सुन्दरकाण्डम्Sundara Kāṇḍa

tatastu śiṁśupāmūle jānakīṁ paryavasthitām ।
abhivādyābravīddiṣṭyā paśyāmi tvāmihākṣatām ।
5.56.1 ॥

tatastaṁ prasthitaṁ sītā vīkṣamāṇā punaḥ punaḥ ।
bhartṛsnehānvitaṁ vākyaṁ hanumantamabhāṣata ।
5.56.2 ॥

kāmamasya tvamevaikaḥ kāryasya parisādhane ।
paryāptaḥ paravīraghna yaśasyaste balodayaḥ ।
5.56.3 ॥

śaraistu saṅkulāṁ kṛtvā laṅkāṁ parabalārdanaḥ ।
māṁ nayedyadi kākutsthastattasya sadṛśaṁ bhavet ।
5.56.4 ॥

tadyathā tasya vikrāntamanurūpaṁ mahātmanaḥ ।
bhavatyāhavaśūrasya tathā tvamupapādaya ।
5.56.5 ॥

tadarthopahitaṁ vākyaṁ praśritaṁ hetusaṁhitam ।
niśamya hanumāṁstasyā vākyamuttaramabravīt ।
5.56.6 ॥

kṣiprameṣyati kākutstho haryṛkṣapravarairvṛtaḥ ।
yaste yudhi vijityārīn śokaṁ vyapanayiṣyati ।
5.56.7 ॥

evamāśvāsya vaidehīṁ hanumān mārutātmajaḥ ।
gamanāya matiṁ kṛtvā vaidehīmabhyavādayat ।
5.56.8 ॥

tataḥ sa kapiśārdūlaḥ svāmisandarśanotsukaḥ ।
āruroha giriśreṣṭhamariṣṭamarimardanaḥ ।
5.56.9 ॥

tuṅgapadmakajuṣṭābhirnīlābhirvanarājibhiḥ ।
sottarīyamivāmbhodaiḥ śrṛṅgāntaravilambibhiḥ ।
5.56.10 ॥

bodhyamānamiva prītyā divākarakaraiḥ śubhaiḥ ।
unmiṣantamivoddhūtairlocanairiva dhātubhiḥ ।
5.56.11 ॥

toyaughanisvanairmandraiḥ prādhītamiva parvatam ।
pragītamiva vispaṣṭairnānāprasravaṇasvanaiḥ ।
5.56.12 ॥

devadārubhiratyuccairūrdhvabāhumiva sthitam ।
prapātajalanirghoṣaiḥ prākrṛṣṭamiva sarvataḥ ।
5.56.13 ॥

vepamānamiva śyāmaiḥ kampamānaiḥ śaradghanaiḥ ।
veṇubhimārutoddhūtaiḥ kūjantamiva kīcakaiḥ ।
5.56.14 ॥

niḥśvasantamivāmarṣādghorairāśīviṣottamaiḥ ।
nīhārakṛtagambhīrairdhyāyantamiva gahvaraiḥ ।
5.56.15 ॥

meghapādanibhaiḥ pādaiḥ prakrāntamiva sarvataḥ ।
jṛmbhamāṇamivākāśe śikharairabhramālibhiḥ ।
5.56.16 ॥

kūṭaiśca bahudhākīrṇaiḥ śobhitaṁ bahukandaraiḥ ।
sālatālāśvakarṇaiśca vaṁśaiśca bahubhirvṛtam ।
5.56.17 ॥

latāvitānairvitataiḥ puṣpavadbhiralaṅkṛtam ।
nānāmṛgagaṇākīrṇaṁ dhātuniṣyandabhūṣitam ।
bahuprasravaṇopetaṁ śilāsañcayasaṅkaṭam ।
5.56.18 ॥

maharṣiyakṣagandharvakinnaroragasevitam ।
latāpādapasaṅghātaṁ siṁhādhyuṣitakandaram ।
5.56.19 ॥

vyāghrasaṅghasamākīrṇaṁ svādumūlakaphaladrumam ।
5.56.20 ॥

tamāruroha hanumān parvataṁ pavanātmajaḥ ।
rāmadarśanaśīghreṇa praharṣeṇābhicoditaḥ ।
5.56.21 ॥

tena pādatalākrāntā ramyeṣu girisānuṣu ।
saghoṣāḥ samaśīryanta śilāścūrṇīkṛtāstataḥ ।
5.56.22 ॥

sa tamāruhya śailendraṁ vyavardhata vyavardhata mahākapiḥ ।
dakṣiṇāduttaraṁ pāraṁ prārthayan lavaṇāmbhasaḥ ।
5.56.23 ॥

adhirūhya tato vīraḥ parvataṁ pavanātmajaḥ ।
dadarśa sāgaraṁ bhīmaṁ mīnoraganiṣevitam ।
5.56.24 ॥

sa māruta ivākāśaṁ mārutasyātmasambhavaḥ ।
prapede hariśārdūlo dakṣiṇāduttarāṁ diśam ।
5.56.25 ॥

sa tadā pīḍitastena kapinā parvatottamaḥ ।
rarāsa saha tairbhūtaiḥ praviśan vasudhātalam ।
kampamānaiśca śikharaiḥ patadbhirapi ca drumaiḥ ।
5.56.26 ॥

tasyoruvegonmathitāḥ pādapāḥ puṣpaśālinaḥ ।
nipeturbhūtale rugṇāḥ śakrāyudhahatā iva ।
5.56.27 ॥

kandarāntarasaṁsthānāṁ pīḍitānāṁ mahaujasām ।
siṁhānāṁ ninado bhīmo nabho bhindan sa śuśruve ।
5.56.28 ॥

srastavyāviddhavasanā vyākulīkṛtabhūṣaṇāḥ ।
vidyādharyaḥ samutpetuḥ sahasā dharaṇīdharāt ।
5.56.29 ॥

atipramāṇā balino dīptajihvā mahāviṣāḥ ।
nipīḍitaśirogrīvā vyaveṣṭanta mahāhayaḥ ।
5.56.30 ॥

kinnaroragagandharvayakṣavidyādharāstadā ।
pīḍitaṁ taṁ nagavaraṁ tyaktvā gaganamāsthitāḥ ।
5.56.31 ॥

sa ca bhūmidharaḥ śrīmān balinā tena pīḍitaḥ ।
savṛkṣaśikharodagraḥ praviveśa rasātalam ।
5.56.32 ॥

daśayojanavistārastriṁśadyojanamucchritaḥ ।
dharaṇyāṁ samatāṁ yātaḥ sa babhūva dharādharaḥ ।
5.56.33 ॥

sa lilaṅghayiṣurbhīmaṁ salīlaṁ lavaṇārṇavam ।
kallolāsphālavelāntamutpapāta nabho hariḥ ।
5.56.34 ॥