सुन्दरकाण्डम्Sundara Kāṇḍa

sacandrakumudaṁ ramyaṁ sārkakāraṇḍavaṁ śubham ।
tiṣyaśravaṇakādambamabhraśaivālaśādvalam ।
5.57.1 ॥

pularvasumahāmīnaṁ lohitāṅgamahāgraham ।
airāvatamahādvīpaṁ svātīhaṁsavilolitam ।
5.57.2 ॥

vātasaṅghātajātormicandrāṁśuśiśirāmbumat ।
bhujaṅgayakṣagandharvaprabuddhakamalotpalam ।
5.57.3 ॥

hanumān mārutagatirmahānauriva sāgaram ।
apāramapariśrāntaḥ pupluve gaganārṇavam ।
5.57.4 ॥

grasamāna ivākāśaṁ tārādhipamivollikhan ।
haranniva sanakṣatraṁ gaganaṁ sārkamaṇḍalam ।
5.57.5 ॥

mārutasyātmajaḥ śrīmān kapirvyomacaro mahān ।
hanumān meghajālāni vikarṣanniva gacchati ।
5.57.6 ॥

pāṇḍarāruṇavarṇāni nīlamāñjiṣṭhakāni ca ।
haritāruṇavarṇāni mahābhrāṇi cakāśire ।
5.57.7 ॥

praviśannabhrajālāni niṣpataṁśca punaḥ punaḥ ।
pracchannaśca prakāśaśca candramā iva lakṣyate ।
5.57.8 ॥

vividhābhraghanāpannagocaro dhavalāmbaraḥ ।
dṛśyādṛśyatanurvīrastadā candrāyate 'mbare ।
5.57.9 ॥

tārkṣyāyamāṇo gagane babhāse vāyunandanaḥ ।
dārayan meghavṛndāni niṣpataṁśca punaḥ punaḥ ।
5.57.10 ॥

nadannādena mahatā meghasvanamahāsvanaḥ ।
pravarān rākṣasān hatvā nāma viśrāvya cātmanaḥ ।
5.57.11 ॥

ākulāṁ nagarīṁ kṛtvā vyathayitvā ca rāvaṇam ।
ardayitvā balaṁ ghoraṁ vaidehīmabhivādya ca ।
5.57.12 ॥

ājagāma mahātejāḥ punarmadhyena sāgaram ।
5.57.13 ॥

parvatendraṁ sunābhaṁ ca samupaspṛśya vīryavān ।
jyāmukta iva nārāco mahāvego 'bhyupāgataḥ ।
5.57.14 ॥

sa kiṁcidanusaṁprāptaḥ samālokya mahāgirim ।
mahendrameghasaṅkāśaṁ nanāda haripuṅgavaḥ ।
5.57.15 ॥

sa pūrayāmāsa kapirdiśo daśa samantataḥ ।
nadannādena mahatā meghasvanamahāsvanaḥ ।
5.57.16 ॥

sa taṁ deśamanuprāptaḥ suhṛddarśanalālasaḥ ।
nanāda hariśādrūlo lāṅgūlaṁ cāpyakampayat ।
5.57.17 ॥

tasya nānadyamānasya suparṇacarite pathi ।
phalatīvāsya ghoṣeṇa gaganaṁ sārkamaṇḍalam ।
5.57.18 ॥

ye tu tatrottare tīre samudrasya mahābalāḥ ।
pūrvaṁ saṁviṣṭhitāḥ śūrā vāyuputradidṛkṣavaḥ ।
5.57.19 ॥

mahato vāyununnasya toyadasyeva garjitam ।
śuśruvuste tadā ghoṣamūruvegaṁ hanūmataḥ ।
5.57.20 ॥

te dīnamanasaḥ sarve śuśruvuḥ kānanaukasaḥ ।
vānarendrasya nirghoṣaṁ parjanyaninadopamam ।
5.57.21 ॥

niśamya nadato nādaṁ vānarāste samantataḥ ।
babhūvurutsukāḥ sarve suhṛddarśanakāṅkṣiṇaḥ ।
5.57.22 ॥

jāmbavān sa hariśreṣṭhaḥ prītisaṁhṛṣṭamānasaḥ ।
upāmantrya harīn sarvānidaṁ vacanamabravīt ।
5.57.23 ॥

sarvathā kṛtakāryo 'sau hanūmānnātra saṁśayaḥ ।
na hyasyākṛtakāryasya nāda evaṁvidho bhavet ।
5.57.24 ॥

tasya bāhūruvegaṁ ca ninādaṁ ca mahātmanaḥ ।
niśamya harayo hṛṣṭāḥ samutpetustatastataḥ ।
5.57.25 ॥

te nagāgrānnagāgrāṇi śikharācchikharāṇi ca ।
prahṛṣṭāḥ samapadyanta hanūmantaṁ didṛkṣavaḥ ।
5.57.26 ॥

te prītāḥ pādapāgreṣu gṛhya śākhāḥ suviṣṭhitāḥ ।
vāsāṁsīva praśākhāśca samāvidhyanta vānarāḥ ।
5.57.27 ॥

girigahvarasaṁlīno yathā garjati mārutaḥ ।
evaṁ jagarja balavān hanūmān mārutātmajaḥ ।
5.57.28 ॥

tamabhraghanasaṅkāśamāpatantaṁ mahākapim ।
dṛṣṭvā te vānarāḥ sarve tasthuḥ prāñjalayastadā ।
5.57.29 ॥

tatastu vegavāṁstasya girergirinibhaḥ kapiḥ ।
nipapāta mahendrasya śikhare pādapākule ।
5.57.30 ॥

harṣeṇāpūryamāṇo 'sau ramye parvatanirjhare ।
chinnapakṣa ivākāśāt papāta dharaṇīdharaḥ ।
5.57.31 ॥

tataste prītamanasaḥ sarve vānarapuṅgavāḥ ।
hanūmantaṁ mahātmānaṁ parivāryopatasthire ।
parivārya ca te sarve parāṁ prītimupāgatāḥ ।
5.57.32 ॥

prahṛṣṭavadanāḥ sarve tamarogamupāgatam ।
upāyanāni cādāya mūlāni ca phalāni ca ।
pratyarcayan hariśreṣṭhaṁ harayo mārutātmajam ।
5.57.33 ॥

hanumāṁstu gurūn vṛddhān jāmbavatpramukhāṁstadā ।
kumāramaṅgadaṁ caiva so 'vandata mahākapiḥ ।
5.57.34 ॥

sa tābhyāṁ pūjitaḥ pūjyaḥ kapibhiśca prasāditaḥ ।
dṛṣṭā sīteti vikrāntaḥ saṁkṣepeṇa nyavedayat ।
5.57.35 ॥

niṣasāda ca hastena gṛhītvā vālinaḥ sutam ।
ramaṇīye vanoddeśe mahendrasya girestadā ।
5.57.36 ॥

hanumānabravīddhṛṣṭastadā tān vānararṣabhān ।
5.57.37 ॥

aśokavanikāsaṁsthā dṛṣṭā sā janakātmajā ।
rakṣyamāṇā sughorābhī rākṣasībhiraninditā ।
5.57.38 ॥

ekaveṇīdharā bālā rāmadarśanalālasā ।
upavāsapariśrāntā jaṭilā malinā kṛśā ।
5.57.39 ॥

tato dṛṣṭeti vacanaṁ mahārthamamṛtopamam ।
niśamya māruteḥ sarve muditā vānarā bhavan ।
5.57.40 ॥

kṣvelantyanye nadantyanye garjantyanye mahābalāḥ ।
cakruḥ kilikilāmanye pratigarjanti cāpare ।
5.57.41 ॥

keciducchritalāṅgūlāḥ prahṛṣṭāḥ kapikuñjarāḥ ।
añcitā yatadīrghāṇi lāṁgūlāni pravivyadhuḥ ।
5.57.42 ॥

apare ca hanūmantaṁ vānarā vāraṇopamam ।
āplutya giriśṛṅgebhyaḥ saṁspṛśanti sma harṣitāḥ ।
5.57.43 ॥

uktavākyaṁ hanūmantamaṅgadastamathābravīt ।
sarveṣāṁ harivīrāṇāṁ madhye vacanamuttamam ।
5.57.44 ॥

sattve vīrye na te kaścit samo vānara vidyate ।
yadavaplutya vistīrṇaṁ sāgaraṁ punarāgataḥ ।
5.57.45 ॥

aho svāmini te bhaktiraho vīryamaho dhṛtiḥ ।
diṣṭyā dṛṣṭā tvayā devī rāmapatnī yaśasvinī ।
5.57.46 ॥

diṣṭyā tyakṣyati kākutsthaḥ śokaṁ sītāviyogajam ।
tato 'ṅgadaṁ hanūmantaṁ jāmbavantaṁ ca vānarāḥ ।
5.57.47 ॥

parivārya pramuditā bhejire vipulāḥ śilāḥ ।
śrotukāmāḥ samudrasya laṅghanaṁ vānarottamāḥ ।
5.57.48 ॥

darśanaṁ cāpi laṅkāyāḥ sītāyā rāvaṇasya ca ।
tasthuḥ prāñjalayaḥ sarve hanumadvadanonmukhāḥ ।
5.57.49 ॥

tasthau tatrāṅgadaḥ śrīmān vānarairbahubhirvṛtaḥ ।
upāsyamāno vibudhairdivi devapatiryathā ।
5.57.50 ॥

hanūmatā kīrtimatā yaśasvinā tathā 'ṅgadenāṅgadabaddhabāhunā ।
mudā tadādhyāsitamunnataṁ mahanmahīdharāgraṁ jvalitaṁ śriyā 'bhavat ।
5.57.51 ॥