punaḥpunaḥ ।
6.104.8 ॥

etasminnantare krodhādrāghavasya sa rāvaṇaḥ ।
prahartukāmo duṣṭātmā spṛśan praharaṇaṁ mahat ।
6.104.9 ॥

vajrasāraṁ mahānādaṁ sarvaśatrunibarhaṇam ।
śailaśṛṅganibhaiḥ kūṭaiścitaṁ dṛṣṭibhayāvaham ।
6.104.10 ॥

sadhūmamiva tīkṣṇāgraṁ yugāntāgnicayopamam ।
atiraudramanāsādyaṁ kālenāpi durāsadam ।
6.104.11 ॥

trāsanaṁ sarvabhūtānāṁ dāraṇaṁ bhedanaṁ tadā ।
pradīptamiva roṣeṇa śūlaṁ jagrāha rāvaṇaḥ ।
6.104.12 ॥

tacchūlaṁ paramakruddho madhye jagrāha vīryavān ।
anekaiḥ samare śūrai rākṣasaiḥ parivāritaḥ ।
6.104.13 ॥

samudyamya mahākāyo nanāda yudhi bhairavam ।
saṁraktanayano roṣāt svasainyamabhiharṣayan ।
6.104.14 ॥

pṛthivīṁ cāntarikṣaṁ ca diśaśca pradiśastathā ।
prākampayattadā śabdo rākṣasendrasya dāruṇaḥ ।
6.104.15 ॥

atinādasya nādena tena tasya durātmanaḥ ।
sarvabhūtāni vitresuḥ sāgaraśca pracukṣubhe ।
6.104.16 ॥

sa gṛhītvā mahāvīryaḥ śūlaṁ tadrāvaṇo mahat ।
vinadya sumahānādaṁ rāmaṁ paruṣamabravīt ।
6.104.17 ॥

śūlo 'yaṁ vajrasāraste rāma roṣānmayodyataḥ ।
tava bhrātṛsahāyasya sadyaḥ prāṇān hariṣyati ।
6.104.18 ॥

rakṣasāmadya śūrāṇāṁ nihatānāṁ camūmukhe ।
tvāṁ nihatya raṇaślāghin karomi tarasā samam ।
tiṣṭhedānīṁ nihanmi tvāmeṣa śūlena rāghava ।
6.104.19 ॥

evamuktvā sa cikṣepa tacchūlaṁ rākṣasādhipaḥ ।
6.104.20 ॥

tadrāvaṇakarānmuktaṁ vidyujjvālāsamākulam ।
aṣṭaghaṇṭaṁ mahānādaṁ viyadgatamaśobhata ।
6.104.21 ॥

tacchūlaṁ rāghavo dṛṣṭvā jvalantaṁ ghoradarśanam ।
sasarja viśikhān rāmaścāpamāyamya vīryavān ।
6.104.22 ॥

āpatantaṁ śaraugheṇa vārayāmāsa rāghavaḥ ।
utpatantaṁ yugāntāgniṁ jalaughairiva vāsavaḥ ।
6.104.23 ॥

nirdadāha sa tān bāṇān rāmakārmukanissṛtān ।
rāvaṇasya mahāśūlaḥ pataṅgāniva pāvakaḥ ।
6.104.24 ॥

tān dṛṣṭvā bhasmasādbhūtān śūla saṁsparśacūrṇitān ।
sāyakānantarikṣasthān rāghavaḥ krodhamāharat ।
6.104.25 ॥

sa tāṁ mātalinā ' 'nītāṁ śaktiṁ vāsavanirmitām ।
jagrāha paramakruddho rāghavo raghunandanaḥ ।
6.104.26 ॥

sā tolitā balavatā śaktirghaṇṭākṛtasvanā ।
nabhaḥ prajvālayāmāsa yugāntolkeva saprabhā ।
6.104.27 ॥

sā kṣiptā rākṣasendrasya tasmin śūle papāta ha ।
bhinnaḥ śaktyā mahān śūlo nipapāta hatadyutiḥ ।
6.104.28 ॥

nirbibheda tato bāṇairhayānasya mahājavān ।
rāmastīkṣṇairmahāvegairvajrakalpaiḥ śitaiḥ śaraiḥ ।
6.104.29 ॥

nirbibhedorasi tato rāvaṇaṁ niśitaiḥ śaraiḥ ।
rāghavaḥ paramāyatto lalāṭe patribhistribhiḥ ।
6.104.30 ॥

sa śarairbhinnasarvāṅgo gātraprasrutaśoṇitaḥ ।
rākṣasendraḥ samūhasthaḥ phullāśoka ivābabhau ।
6.104.31 ॥

sa rāmabāṇairabhividdhagātro niśācarendraḥ kṣatajārdragātraḥ ।
jagāma khedaṁ ca samājamadhye krodhaṁ ca cakre subhṛśaṁ tadānīm ।
6.104.32 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe caturuttaraśatatamaḥ sargaḥ ।
104 ॥