सुन्दरकाण्डम्Sundara Kāṇḍa

tasya tadvacanaṁ śrutvā daśagrīvo mahābalaḥ ।
deśakālahitaṁ vākyaṁ bhrāturuttaramabravīt ।
5.53.1 ॥

samyaguktaṁ hi bhavatā dūtavadhyā vigarhitā ।
avaśyaṁ tu vadhādanyaḥ kriyatāmasya nigrahaḥ ।
5.53.2 ॥

kapīnāṁ kila lāṅgūlamiṣṭaṁ bhavati bhūṣaṇam ।
tadasya dīpyatāṁ śīghraṁ tena dagdhena gacchatu ।
5.53.3 ॥

tataḥ paśyantvimaṁ dīnamaṅgavairūpyakarśitam ।
samitrajñātayaḥ sarve bāndhavāḥ sasuhṛjjanāḥ ।
5.53.4 ॥

ājñāpayadrākṣasendraḥ puraṁ sarvaṁ sacatvaram ।
lāṅgūlena pradīptena rakṣobhiḥ pariṇīyatām ।
5.53.5 ॥

veṣṭayanti sma lāṅgūlaṁ jīrṇaiḥ kārpāsakaiḥ paṭaiḥ ।
5.53.6 ॥

saṁveṣṭyamāne lāṅgūle vyavardhata mahākapiḥ ।
śuṣkamindhanamāsādya vaneṣviva hutāśanaḥ ।
tailena pariṣicyātha te 'gniṁ tatrābhyapātayan ।
5.53.7 ॥

lāṅūlena pradīptena rākṣasāṁstānapātayat ।
roṣāmarṣaparītātmā bālasūryasamānanaḥ ।
5.53.8 ॥

lāṅgūlaṁ saṁpradīptaṁ tu draṣṭuṁ tasya hanūmataḥ ।
sahastrībālavṛddhāśca jagmuḥ prītā niśācarāḥ ।
5.53.9 ॥

sa bhūyaḥ saṅgataiḥ krūrai rākṣasairharisattamaḥ ।
nibaddhaḥ kṛtavān vīrastatkālasadṛśīṁ matim ।
5.53.10 ॥

kāmaṁ khalu na me śaktā nibaddhasyāpi rākṣasāḥ ।
chittvā pāśān samutpatya hanyāmahamimān punaḥ ।
5.53.11 ॥

yadi bhartṛhitārthāya carantaṁ bhartṛśāsanāt ।
badhnantyete durātmāno na tu me niṣkṛtiḥ kṛtā ।
5.53.12 ॥

sarveṣāmeva paryāpto rākṣasānāmahaṁ yudhi ।
kiṁ tu rāmasya prītyarthaṁ viṣahiṣye 'hamīdṛśam ।
5.53.13 ॥

laṅkā cārayitavyā vai punareva bhavediti ।
rātrau na hi sudṛṣṭā me durgakarmavidhānataḥ ।
5.53.14 ॥

avaśyameva draṣṭavyā mayā laṅkā niśākṣaye ।
5.53.15 ॥

kāmaṁ baddhasya me bhūyaḥ pucchasyoddīpanena ca ।
pīḍāṁ kurvantu rakṣāṁsi na me 'sti manasaḥ śramaḥ ।
5.53.16 ॥

tataste saṁvṛtākāraṁ sattvavantaṁ mahākapim ।
parigṛhya yayurhṛṣṭā rākṣasāḥ kapikuñjaram ।
5.53.17 ॥

śaṅkhabherīninādaistaṁ ghoyaṣayantaḥ svakarmabhiḥ ।
rākṣasāḥ krūrakarmāṇaścārayanti sma tāṁ purīm ।
5.53.18 ॥

anvīyamāno rakṣobhiryayau sukhamarindamaḥ ।
hanumāṁścārayāmāsa rākṣasānāṁ mahāpurīm ।
5.53.19 ॥

athāpaśyadvimānāni vicitrāṇi mahākapiḥ ।
saṁvṛtān bhūmibhāgāṁśca suvibhaktāṁśca catvarān ।
5.53.20 ॥

vīthīśca gṛhasaṁbādhāḥ kapiḥ śrṛṅgāṭakāni ca ।
tathā rathyoparathyāśca tathaiva gṛhakāntarān ।
gṛhāṁśca meghasaṅkāśān dadarśa pavanātmajaḥ ।
5.53.21 ॥

catvareṣu catuṣkeṣu rājamārge tathaiva ca ।
ghoṣayanti kapiṁ sarve cārīka iti rākṣasāḥ ।
5.53.22 ॥

strībālavṛddhā nirjagmustatra tatra kutūhalāt ।
taṁ pradīpitalāṅgūlaṁ hanumantaṁ didṛkṣavaḥ ।
5.53.23 ॥

dīpyamāne tatastasya lāṁgūlāgre hanūmataḥ ।
rākṣasyastā virūpākṣyaḥ śaṁsurdevyāstadapriyam ।
5.53.24 ॥

yastvayā kṛtasaṁvādaḥ sīte tāmramukhaḥ kapiḥ ।
lāṅgūlena pradīptena sa eṣa pariṇīyate ।
5.53.25 ॥

śratvā tadvacanaṁ krūramātmāpaharaṇopamam ।
vaidehī śokasantaptā hutāśanamupāgamat ।
5.53.26 ॥

maṅgalābhimukhī tasya sā tadā ' 'sīnmahākapeḥ ।
upatasthe viśālākṣī prayatā havyavāhanam ।
5.53.27 ॥

yadyasti patiśuśrūṣā yadyasti caritaṁ tapaḥ ।
yadi cāstyekapatnītvaṁ śīto bhava hanūmataḥ ।
5.53.28 ॥

yadi kiṁcidanukrośastasya mayyasti dhīmataḥ ।
yadi vā bhāgyaśeṣo me śīto bhava hanūmataḥ ।
5.53.29 ॥

yadi māṁ vṛttasampannāṁ tatsamāgamalālasām ।
sa vijānāti dharmātmā śīto bhava hanūmataḥ ।
5.53.30 ॥

yadi māṁ tārayedāryaḥ sugrīvaḥ satyasaṅgaraḥ ।
asmādduḥkhāmbusaṁrodhācchīto bhava hanūmataḥ ।
5.53.31 ॥

tatastīkṣṇārciravyagraḥ pradakṣiṇaśikho 'nalaḥ ।
jajvāla mṛgaśāvākṣyāḥ śaṁsanniva śivaṁ kapeḥ ।
5.53.32 ॥

hanumajjanakaścāpi pucchānalayuto 'nilaḥ ।
vavau svāsthyakaro devyāḥ prāleyānilaśītalaḥ ।
5.53.33 ॥

dahyamāne ca lāṅgūle cintayāmāsa vānaraḥ ।
5.53.34 ॥

pradīpto 'gnirayaṁ kasmānna māṁ dahati sarvataḥ ।
dṛśyate ca mahājvālaḥ karoti na ca me rujam ।
śiśirasyeva sampāto lāṅgūlāgre pratiṣṭhitaḥ ।
5.53.35 ॥

athavā tadidaṁ vyaktaṁ yad dṛṣṭaṁ plavatā mayā ।
rāmaprabhāvādāścaryaṁ parvataḥ saritāṁ patau ।
5.53.36 ॥

yadi tāvat samudrasya mainākasya ca dhīmataḥ ।
rāmārthaṁ sambhramastādṛk kimagnirna kariṣyati ।
5.53.37 ॥

sītāyāścānṛśaṁsyena tejasā rāghavasya ca ।
pituśca mama sakhyena na māṁ dahati pāvakaḥ ।
5.53.38 ॥

bhūyaḥ sa cintayāmāsa muhūrtaṁ kapikuñjaraḥ ।
5.53.39 ॥

utpapātātha vegena nanāda ca mahākapiḥ ।
puradvāraṁ tataḥ śrīmān śailaśṛṅgamivonnatam ॥

vibhaktarakṣassambādhamāsasādānilātmajaḥ ।
5.53.40 ॥

sa bhūtvā śailasaṅkāśaḥ kṣaṇena punarātmavān ।
hrasvatāṁ paramāṁ prāpto bandhanānyavaśātayat ।
5.53.41 ॥

vimuktaścābhavacchrīmān punaḥ parvatasannibhaḥ ।
vīkṣamāṇaśca dadṛśe parighaṁ toraṇāśritam ।
5.53.42 ॥

sa taṁ gṛhya mahābāhuḥ kālāyasapariṣkṛtam ।
rakṣiṇastān punaḥ sarvān sūdayāmāsa mārutiḥ ।
5.53.43 ॥

sa tānnihatvā raṇacaṇḍavikramaḥ samīkṣamāṇaḥ punareva laṅkām ।
pradīptalāṅgūlakṛtārcimālī prakāśatāditya ivārcimālī ।
5.53.44 ॥