सुन्दरकाण्डम्Sundara Kāṇḍa

tataḥ sa rakṣodhipatirmahātmā hanūmatā 'kṣe nihate kumāre ।
manaḥ samādhāya tadendrakalpaṁ samādideśendrajitaṁ saroṣam ।
5.48.1 ॥

tvamastravicchastravidāṁ variṣṭhaḥ surāsurāṇāmapi śokadātā ।
sureṣu sendreṣu ca dṛṣṭakarmā pitāmahārādhana'ñcitāstraḥ ।
5.48.2 ॥

tavāstrabalamāsādya nāsurā na marudgaṇāḥ ।
na śekuḥ samare sthātuṁ sureśvarasamāśritāḥ ।
5.48.3 ॥

na kaścit triṣu lokeṣu saṁyuge nagataśramaḥ ।
bhujavīryābhiguptaśca tapasā cābhirakṣitaḥ ।
deśakālavibhāgajñastvameva matisattamaḥ ।
5.48.4 ॥

na te 'styaśakyaṁ samareṣu karmaṇā na te 'styakāryaṁ matipūrvamantraṇe ।
na so 'sti kaścit triṣu saṁgraheṣu vai na veda yaste 'strabalaṁ balaṁ ca te ।
5.48.5 ॥

mamānurūpaṁ tapaso balaṁ ca te parākramaścāstrabalaṁ ca saṁyuge ।
na tvāṁ samāsādya raṇāvamarde manaḥ śramaṁ gacchati niścitārtham ।
5.48.6 ॥

nihatāḥ kiṅkarāḥ sarve jambumālī ca rākṣasaḥ ।
amātyaputrā vīrāśca pañca senāgrayāyinaḥ ।
5.48.7 ॥

balāni susamṛddhāni sāśvanāgarathāni ca ।
sahodaraste dayitaḥ kumāro 'kṣaśca sūditaḥ ।
5.48.8 ॥

na hi teṣveva me sāro yastvayyariniṣūdana ।
5.48.9 ॥

idaṁ hi dṛṣṭvā matimanmahadbalaṁ kapeḥ prabhāvaṁ ca parākramaṁ ca ।
tvamātmanaścāpi samīkṣya sāraṁ kuruṣva vegaṁ svabalānurūpam ।
5.48.10 ॥

balāvamardastvayi sannikṛṣṭe yathā gate śāmyati śāntaśatrau ।
tathā samīkṣyātmabalaṁ paraṁ ca samārabhasvāstravidāṁ variṣṭha ।
5.48.11 ॥

na vīra senā gaṇaśocyavanti na vajramādāya viśālasāram ।
na mārutasyāsya gateḥ pramāṇaṁ na cāgnikalpaḥ karaṇena hantum ।
5.48.12 ॥

tamevamarthaṁ prasamīkṣya samyak svakarmasāmyāddhi samāhitātmā ।
smaraṁśca divyaṁ dhanuṣo 'stravīryaṁ vrajākṣataṁ karma samārabhasva ।
5.48.13 ॥

na khalviyaṁ matiḥ śreṣṭhā yattvāṁ saṁpreṣayāmyaham ।
iyaṁ ca rājadharmāṇāṁ kṣatrasya ca matirmatā ।
5.48.14 ॥

nānāśastraiśca saṁgrāme vaiśāradyamarindam ।
avaśyameva boddhavyaṁ kāmyaśca vijayo raṇe ।
5.48.15 ॥

tataḥ pitustadvacanaṁ niśamya pradakṣiṇaṁ dakṣasutaprabhāvaḥ ।
cakāra bhartāramadīnasattvo raṇāya vīraḥ pratipannabuddhiḥ ।
5.48.16 ॥

tatastaiḥ svagaṇairiṣṭairindrajat pratipūjitaḥ ।
yuddhoddhataḥ kṛtotsāhaḥ sagrāmaṁ pratyadyata ।
5.48.17 ॥

śrīmān padmapalāśākṣo rākṣasādhipateḥ sutaḥ ।
nirjagāma mahātejāḥ samudra iva parvasu ।
5.48.18 ॥

sa pakṣirājopamatulyavegairvyālaiścaturbhiḥ sitatīkṣṇadaṁṣṭraiḥ ।
rathaṁ samāyuktamasaṅgavegaṁ samārurohendrajidindrakalpaḥ ।
5.48.19 ॥

sa rathī dhanvinīṁ śreṣṭhaḥ śastrajño 'stravidāṁ varaḥ ।
rathenābhiyayau kṣipraṁ hanūmān yatra so 'bhavat ।
5.48.20 ॥

sa tasya rathanirghoṣaṁ jyāsvanaṁ kārmukasya ca ।
niśamya harivīro 'sau saṁprahṛṣṭataro 'bhavat ।
5.48.21 ॥

sumahaccāpamādāya śitaśalyāṁśca sāyakān ।
hanumantamabhipretya jagāma raṇapaṇḍitaḥ ।
5.48.22 ॥

tasmiṁstataḥ saṁyati jātaharṣe raṇāya nirgacchati bāṇapāṇau ।
diśaśca sarvāḥ babhūvarmṛgāśca raudrā bahudhā vineduḥ ।
5.48.23 ॥

samāgatāstatra tu nāgayakṣā maharṣayaścakracarāśca siddhāḥ ।
nabhaḥ samāvṛtya ca pakṣisaṅghā vineduruccaiḥ paramaprahṛṣṭāḥ ।
5.48.24 ॥

āyāntaṁ sarathaṁ dṛṣṭvā tūrṇamindrajitaṁ kapiḥ ।
vinanāda mahānādaṁ vyavardhata ca vegavān ।
5.48.25 ॥

indrajittu rathaṁ divyamāsthitaścitrakārmukaḥ ।
dhanurvisphārayāmāsa taḍidūrjitaniḥsvanam ।
5.48.26 ॥

tataḥ sametāvati tīkṣṇavegau mahābalau tau raṇanirviśaṅkau ।
kapiśca rakṣodhipateśca putraḥ surāsurendrāviva baddhavairau ।
5.48.27 ॥

sa tasya vīrasya mahārathasya dhanuṣmataḥ saṁyati saṁmatasya ।
śarapravegaṁ vyahanat pravṛddhaścacāra mārge pituraprameye ।
5.48.28 ॥

tataḥ śarānāyatīkṣṇaśalyān supatriṇaḥ kāñcanacitrapuṅkhān ।
mumoca vīraḥ paravīrahantā susannatān vajranipātavegān ।
5.48.29 ॥

tatastu tatsyandananiḥsvanaṁ ca mṛdaṅgabherīpaṭahasvanaṁ ca ।
vikṛṣyamāṇasya ca kārmukasya niśamya ghoṣaṁ punarutpapāta ।
5.48.30 ॥

śarāṇāmantareṣvāśu vyavartata mahākapiḥ ।
haristasyābhilakṣyasya moghayam̐llakṣyasaṁgraham ।
5.48.31 ॥

śarāṇaāmagratastasya punaḥ samabhivartata ।
prasārya hastau hanumānutpapātānilātmajaḥ ।
5.48.32 ॥

tāvubhau vegasampannau raṇakarmaviśāradau ।
sarvabhūtamanogrāhi cakraturyuddhamuttamam ।
5.48.33 ॥

hanūmato veda na rākṣaso 'ntaraṁ na mārutistasya mahātmano 'ntaram ।
parasparaṁ nirviṣahau babhūvatuḥ sametya tau devasamānavikramau ।
5.48.34 ॥

tatastu lakṣye sa vihanyamāne śareṣvamogheṣu ca saṁpatatsu ।
jāgama cintāṁ mahatīṁ mahātmā samādhisaṁyogasamāhitātmā ।
5.48.35 ॥

tato matiṁ rākṣasarājasūnuścakāra tasmin harivīramukhye ।
avadhyatāṁ tasya kapeḥ samīkṣya kathaṁ nigacchediti nigrahārtham ।
5.48.36 ॥

tataḥ paitāmahaṁ vīraḥ so 'stramastravidāṁ varaḥ ।
sandadhe sumahātejāstaṁ haripravaraṁ prati ।
5.48.37 ॥

avadhyo 'yamiti jñātvā tamastreṇāstratattvavit ।
nijagrāha mahābāhurmārutātmajamindrajit ।
5.48.38 ॥

tena baddhastato 'streṇa rākṣasena sa vānaraḥ ।
abhavannirviceṣṭaśca papāta ca mahītale ।
5.48.39 ॥

tato 'tha buddhvā sa tadastrabandhaṁ prabhoḥ prabhāvād vigatātmavegaḥ ।
pitāmahānugrahamātmanaśca vicintayāmāsa haripravīraḥ ।
5.48.40 ॥

tataḥ svāyambhuvairmantrairbrahmāstramabhimantritam ।
hanūmāṁścintayāmāsa varadānaṁ pitāmahāt ।
5.48.41 ॥

na me 'sya bandhasya ca śaktirasti vimokṣaṇe lokaguroḥ prabhāvāt ।
ityeva matvā vihito 'strabandho mayā ' 'tmayoneranuvartitavyaḥ ।
5.48.42 ॥

sa vīryamastrasya kapirvicārya pitāmahānugrahamātmanaśca ।
vimokṣaśaktiṁ paricintayitvā pitāmahājñāmanuvartate sma ।
5.48.43 ॥

astreṇāpi hi baddhasya bhayaṁ mama na jāyate ।
pitāmahamahendrābhyāṁ rakṣitasyānilena ca ।
5.48.44 ॥

grahaṇe cāpi rakṣobhirmahān me guṇadarśanaḥ ।
rākṣasendreṇa saṁvādastasmādagṛhṇantu māṁ pare ।
5.48.45 ॥

sa niścitārthaḥ parivīrahantā samīkṣyakārī vinivṛttaceṣṭaḥ ।
paraiḥ prasahyābhigatairnigṛhya nanāda taistaiḥ paribhartsyamānaḥ ।
5.48.46 ॥

tatastaṁ rākṣasā dṛṣṭvā nirviceṣṭamarindamam ।
babandhuḥ śaṇavalkaiśca drumacīraiśca saṁhataiḥ ।
5.48.47 ॥

sa rocayāmāsa paraiśca bandhaṁ prasahya vīrairabhinigrahaṁ ca ।
kautūhalānmāṁ yadi rākṣasendro draṣṭhuṁ vyavasyediti niścitārthaḥ ।
5.48.48 ॥

sa baddhastena valkena vimukto 'streṇa vīryavān ।
astrabandhaḥ sa cānyaṁ hi na bandhamanuvartate ।
5.48.49 ॥

athendrajittudrumacīrabaddhaṁ vicārya vīraḥ kapisattamaṁ tam ।
vimuktamastreṇa jagāma cintāṁ nānyena baddho hyanuvartate 'stram ।
5.48.50 ॥

aho mahat karma kṛtaṁ nirarthakaṁ na rākṣasairmantragatirvimṛṣṭā ।
punaśca nāstre vihate 'stramanyat pravartate saṁśayitāḥ sma sarve ।
5.48.51 ॥

astreṇa hanumān mukto nātmānamavabudhyata ।
kṛṣyamāṇastu rakṣobhistaiśca bandhernipīḍitaḥ ।
5.48.52 ॥

hanyamānastataḥ krūrai rākṣasaiḥ kāṣṭhamuṣṭibhiḥ ।
samīpaṁ rākṣasendrasya prakṛṣyata sa vānaraḥ ।
5.48.53 ॥

athendrajittaṁ prasamīkṣya muktamastreṇa baddhaṁ drumacīrasūtraiḥ ।
vyadarśayattatra mahābalaṁ haripravīraṁ sagaṇāya rājñe ।
5.48.54 ॥

taṁ mattamiva mātaṅgaṁ baddhaṁ kapivarottamam ।
rākṣasā rākṣasendrāya rāvaṇāya nyavedayan ।
5.48.55 ॥

ko 'yaṁ kasya kuto vā 'tra kiṁ kāryaṁ ko vyapāśrayaḥ ।
iti rākṣasavīrāṇāṁ tatra saṁjajñire kathāḥ ।
5.48.56 ॥

hanyatāṁ dahyatāṁ vāpi bhakṣyatāmiti cāpare ।
rākṣasāstatra saṁkruddhāḥ parasparamathābruvan ।
5.48.57 ॥

atītya mārgaṁ sahasā mahātmā sa tatra rakṣodhipapādamūle ।
dadarśa rājñaḥ paricāravṛddhān gṛhaṁ mahāratnavibhūṣitaṁ ca ।
5.48.58 ॥

sa dadarśa mahātejā rāvaṇaḥ kapisattamam ।
rakṣobhirvikṛtākāraiḥ kṛṣyamāṇamitastataḥ ।
5.48.59 ॥

rākṣasādhipatiṁ cāpi dadarśa kapisattamaḥ ।
tejobalasamāyuktaṁ tapantamiva bhāskaram ।
5.48.60 ॥

sa roṣasaṁvartitatāmradṛṣṭirdaśānanastaṁ kapimanvavekṣya ।
athopaviṣṭān kulaśīlavṛddhān samādiśattaṁ prati mantrimukhyān ।
5.48.61 ॥

yathākramaṁ taiḥ sa kapirvipṛṣṭaḥ kāryārthamarthasya ca mūlamādau ।
nivedayāmāsa harīśvarasya dūtaḥ sakāśādahamāgato 'smi ।
5.48.62 ॥