युद्धकाण्डम्Yuddha Kāṇḍa

lakṣmaṇena tu tadvākyamuktaṁ śrutvā sa rāghavaḥ ।
sandadhe paravīraghno dhanurādāya vīryavān ।
rāvaṇāya śarān ghorān visasarja camūmukhe ।
6.103.1 ॥

athānyaṁ rathamāruhya rāvaṇo rākṣasādhipaḥ ।
abhyadravata kākutsthaṁ svarbhānuriva bhāskaram ।
6.103.2 ॥

daśagrīvo rathasthastu rāmaṁ vajropamaiḥ śaraiḥ ।
ājaghāna mahāghorairdhārābhiriva toyadaḥ ।
6.103.3 ॥

dīptapāvaka saṅkāśaiḥ śaraiḥ kāñcanabhūṣaṇaiḥ ।
nirbibheda raṇe rāmo daśagrīvaṁ samāhitam ।
6.103.4 ॥

bhūmau sthitasya rāmasya rathasthasya ca rakṣasaḥ ।
na samaṁ yuddhamityāhurdevagandharvadānavāḥ ।
6.103.5 ॥

tataḥ kāñcanacitrāṅgaḥ kiṅkiṇīśatabhūṣitaḥ ।
taruṇādityasaṅkāśo vaiḍūryamayakūbaraḥ ।
6.103.6 ॥

sadaśvaiḥ kāñcanāpīḍairyuktaḥ śvetaprakīrṇakaiḥ ।
haribhiḥ sūryasaṅkāśairhemajālavibhūṣitaiḥ ।
6.103.7 ॥

rukmaveṇudhvajaḥ śrīmān devarājaratho varaḥ ।
devarājena sandiṣṭo rathamāruhya mātaliḥ ।
6.103.8 ॥

abhyavartata kākutsthamavatīrya triviṣṭapāt ।
6.103.9 ॥

abravīcca tadā rāmaṁ sapratodo rathe sthitaḥ ।
prāñjalirmātalirvākyaṁ sahasrākṣasya sārathiḥ ।
6.103.10 ॥

sahasrākṣeṇa kākutstha ratho 'yaṁ vijayāya te ।
dattastava mahāsattva śrīmān śatrunibarhaṇa ।
6.103.11 ॥

idamaindraṁ mahaccāpaṁ kavacaṁ cāgnisannibham ।
śarāścādityasaṅkāśāḥ śaktiśca vimalā śitā ।
6.103.12 ॥

āruhyemaṁ rathaṁ vīra rākṣasaṁ jahi rāvaṇam ।
mayā sārathinā rājan mahendra iva dānavān ।
6.103.13 ॥

ityuktaḥ samparikramya rathaṁ samabhivādya ca ।
āruroha tadā rāmo lokān lakṣmyā virājayan ।
6.103.14 ॥

tadbabhūvādbhutaṁ yuddhaṁ tumulaṁ romaharṣaṇam ।
rāmasya ca mahābāho rāvaṇasya ca rakṣasaḥ ।
6.103.15 ॥

sa gāndharveṇa gāndharvaṁ daivaṁ daivena rāghavaḥ ।
astraṁ rākṣasarājasya jaghāna paramāstravit ।
6.103.16 ॥

astraṁ tu paramaṁ ghoraṁ rākṣasaṁ rākṣasādhipaḥ ।
sasarja paramakruddhaḥ punareva niśācaraḥ ।
6.103.17 ॥

te rāvaṇadhanurmuktāḥ śarāḥ kāñcanabhūṣaṇāḥ ।
abhyavartanta kākutsthaṁ sarpā bhūtvā mahāviṣāḥ ।
6.103.18 ॥

te dīptavadanā dīptaṁ vamanto jvalanaṁ mukhaiḥ ।
rāmamevābhyavartanta vyāditāsyā bhayānakāḥ ।
6.103.19 ॥

tairvāsukisamasparśairdīptabhogairmahāviṣaiḥ ।
diśaśca santatāḥ sarvāḥ pradiśaśca samāvṛtāḥ ।
6.103.20 ॥

tān dṛṣṭvā pannagān rāmaḥ samāpatata āhave ।
astraṁ gārutmataṁ ghoraṁ prāduścake bhayāvaham ।
6.103.21 ॥

te rāghavaśarā muktā rukmapuṅkhāḥ śikhiprabhāḥ ।
suparṇāḥ kāñcanā bhūtvā viceruḥ sarpaśatravaḥ ।
6.103.22 ॥

te tān sarvān śarān jaghnuḥ sarparūpān mahājavān ।
suparṇarūpā rāmasya viśikhāḥ kāmarūpiṇaḥ ।
6.103.23 ॥

astre pratihate kruddho rāvaṇo rākṣasādhipaḥ ।
abhyavarṣattadā rāmaṁ ghorābhiḥ śaravṛṣṭibhiḥ ।
6.103.24 ॥

tataḥ śarasahasreṇa rāmamakliṣṭakāriṇam ।
ardayitvā śaraugheṇa mātaliṁ pratyavidhyata ।
6.103.25 ॥

ciccheda ketumuddhiśya śareṇaikena rāvaṇaḥ ।
pātayitvā rathopasthe rathāt ketuṁ ca kāñcanam ।
aindrānapi jaghānāśvān śarajālena rāvaṇaḥ ।
6.103.26 ॥

taṁ dṛṣṭvā sumahatkarma rāvaṇasya durātmanaḥ ।
viṣedurdevagandharvā dānavāścāraṇaiḥ saha ।
6.103.27 ॥

rāmamārtaṁ tadā dṛṣṭvā siddhāśca paramarṣayaḥ ।
vyathitā vānarendrāśca babhūvuḥ savibhīṣaṇāḥ ।
6.103.28 ॥

rāmacandramasaṁ dṛṣṭvā grastaṁ rāvaṇarāhuṇā ।
prājāpatyaṁ ca nakṣatraṁ rohiṇīṁ śaśinaḥ priyām ।
6.103.29 ॥

samākramya budhastasthau prajānāmaśubhāvahaḥ ।
6.103.30 ॥

sadhūmaparivṛttormiḥ prajvalanniva sāgaraḥ ।
utpapāta tadā kruddhaḥ spṛśanniva divākaram ।
6.103.31 ॥

śastravarṇaḥ suparuṣo mandaraśmirdivākaraḥ ।
adṛśyata kabandhāṅkaḥ saṁsakto dhūmaketunā ।
6.103.32 ॥

kosalānāṁ ca nakṣatraṁ vyaktamindrāgnidaivatam ।
ākramyāṅgārakastasthau viśākhāmapi cāmbare ।
6.103.33 ॥

daśāsyo viṁśatibhujaḥ pragṛhītaśarāsanaḥ ।
adṛśyata daśagrīvo maināka iva parvataḥ ।
6.103.34 ॥

nirasyamāno rāmastu daśagrīveṇa rakṣasā ।
nāśaknodabhisandhātuṁ sāyakān raṇamūrdhani ।
6.103.35 ॥

sa kṛtvā bhrukuṭiṁ kruddhaḥ kiñcit saṁraktalocanaḥ ।
jagāma sumahākrodhaṁ nirdahanniva cakṣuṣā ।
6.103.36 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe tryuttaraśatatamaḥ sargaḥ ।
103 ॥