सुन्दरकाण्डम्Sundara Kāṇḍa

vīkṣamāṇastato laṅkāṁ kapiḥ kṛtamanorathaḥ ।
vardhamānasamutsāhaḥ kāryaśeṣamacintayat ।
5.54.1 ॥

kiṁ nu khalvavaśiṣṭaṁ me kartavyamiha sāmpratam ।
yadeṣāṁ rakṣasāṁ bhūyaḥ santāpajananaṁ bhavet ।
5.54.2 ॥

vanaṁ tāvat pramathitaṁ prakṛṣṭā rākṣasā hatāḥ ।
balaikadeśaḥ kṣapitaḥ śeṣaṁ durgavināśanam ।
5.54.3 ॥

durge vināśite karma bhavet sukhapariśramam ।
alpayatnena kārye 'smin mama syāt saphalaḥ śramaḥ ।
5.54.4 ॥

yo hyayaṁ mama lāṁgūle dīpyate havyavāhanaḥ ।
asya santarpaṇaṁ nyāyyaṁ kartumebhirgṛhottamaiḥ ।
5.54.5 ॥

tataḥ pradīptalāṅgūlaḥ savidyudiva toyadaḥ ।
bhavanāgreṣu laṅkāyā vicacāra mahākapiḥ ।
5.54.6 ॥

gṛhād gṛhaṁ rākṣasānāmudyānāni ca vānaraḥ ।
vīkṣamāṇo hyasantrastaḥ prāsādāṁśca cacāra saḥ ।
5.54.7 ॥

avaplutya mahāvegaḥ prahastasya niveśanam ।
agniṁ tatra sa nikṣipya śvasanena samo balī ।
5.54.8 ॥

tato 'nyat pupluve veśma mahāpārśvasya vīryavān ।
mumoca hanumānagniṁ kālānalaśikhopamam ।
5.54.9 ॥

vajradaṁṣṭrasya ca tathā pupluve sa mahākapiḥ ।
śukasya ca mahātejāḥ sāraṇasya ca dhīmataḥ ।
tathā cendrajito veśma dadāha hariyūthapaḥ ।
5.54.10 ॥

jambumāleḥ sumāleśca dadāha bhavanaṁ tataḥ ।
5.54.11 ॥

ya ca mahātejāḥ sāraṇasya ca dhīmataḥ ।
raśmimaketośca bhavanaṁ sūryaśatrostathaiva ca ।
hrasvakarṇasya daṁṣṭrasya romaśasya ca rakṣasaḥ ।
5.54.12 ॥

yuddhonmattasya mattasya dhvajagrīvasya rakṣasaḥ ।
vidyujjihvasya ghorasya tathā hastimukhasya ca ।
5.54.13 ॥

karālasya piśācasya śoṇitākṣasya caiva hi ।
kumbhakarṇasya bhavanaṁ makarākṣasya caiva hi ।
5.54.14 ॥

yajñaśatrośca bhavanaṁ brahmaśatrostathaiva ca ।
narāntakasya kumbhasya nikumbhasya durātmanaḥ ।
5.54.15 ॥

varjayitvā mahātejā vibhīṣaṇagṛhaṁ prati ।
kramamāṇaḥ krameṇaiva dadāha haripuṅgavaḥ ।
5.54.16 ॥

teṣu teṣu mahārheṣu bhavaneṣu mahāyaśāḥ ।
gṛheṣvṛddhimatāmṛddhiṁ dadāha sa mahākapiḥ ।
5.54.17 ॥

sarveṣāṁ samatikramya rākṣasendrasya vīryavān ।
āsasādātha lakṣmīvān rāvaṇasya niveśanam ।
5.54.18 ॥

tatastasmin gṛhe mukhye nānāratnavibhūṣite ।
merumandarasaṅkāśe sarvamaṅgalaśobhite ।
5.54.19 ॥

pradīptamagnimutsṛjya lāṅgūlāgre pratiṣṭhitam ।
nanāda hanumān vīro yugāntajalado yathā ।
5.54.20 ॥

śvasanena ca saṁyogādativego mahābalaḥ ।
kālāgniriva jajvāla prāvardhata hutāśanaḥ ।
5.54.21 ॥

pradīptamagniṁ pavanasteṣu veśmasvacārayat ।
abhūcchvasanasaṁyogādativego hutāśanaḥ ।
5.54.22 ॥

tāni kāñcanajālāni muktāmaṇimayāni ca ।
bhavanānyavaśīryanta ratnavanti mahānti ca ।
5.54.23 ॥

tāni bhagnavimānāni nipeturvasudhātale ।
bhavanānīva siddhānāmambarāt puṇyasaṁkṣaye ।
5.54.24 ॥

saṁjajñe tumulaḥ śabdo rākṣasānāṁ pradhāvatām ।
svagṛhasya paritrāṇe bhagnotsāhagataśriyām ।
nūnameṣo 'gnirāyātaḥ kapirūpeṇa hā iti ।
5.54.25 ॥

krandantyaḥ sahasā petuḥ stanandayadharāḥ striyaḥ ।
kāścidagniparītebhyo harmyebhyo muktamūrdhajāḥ ।
5.54.26 ॥

patantyo rejire 'bhrebhyaḥ saudāminya ivāmbarāt ।
5.54.27 ॥

vajravidrumavaidūryamukārajatasaṁhitān ।
vicitrān bhavanān dhātūn syāndamānān dadarśa saḥ ।
5.54.28 ॥

nāgnistṛpyati kāṣṭhānāṁ tṛṇānāṁ hariyūthapaḥ ।
nāgnernāpi viśastānāṁ rākṣasānāṁ vasundharā ।
5.54.29 ॥

kvacit kiṁśukasaṅkāśāḥ kvacicchālmalisannibhāḥ ।
kvacit kuṅkumasaṅkāśāḥ śikhā vahneścakāśire ।
5.54.30 ॥

hanūmatā vegavatā vānareṇa mahātmanā ।
laṅkāpuraṁ pradagdhaṁ tadrudreṇa tripuraṁ yathā ।
5.54.31 ॥

tatastu laṅkāpuraparvatāgre samutthito bhīmaparākramo 'gniḥ ।
pramārya cūḍāvalayaṁ pradīpto hanūmatā vegavatā visṛṣṭaḥ ।
5.54.32 ॥

yugāntakālānalatulyavegaḥ samāruto 'gnirvavṛdhe divispṛk ।
vidhūmaraśmirbhavaneṣu sakto rakṣaśśarīrājya samarpitārciḥ ।
5.54.33 ॥

ādityakoṭīsadṛśaḥ sutejā laṅkāṁ samāptāṁ parivārya tiṣṭhan ।
śabdairanekairaśaniprarūḍhairbhindannivāṇḍaṁ prababhau mahāgniḥ ।
5.54.34 ॥

tatrāmbarādagniratipravṛddho rūkṣaprabhaḥ kiṁśukapuṣpacūḍaḥ ।
nirvāṇadhūmākularājayaśca nīlotpalābhāḥ pracakāśire 'bhrāḥ ।
5.54.35 ॥

vajrī mahendrastridaśeśvaro vā sākṣādyamo vā varuṇo 'nilo vā ।
rudro 'gnirarko dhanadaśca somo na vānaro 'yaṁ svayameva kālaḥ ।
5.54.36 ॥

kiṁ brahmaṇaḥ sarvapitāmahasya sarvasya dhātuścaturānanasya ।
ihāgatovāgrūpadhārīrakṣopasaṁhārakaraḥ prakopaḥ ।
5.54.37 ॥

kiṁ vaiṣṇavaṁ vā kapirūpametya rakṣovināśāya paraṁ sutejaḥ ।
anantamavyaktamacintyamekaṁ svamāyayā sāmpratamāgataṁ vā ।
5.54.38 ॥

ityevamūcurbahavo viśiṣṭā rakṣogaṇāstatra sametya sarve ।
saprāṇisaṅghāṁ sagṛhāṁ savṛkṣāṁ dagdhāṁ purīṁ tāṁ sahasā samīkṣya ।
5.54.39 ॥

tatastu laṅkā sahasā pradagdhā sarākṣasā sāśvarathā sanāgā ।
sapakṣisaṅghā samṛgā savṛkṣā ruroda dīnā tumulaṁ saśabdam ।
5.54.40 ॥

hā tāta hā putraka kānta mitra hā jīvitaṁ bhogayutaṁ supuṇyam ।
rakṣobhirevaṁ bahudhā bruvadbhiḥ śabdaḥ kṛto ghorataraḥ subhīmaḥ ।
5.54.41 ॥

hutāśanajvālasamāvṛtā sā hatapravīrā parivṛttayodhā ।
hanūmataḥ krodhabalābhibhūtā babhūva śāpopahateva laṅkā ।
5.54.42 ॥

sa sambhramatrastaviṣaṇṇarākṣasāṁ samujjvalajjvālahutāśanāṅkitām ।
dadarśa laṅkāṁ hanumān mahāmanāḥ svayambhukopopahatāmivāvanim ।
5.54.43 ॥

bhaṅktvā vanaṁ pādaparatnasaṅkulaṁ hatvā tu rakṣāṁsi mahānti saṁyuge ।
dagdhvā purīṁ tāṁ gṛharatnamālinīṁ tasthau hanūmān pavanātmajaḥ kapiḥ ।
5.54.44 ॥

trikūṭaśṛṅgāgratale vicitre pratiṣṭhito vānararājasiṁhaḥ ।
pradīptalāṅgūlakṛtārcimālī vyarājatāditya ivāṁśumālī ।
5.54.45 ॥

sa rākṣasāṁstān subahūṁśca hatvā vanaṁ ca bhaṅktvā bahupādapaṁ tat ।
visṛjya rakṣobhavaneṣu cāgniṁ jagāma rāmaṁ manasā mahātmā ।
5.54.46 ॥

tatastu taṁ vānaravīramukhyaṁ mahābalaṁ mārutatulyavegam ।
mahāmatiṁ vāyusutaṁ variṣṭhaṁ pratuṣṭuvurdevagaṇāśca sarve ।
5.54.47 ॥

bhaṅktvā vanaṁ mahātejā hatvā rakṣāṁsi saṁyuge ।
dagdhvā laṅkāpurīṁ ramyāṁ rarāja sa mahākapiḥ ।
5.54.48 ॥

tatra devāḥ sagandharvāḥ siddhāśca paramarṣayaḥ ।
dṛṣṭvā pradagdhāṁ tāṁ vismayaṁ paramaṁ gatāḥ ।
5.54.49 ॥

taṁ dṛṣṭvā vānaraśreṣṭhaṁ hanumantaṁ mahākapim ।
kālāgniriti sañcintya sarvabhūtāni tatrasuḥ ।
5.54.50 ॥

devāśca sarve munipuṅgavāśca gandharvavidyādharanāgayakṣāḥ ।
bhūtāni sarvāṇi mahānti tatra jagmuḥ parāṁ prītimatulyarūpām ।
5.54.51 ॥