सुन्दरकाण्डम्Sundara Kāṇḍa

tataḥ pakṣininādena vṛkṣabhaṅgasvanena ca ।
babhūvustrāsasaṁbhrāntāḥ sarve laṅkānivāsinaḥ ।
5.42.1 ॥

vidrutāśca bhayatrastā vinedurmṛgapakṣiṇaḥ ।
rakṣasāṁ ca nimittāni krūrāṇi pratipedire ।
5.42.2 ॥

tato gatāyāṁ nidrāyāṁ rākṣasyo vikṛtānanāḥ ।
tadvanaṁ dadṛśurbhagnaṁ taṁ ca vīraṁ mahākapim ।
5.42.3 ॥

sa tā dṛṣṭvā mahābāhūrmahāsattvo mahābalaḥ ।
cakāra sumahadrūpaṁ rākṣasīnāṁ bhayāvaham ।
5.42.4 ॥

tatastaṁ girisaṅkāśamatikāyaṁ mahābalam ।
rākṣasyo vānaraṁ dṛṣṭvā papracchurjanakātmajām ।
5.42.5 ॥

ko 'yaṁ kasya kuto vā 'yaṁ kiṁnimittamihāgataḥ ।
kathaṁ tvayā sahānena saṁvādaḥ kṛta ityuta ।
5.42.6 ॥

ācakṣva no viśālākṣi mā bhūtte subhage bhayam ।
saṁvādamasitāpāṅge tvayā kiṁ kṛtavānayam ।
5.42.7 ॥

athābravīttadā sādhvī sītā sarvāṅgasundarī ।
rakṣasāṁ bhīmarūpāṇāṁ vijñāne mama kā gatiḥ ।
5.42.8 ॥

yūyamevābhijānīta yo 'yaṁ yadvā kariṣyati ।
ahireva hyaheḥ pādān vijānāti na saṁśayaḥ ।
5.42.9 ॥

ahamapyasya bhītā 'smi nainaṁ jānāmi konvayam ।
vedmi rākṣasamevainaṁ kāmarūpiṇamāgatam ।
5.42.10 ॥

vaidehyā vacanaṁ śrutvā rākṣasyo vidrutā diśaḥ ।
sthitāḥ kāścidgatāḥ kāścidrāvaṇāya niveditum ।
5.42.11 ॥

rāvaṇasya samīpe tu rākṣasyo vikṛtānanāḥ ।
virūpaṁ vānaraṁ bhīmamākhyātumupacakramuḥ ।
5.42.12 ॥

aśokavanikāmadhye rājan bhīmavapuḥ kapiḥ ।
sītayā kṛtasaṁvādastadiṣṭhatyamitavikramaḥ ।
5.42.13 ॥

na ca taṁ jānakī sītā hariṁ hariṇalocanā ।
asmābhirbahudhā pṛṣṭā nivedayitumicchiti ।
5.42.14 ॥

vāsavasya bhaveddūto dūto vaiśravaṇasya vā ।
preṣito vā 'pi rāmeṇa sītānveṣaṇakāṅkṣayā ।
5.42.15 ॥

tena tvadbhutarūpeṇa yattattava manoharam ।
nānāmṛgagaṇākīrṇaṁ pramṛṣṭaṁ pramadāvanam ।
5.42.16 ॥

na tatra kaściduddeśo yastena na vināśitaḥ ।
yatra sā jānakī sītā sa tena na vināśitaḥ ।
5.42.17 ॥

jānakīrakṣaṇārthaṁ vā śramādvā nopalabhyate ।
athavā kaḥ śramastasya saiva tenābhirakṣitā ।
5.42.18 ॥

cārupallavapuṣpāḍhyaṁ yaṁ sītā svayamāsthitā ।
pravṛddhaḥ śiṁśupāvṛkṣaḥ sa ca tenābhirakṣitaḥ ।
5.42.19 ॥

tasyograrūpasyogra tvaṁ daṇḍamājñātumarhasi ।
sītā saṁbhāṣitā yena tadvanaṁ ca vināśitam ।
5.42.20 ॥

manaḥparigṛhītāṁ tāṁ tava rakṣogaṇeśvara ।
kaḥ sītāmabhibhāṣeta yo na syāttyaktajīvitaḥ ।
5.42.21 ॥

rākṣasīnāṁ vacaḥ śrutvā rāvaṇo rākṣaseśvaraḥ ।
hutāgniriva jajvāla kopasaṁvartitekṣaṇaḥ ।
5.42.22 ॥

tasya kruddhasya netrābhyāṁ prāpatannāsrabindavaḥ ।
dīptābhyāmiva dīpābhyāṁ sārciṣaḥ snehabindavaḥ ।
5.42.23 ॥

ātmanaḥ sadṛśāñchūrān kiṅkarānnāma rākṣasān ।
vyādideśa mahātejā nigrahārthaṁ hanūmataḥ ।
5.42.24 ॥

teṣāmaśītisāhasraṁ kiṅkarāṇāṁ tarasvinām ।
5.42.25 ॥

niryayurbhavanāt tasmātkūṭamudgarapāṇayaḥ ।
mahodarā mahādaṁṣṭrā ghorarūpā mahābalāḥ ।
yuddhābhimanasaḥ sarve hanumadgrahaṇonmukhāḥ ।
5.42.26 ॥

te kapīndraṁ samāsādya toraṇasthamavasthitam ।
abhipeturmahāvegāḥ pataṅgā iva pāvakam ।
5.42.27 ॥

te gadābhirvicitrābhiḥ parighaiḥ kāñcanāṅgadaiḥ ।
ājaghnurvānaraśreṣṭhaṁ śaraiścādityasannibhaiḥ ।
5.42.28 ॥

mudgaraiḥ paṭṭiśaiḥ śūlaiḥ prāsatomaraśaktibhiḥ ।
parivārya hanūmantaṁ sahasā tasthuragrataḥ ।
5.42.29 ॥

hanumānapi tejasvī śrīmān parvatasannibhiḥ ।
kṣitāvāvidhya lāṁgūlaṁ nanāda ca mahāsvanam ।
5.42.30 ॥

sa bhūtvā sumahākāyo hanumān mārutātmajaḥ ।
dhṛṣṭamāsphoṭayāmāsa laṅkāṁ śabdena pūrayan ।
5.42.31 ॥

tasyāsphoṭitaśabdena mahatā sānunādinā ।
peturvihaṅgā gaganāduccaiścedamaghoṣayat ।
5.42.32 ॥

jayatyatibalo rāmo lakṣmaṇaśca mahābalaḥ ।
rājā jayati sugrīvo rāghaveṇābhipālitaḥ ।
5.42.33 ॥

dāso 'haṁ kosalendrasya rāmasyākliṣṭakarmaṇaḥ ।
hanumān śatrusainyānāṁ nihantā mārutātmajaḥ ।
5.42.34 ॥

na rāvaṇasahasraṁ me yuddhe pratibalaṁ bhavet ।
śilābhistu praharataḥ pādapaiśca sahasraśaḥ ।
5.42.35 ॥

ardayitvā purīṁ laṅkāmabhivādya ca maithilīm ।
samṛddhārtho gamiṣyāmi miṣatāṁ sarvarakṣasām ।
5.42.36 ॥

tasya sannādaśabdena te 'bhavan bhayaśaṅkitāḥ ।
dadṛśuśca hanūmantaṁ sandhyāmeghamivonnatam ।
5.42.37 ॥

svāmisandeśaniśśaṅkāstataste rākṣasāḥ kapim ।
citraiḥ praharaṇairbhīmairabhipetustatastataḥ ।
5.42.38 ॥

sa taiḥ parivṛtaḥ śūraiḥ sarvataḥ sa mahābalaḥ ।
āsasādāyasaṁ bhīmaṁ parighaṁ toraṇāśritam ।
sa taṁ parighamādaya jaghāna rajanīcarān ।
5.42.39 ॥

sa pannagamivādāya sphurantaṁ vinatāsutaḥ ।
vicacārāmbare vīraḥ parigṛhya ca mārutiḥ ।
5.42.40 ॥

sa hatvā rākṣasān vīrān kiṅkarān mārutātmajaḥ ।
yuddhākāṅkṣī punarvīrastoraṇaṁ samupāśritaḥ ।
5.42.41 ॥

tatastasmādbhayānmuktāḥ katicittatra rākṣasāḥ ।
nihatān kiṅkarān sarvān rāvaṇāya nyavedayan ।
5.42.42 ॥

sa rākṣasānāṁ nihataṁ mahadbalaṁ niśamya rājā parivṛttalocanaḥ ।
samādideśāpratimaṁ parākrame prahasta putraṁ samare sudurjayam ।
5.42.43 ॥