सुन्दरकाण्डम्Sundara Kāṇḍa

tasya tadvacanaṁ śrutvā vānarasya mahātmanaḥ ।
ājñāpayadvadhaṁ tasya rāvaṇaḥ krodhamūrcchitaḥ ।
5.52.1 ॥

vadhe tasya samājñapte rāvaṇena durātmanā ।
niveditavato dautyaṁ nānumene vibhīṣaṇaḥ ।
5.52.2 ॥

taṁ rakṣodhipatiṁ kruddhaṁ tacca kāryamupasthitam ।
viditvā cintayāmāsa kāryaṁ kāryavidhau sthitaḥ ।
5.52.3 ॥

niścitārthastataḥ sāmnā ' 'pūjya śatrujidagrajam ।
uvāca hitamatyarthaṁ vākyaṁ vākyaviśāradaḥ ।
5.52.4 ॥

kṣamasva roṣaṁ tyaja rākṣasendra prasīda madvākyamidaṁ śṛṇuṣva ।
vadhaṁ na kurvanti parāvarajñā dūtasya santo vasudhādhipendrāḥ ।
5.52.5 ॥

rājadharmaviruddhaṁ ca lokavṛtteśca garhitam ।
tava cāsadṛśaṁ vīra kaperasya pramāpaṇam ।
5.52.6 ॥

dharmajñaśca kṛtajñaśca rājadharmaviśāradaḥ ।
parāvarajño bhūtānāṁ tvameva paramārthavit ।
5.52.7 ॥

gṛhyante yadi roṣeṇa tvādṛśo 'pi vipaścitaḥ ।
tataḥ śāstradharmavipaścittvaṁ śrama eva hi kevalam ।
5.52.8 ॥

tasmāt prasīda śatrughna rākṣasendra durāsada ।
yuktāyuktaṁ viniścitya dūtadaṇḍe vidhīyatām ।
5.52.9 ॥

vibhīṣaṇavacaḥ śrutvā rāvaṇo rākṣaseśvaraḥ ।
roṣeṇa mahatāviṣṭo vākyamuttaramabravīt ।
5.52.10 ॥

na pāpānāṁ vadhe pāpaṁ vidyate śatrusūdana ।
tasmādenaṁ vadhiṣyāmi vānaraṁ pāpacāriṇam ।
5.52.11 ॥

adharmamūlaṁ bahuroṣayuktamanāryajuṣṭaṁ vacanaṁ niśamya ।
uvāca vākyaṁ paramārthatattvaṁ vibhīṣaṇo buddhimatāṁ variṣṭhaḥ ।
5.52.12 ॥

prasīda laṅkeśvara rākṣasendra dharmārthayuktaṁ vacanaṁ śṛṇuṣva ।
dūtā na vadhyāḥ samayeṣu rājan sarveṣu sarvatra vadanti santaḥ ।
5.52.13 ॥

asaṁśayaṁ śatrurayaṁ pravṛddhaḥ kṛtaṁ hyanenāpriyamaprameyam ।
na dūtavadhyāṁ pravadanti santo dūtasya dṛṣṭā bahavo hi daṇḍāḥ ।
5.52.14 ॥

vairūpyamaṅgeṣu kaśābhighāto mauṇḍyaṁ(ḍhyaṁ) tathā lakṣaṇasannipātaḥ ।
etān hi dūte pravadanti daṇḍān vadhastu dūtasya na naḥ śruto 'pi ।
5.52.15 ॥

kathaṁ ca dharmārthavinītabuddhiḥ parāvarapratyayaniścitārthaḥ ।
bhavadvidhaḥ kopavaśe hi tiṣṭhet kopaṁ niyacchanti hi sattvavantaḥ ।
5.52.16 ॥

na dharmavāde na ca lokavṛtte na śāstrabuddhigrahaṇeṣu cāpi ।
vidyeta kaścittava vīratulyastvaṁ hyuttamaḥ sarvasurāsurāṇām ।
5.52.17 ॥

na cāpyasya kaperghāte kañcit paśyāmyahaṁ guṇam ।
teṣvayaṁ pātyatāṁ daṇḍo yairayaṁ preṣitaḥ kapiḥ ।
5.52.18 ॥

sādhurvā yadivā 'sādhuḥ paraireṣa samarpitaḥ ।
bruvan parārthaṁ paravān na dūto vadhamarhati ।
5.52.19 ॥

api cāsmin hate rājan nānyaṁ paśyāmi khecaram ।
iha yaḥ punarāgacchet paraṁ pāraṁ mahodadheḥ ।
5.52.20 ॥

tasmānnāsya vade yatnaḥ kāryaḥ parapurañjaya ।
bhavān sendreṣu deveṣu yatnamāstātumarhati ।
5.52.21 ॥

asmin vinaṣṭe nahi dūtamanyaṁ paśyāmi yastau nararājaputrau ।
yuddhāya yuddhapriya durvinītāvudyojayeddīrghapathāvaruddhau ।
5.52.22 ॥

parākramotsāhamanasvināṁ ca surāsurāṇāmapi durjayena ।
tvayā manonandana nairṛtānāṁ yuddhāyatirnāśayituṁ na yuktā ।
5.52.23 ॥

hitāśca śūrāśca samāhitāśca kuleṣu jātāśca mahāguṇeṣu ।
manasvinaḥ śastrabhṛtāṁ variṣṭhāḥ koṭyagrataste subhṛtāśca yodhāḥ ।
5.52.24 ॥

tadekadeśena balasya tāvat kecittavādeśakṛto 'bhiyāntu ।
tau rājaputrau vinigṛhya mūḍhau pareṣu te bhāvayituṁ prabhāvam ।
5.52.25 ॥

niśācarāṇāmadhipo 'nujasya vibhīṣaṇasyottamavākyamiṣṭam ।
jagrāha buddhyā suralokaśatrurmahābalo rākṣasarājamukhyaḥ ।
5.52.26 ॥