सुन्दरकाण्डम्Sundara Kāṇḍa

laṅkāṁ samastāṁ sandīpya lāṅgūlāgniṁ mahābalaḥ ।
nirvāpayāmāsa tadā samudre harisattamaḥ ।
5.55.1 ॥

sandīpyamānāṁ vidhvastāṁ trastarakṣogaṇāṁ purīm ।
avekṣya hanumān laṅkāṁ cintayāmāsa vānaraḥ ।
5.55.2 ॥

tasyābhūt sumahāṁstrāsaḥ kutsā cātmanyajāyata ।
laṅkāṁ pradahatā karma kiṁsvit kṛtamidaṁ mayā ।
5.55.3 ॥

dhanyāste puruṣaśreṣṭhā ye buddhyā kopamutthitam ।
nirundhanti mahātmāno dīptamagnimivāmbhasā ।
5.55.4 ॥

kruddhaḥ pāpaṁ na kuryāt kaḥ kruddho hanyād gurūnapi ।
kruddhaḥ paruṣayā vācā naraḥ sādhūnadhikṣipet ।
5.55.5 ॥

vācyāvācyaṁ prakupito na vijānāti karhicit ।
nākāryamasti kruddhasya nāvācyaṁ vidyate kvacit ।
5.55.6 ॥

yaḥ samutpatitaṁ krodhaṁ kṣamayaiva nirasyati ।
yathoragastvacaṁ jīrṇāṁ sa vai puruṣa ucyate ।
5.55.7 ॥

dhigastu māṁ sudurbuddhiṁ nirlajjaṁ pāpakṛttamam ।
acintayitvā tāṁ sītāmagnidaṁ svāmighātakam ।
5.55.8 ॥

yadi dagdhā tviyaṁ laṅkā nūnamāryāpi jānakī ।
dagdhā tena mayā bharturhataṁ kāryamajānatā ।
5.55.9 ॥

yadarthamayamārambhastatkāryamavasāditam ।
mayā hi dahatā laṅkāṁ na sītā parirakṣitā ।
5.55.10 ॥

īṣatkāryamidaṁ kāryaṁ kṛtamāsīnna saṁśayaḥ ।
tasya krodhābhibhūtena mayā mūlakṣayaḥ kṛtaḥ ।
5.55.11 ॥

vinaṣṭā jānakī nūnaṁ na hyadagdhaḥ pradṛśyate ।
laṅkāyāṁ kaściduddeśaḥ sarvā bhasmīkṛtā purī ।
5.55.12 ॥

yadi tadvihataṁ kāryaṁ mama prajñāviparyayāt ।
ihaiva prāṇasaṁnyāso mamāpi hyadya rocate ।
5.55.13 ॥

kimagnau nipatāmyadya ahosvidvaḍavāmukhe ।
śarīramāho sattvānāṁ dadmi sāgaravāsinām ।
5.55.14 ॥

kathaṁ hi jīvatā śakyo mayā draṣṭuṁ harīśvaraḥ ।
tau vā puruṣaśārdūlau kāryasarvasvaghātinā ।
5.55.15 ॥

mayā khalu tadevedaṁ roṣadoṣāt pradarśitam ।
prathitaṁ triṣu lokeṣu kapitvamanavasthitam ।
5.55.16 ॥

dhigastu rājasaṁ bhāvamanīśamanavasthitam ।
īśvareṇāpi yadrāgānmayā sītā na rakṣitā ।
5.55.17 ॥

vinaṣṭāyāṁ tu sītāyāṁ tāvubhau vinaśiṣyataḥ ।
tayorvināśe sugrīvaḥ sabandhurvinaśiṣyati ।
5.55.18 ॥

etadeva vacaḥ śrutvā bharato bhrātṛvatsalaḥ ।
dharmātmā sahaśatrughnaḥ kathaṁ śakṣyati jīvitum ।
5.55.19 ॥

ikṣvākuvaṁśe dharmiṣṭhe gate nāśamasaṁśayam ।
bhaviṣyanti prajāḥ sarvāḥ śokasantāpapīḍitāḥ ।
5.55.20 ॥

tadahaṁ bhāgyarahito luptadharmārthasaṁgrahaḥ ।
roṣadoṣaparītātmā vyaktaṁ lokavināśanaḥ ।
5.55.21 ॥

iti cintayastasya nimittānyupapedire ।
pūrvamapyupalabdhāni sākṣātpunaracintayat ।
5.55.22 ॥

athavā cārusarvāṅgī rakṣitā svena tejasā ।
na naśiṣyati kalyāṇī nāgniragnau pravartate ।
5.55.23 ॥

na hi dharmātmanastasya bhāryāmamitatejasaḥ ।
svācāritrābhiguptāṁ tāṁ spraṣṭumarhati pāvakaḥ ।
5.55.24 ॥

nūnaṁ rāmaprabhāvena vaidehyāḥ sukṛtena ca ।
yanmāṁ dahanakarmā 'yaṁ nādahaddhavyavāhanaḥ ।
5.55.25 ॥

trayāṇāṁ bharatādīnāṁ bhārta'ṇāṁ devatā ca yā ।
rāmasya ca manaḥkāntā sā kathaṁ vinaśiṣyati ।
5.55.26 ॥

yadvā dahanakarmā 'yaṁ sarvatra prabhuravyayaḥ ।
na me dahati lāṅgūlaṁ kathamāryāṁ pradhakṣyati ।
5.55.27 ॥

punaścācintayattatra hanumān vismitastadā ।
hiraṇyanābhasya girerjalamadhye pradarśanam ।
5.55.28 ॥

tapasā satyavākyena ananyatvācca bhartari ।
api sā nirdahedagniṁ na tāmagniḥ pradhakṣyati ।
5.55.29 ॥

sa tathā cintayaṁstatra devyā dharmaparigraham ।
śuśrāva hanumān vākyaṁ cāraṇānāṁ mahātmanām ।
5.55.30 ॥

aho khalu kṛtaṁ karma duṣkaraṁ hi hanūmatā ।
agniṁ visṛjatā 'bhīkṣṇaṁ bhīmaṁ rākṣasaveśmani ।
5.55.31 ॥

prapalāyitarakṣaḥ strībālavṛddhasamākulā ।
janakolāhalādhmātā krandantīvādrikandare ।
5.55.32 ॥

dagdheyaṁ nagarī sarvā sāṭṭaprākāratoraṇā ।
jānakī na ca dagdheti vismayo 'dbhuta eva naḥ ।
5.55.33 ॥

sa nimittaiśca dṛṣṭārthaiḥ kāraṇaiśca mahāguṇaiḥ ।
ṛṣivākyaiśca hanumānabhavat prītabhānasaḥ ।
5.55.34 ॥

tataḥ kapiḥ prāptamanorathārthastāmakṣatāṁ rājasutāṁ viditvā ।
pratyakṣatastāṁ punareva dṛṣṭvā pratiprayāṇāya matiṁ cakāra ।
5.55.35 ॥