सुन्दरकाण्डम्Sundara Kāṇḍa

maṇiṁ dattvā tataḥ sītā hanumantamathābravīti ।
abhijñānamabhijñātametadrāmasya tattvataḥ ।
5.39.1 ॥

maṇiṁ tu dṛṣṭvā rāmo vai trayāṇāṁ saṁsmariṣyati ।
vīro jananyā mama ca rājño daśarathasya ca ।
5.39.2 ॥

sa bhūyastvaṁ samutsāhe codito harisattama ।
asmin kāryasamārambhe pracintaya yaduttaram ।
5.39.3 ॥

tvamasmin kāryaniryoge pramāṇaṁ harisattama ।
hanuman yatnamāsthāya duḥkhakṣayakaro bhava ।
tasya cintayato yatno duḥkhakṣayakaro bhavet ।
5.39.4 ॥

sa tatheti pratijñāya mārutirbhīmavikramaḥ ।
śirasā ' 'vandya vaidehīṁ gamanāyopacakrame ।
5.39.5 ॥

jñatvā saṁprasthitaṁ devī vānaraṁ mārutātmajam ।
bāṣpagadgadayā vācā maithilī vākyamabravīt ।
5.39.6 ॥

kuśalaṁ hanuman brūyāḥ sahitau rāmalakṣmaṇau ।
5.39.7 ॥

sugrīvaṁ ca sahāmātyaṁ vṛddhān sarvāṁśca vārarān ।
brūyāstvaṁ vānaraśreṣṭha kuśalaṁ dharmasaṁhitam ।
5.39.8 ॥

yathā sa ca mahābāhurmāṁ tārayati rāghavaḥ ।
asmādduḥkhāmbusaṁrodhāttvaṁ samādhātumarhasi ।
5.39.9 ॥

jīvantīṁ māṁ yathā rāmaḥ sambhāvayati kīrtimān ।
tattathā hanuman vācyaṁ vācā dharmamavāpnuhi ।
5.39.10 ॥

nityamutsāhayuktāśca vācaḥ śrutvā tvayeritāḥ ।
vardhiṣyate dāśaratheḥ pauruṣaṁ madavāptaye ।
5.39.11 ॥

matsandeśayutā vācastvattaḥ śrutvaiva rāghavaḥ ।
parākramavidhiṁ vīro vidhivat saṁvidhāsyati ।
5.39.12 ॥

sītāyā vacanaṁ śrutvā hanumān mārutātmajaḥ ।
śirasyañjalimādhāya vākyamuttarabravīt ।
5.39.13 ॥

kṣiprameṣyati kākutstho haryṛkṣapravarairvṛtaḥ ।
yaste yudhi vijityārīn śokaṁ vyapanayiṣyati ।
5.39.14 ॥

nahi paśyāmi martyeṣu nāsureṣu sureṣu vā ।
yastasya kṣipato bāṇān sthātumutsahato 'grataḥ ।
5.39.15 ॥

apyarkamapi parjanyamapi vaivasvataṁ yamam ।
sahi soḍhuṁ raṇe śaktastava hetorviśeṣataḥ ।
5.39.16 ॥

sa hi sāgaraparyantāṁ mahīṁ śāsitumīhate ।
tvannimitto hi rāmasya jayo janakanandini ।
5.39.17 ॥

tasya tadvacanaṁ śrutvā samyak satyaṁ subhāṣitam ।
jānakī bahumene 'tha vacanaṁ cedamabravīt ।
5.39.18 ॥

tatastaṁ prasthitaṁ sītā vīkṣamāṇā punaḥ punaḥ ।
bhartṛsnehānvitaṁ vākyaṁ sauhārdādanumānayat ।
5.39.19 ॥

yadi vā manyase vīra vasaikāhamarindama ।
kasmiṁścit saṁvṛte deśe viśrāntaḥ śvo gamiṣyasi ।
5.39.20 ॥

mama cedalpabhāgyāyāḥ sānnidhyāttava vānara ।
asya śokasya mahato muhūrtaṁ mokṣaṇaṁ bhavet ।
5.39.21 ॥

gate hi hariśārdūla punarāgamanāya tu ।
prāṇānāmapi sandeho mama syānnātra saṁśayaḥ ।
5.39.22 ॥

tavādarśanajaḥ śoko bhūyo māṁ paritāpayet ।
duḥkhādduḥkhaparāmṛṣṭāṁ dīpayanniva vānara ।
5.39.23 ॥

ayaṁ ca vīra sandehastiṣṭhatīva mamāgrataḥ ।
sumahāṁstvatsahāyeṣu haryṛkṣeṣu harīśvara ।
5.39.24 ॥

kathaṁ nu khalu duṣpāraṁ tariṣyanti mahodadhim ।
tāni haryṛkṣasainyāni tau vā naravarātmajau ।
5.39.25 ॥

trayāṇāmeva bhūtānāṁ sāgarasyāsya laṅghane ।
śaktiḥ syādvainateyasya tava vā mārutasya vā ।
5.39.26 ॥

tadasmin kāryaniryoge vīraivaṁ duratikrame ।
kiṁ paśyasi samādhānaṁ tvaṁ hi kāryavidāṁ varaḥ ।
5.39.27 ॥

kāmamasya tvamevaikaḥ kāryasya parisādhane ।
paryāptaḥ paravīraghna yaśasyaste phalodayaḥ ।
5.39.28 ॥

balaiḥ samagrairyadi māṁ rāvaṇaṁ jityasaṁyuge ।
vijayī svapurīṁ yāyāt tattu me syādyaśaskaram ।
5.39.29 ॥

śaraistu saṅkulāṁ kṛtvā laṅkāṁ parabalārdanaḥ ।
māṁ yedyadi kākutsthastattasya sadṛśaṁ bhavet ।
5.39.30 ॥

tadyathā tasya vikrāntamanurūpaṁ mahātmanaḥ ।
bhavedāhavaśūrasya tathā tvamupapādaya ।
5.39.31 ॥

tadarthopahitaṁ vākyaṁ sahitaṁ hetusaṁhitam ।
niśamya hanumān śeṣaṁ vākyamuttaramabravīt ।
5.39.32 ॥

devi haryṛkṣasainyānāmīśvaraḥ plavatāṁ varaḥ ।
sugrīvaḥ sattvasampannastavārthe kṛtaniścayaḥ ।
5.39.33 ॥

sa vānarasahasrāṇāṁ koṭībhirabhisaṁvṛtaḥ ।
kṣiprameṣyati vaidehi rākṣasānāṁ nibarhaṇaḥ ।
5.39.34 ॥

tasya vikramasampannāssattvavanto mahābalāḥ ।
manassaṅkalpasaṁpātā nideśe harayaḥ sthitāḥ ।
5.39.35 ॥

yeṣāṁ nopari nādhastānna tiryak sajjate gatiḥ ।
na ca karmasu sīdanti mahatsvamitatejasaḥ ।
5.39.36 ॥

asakṛt tairmahotsāhaiḥ sasāgaradharādharā ।
pradakṣiṇīkṛtā bhūmirvāyumārgānusāribhiḥ ।
5.39.37 ॥

madviśiṣṭāśca tulyāśca santi tatra vanaukasaḥ ।
mattaḥ pratyavaraḥ kaścinnāsti sugrīvasannidhau ।
5.39.38 ॥

ahaṁ tāvadiha prāptaḥ kiṁ punaste mahābalāḥ ।
nahi prakṛṣṭāḥ preṣyante preṣyante hītare janāḥ ।
5.39.39 ॥

tadalaṁ paritāpena devi śoko vyapaitu te ।
ekotpātena te laṅkāmeṣyanti hariyūthapāḥ ।
5.39.40 ॥

mama pṛṣṭhagatau tau ca candrasūryāvivoditau ।
tvatsakāśaṁ mahāsattvau nṛsiṁhāvāgamiṣyataḥ ।
5.39.41 ॥

tau hi vīrau naravarau sahitau rāmalakṣmaṇau ।
āgamya nagarīṁ laṅkāṁ sāyakairvidhamiṣyataḥ ।
5.39.42 ॥

sagaṇaṁ rāvaṇaṁ hatvā rāghavo raghunandanaḥ ।
tvāmādāya varārohe svapuraṁ pratiyāsyati ।
5.39.43 ॥

tadāśvasihi bhadraṁ te bhava tvaṁ kālakāṅkṣiṇī ।
nacirāddrakṣyase rāmaṁ prajvalantimivānalam ।
5.39.44 ॥

nihate rākṣasendre 'smin saputrāmātyabāndhave ।
tvaṁ sameṣyasi rāmeṇa śaśāṅkeneva rohiṇī ।
5.39.45 ॥

kṣipraṁ tvaṁ devi śokasya pāraṁ yāsyasi maithili ।
rāvaṇaṁ caiva rāmeṇa nihataṁ drakṣyase 'cirāt ।
5.39.46 ॥

evamāśvāsya vaidehīṁ hanumān mārutātmajaḥ ।
gamanāya matiṁ kṛtvā vaidehīṁ punarabravīt ।
5.39.47 ॥

tamarighnaṁ kṛtātmānaṁ kṣipraṁ drakṣyasi rāghavam ।
lakṣmaṇaṁ ca dhanuṣpāṇiṁ laṅkādvāramupasthitam* ।
5.39.48 ॥

nakhadaṁṣṭrāyudhān vīrān siṁhaśārdūlavikramān ।
vānarān vāraṇendrābhān kṣipra drakṣyasi saṅgatān ।
5.39.49 ॥

śailāmbudanikāśānāṁ laṅkāmalayasānuṣu ।
nardatāṁ kapimukhyānāmārye yūthānyanekaśaḥ ।
5.39.50 ॥

sa tu marmaṇi ghoreṇa tāḍito manmatheṣuṇā ।
na śarma labhate rāmaḥ siṁhārdita iva dvipaḥ ।
5.39.51 ॥

mā rudo devi śokena mā bhūt te manaso 'priyam ।
śacīva patyā śakreṇa bhartrā nāthavatī hyasi ।
5.39.52 ॥

rāmād viśiṣṭaḥ ko 'nyo 'sti kaścit saumitriṇā samaḥ ।
agnimārutakalpau tau bhrātarau tava saṁśrayau ।
5.39.53 ॥

nāsmiṁściraṁ vatsyasi devi deśe rakṣogaṇairadhyuṣite 'tiraudre ।
na te cirādāgamanaṁ priyasya kṣamasva matsaṅgamakālamātram ।
5.39.54 ॥