सुन्दरकाण्डम्Sundara Kāṇḍa

sītā tadvacanaṁ śrutvā pūrṇacandranibhānanā ।
hanūmantamuvācedaṁ dharmārthasahitaṁ vacaḥ ।
5.37.1 ॥

amṛtaṁ viṣasaṁsṛṣṭaṁ tvayā vānarabhāṣitam ।
yacca nānyamanā rāmo yacca śokaparāyaṇaḥ ।
5.37.2 ॥

aiśvarye vā suvistīrṇe vyasane vā sudāruṇe ।
rajjveva puruṣaṁ baddhvā kṛtāntaḥ parikarṣati ।
5.37.3 ॥

vidhirnūnamasaṁhārthaḥ prāṇināṁ plavagottama ।
saumitriṁ māṁ ca rāmaṁ ca vyasanaiḥ paśya mohitān ।
5.37.4 ॥

śokasyāsya kadā pāraṁ rāghavo 'dhigamiṣyati ।
plavamānaḥ pariśrānto hatanauḥ sāgare yathā ।
5.37.5 ॥

rākṣasānāṁ vadhaṁ kṛtvā sūdayitvā ca rāvaṇam ।
laṅkāmunmūlitāṁ kṛtvā kadā drakṣyati māṁ patiḥ ।
5.37.6 ॥

sa vācyaḥ santvarasveti yāvadeva na pūryate ।
ayaṁ saṁvatsaraḥ kālastāvaddhi mama jīvitam ।
5.37.7 ॥

vartate daśamo māso dvau tu śeṣau plavaṅgama ।
rāvaṇena nṛśaṁsena samayo yaḥ kṛto mama ।
5.37.8 ॥

vibhīṣaṇena ca bhrātrā mama niryātanaṁ prati ।
anunītaḥ prayatnena na ca tat kurute matim ।
5.37.9 ॥

mama pratipradānaṁ hi rāvaṇasya na rocate ।
rāvaṇaṁ mārgate saṅkhye mṛtyuḥ kālavaśaṁ gatam ।
5.37.10 ॥

jyeṣṭā kanyā 'nalā nāma vibhīṣaṇasutā kape ।
tayā mamedamākhyātaṁ mātrā prahitayā svayam ।
5.37.11 ॥

asaṁśayaṁ hariśreṣṭha kṣipraṁ māṁ prāpsyate patiḥ ।
antarātmā hi me śuddhastasmiṁśca bahavo guṇāḥ ।
5.37.12 ॥

utsāhaḥ pauruṣaṁ sattvamānṛśaṁsyaṁ kṛtajñatā ।
vikramaśca prabhāvaśca santi vānara rāghave ।
5.37.13 ॥

caturdaśa sahasrāṇi rākṣasānāṁ jaghāna yaḥ ।
janasthāne vinā bhrātrā śatruḥ kastasya nodvijet ।
5.37.14 ॥

na sa śakyastulayituṁ vyasanaiḥ puruṣarṣabhaḥ ।
ahaṁ tasya prabhāvajñāśakrasyeva pulomajā ।
5.37.15 ॥

śarajālāṁśumāñchūraḥ kape rāmadivākaraḥ ।
śatrurakṣomayaṁ toyamupaśoṣaṁ nayiṣyati ।
5.37.16 ॥

iti saṁjalpamānāṁ tāṁ rāmārthe śokakarśitām ।
aśrusampūrṇanayanāmuvāca vacanaṁ kapiḥ ।
5.37.17 ॥

kṛtvaiva tu vayo mahyaṁ kṣiprameṣyati rāghavaḥ ।
camūṁ prakarṣan mahatīṁ haryṛkṣagaṇasaṅkulām ।
5.37.18 ॥

athavā mocayiṣyāmi tvāmadyaiva varānane ।
asmādduḥkhādupāroha mama pṛṣṭhamanindite ।
5.37.19 ॥

tvāṁ tu pṛṣṭhagatāṁ kṛtvā santariṣyāmi sāgaram ।
śaktirasti hi me voḍhuṁ laṅkāmapi sarāvaṇām ।
5.37.20 ॥

drakṣyasyadyaiva vaidehi rāghavaṁ saha lakṣmaṇam ।
vyavasāyasamāyuktaṁ viṣṇuṁ daityavade yathā ।
5.37.22 ॥

tvaddarśanakṛtotsāhamāśramasthaṁ mahābalam ।
purandaramivāsīnaṁ nākarājasya mūrdhani ।
5.37.23 ॥

pṛṣṭhamāroha me devi mā vikāṅkṣasva śobhane ।
yogamanviccha rāmeṇa śaśāṅkeneva rohiṇī ।
5.37.24 ॥

kathayantīva candreṇa sūryeṇa ca mahārciṣā ।
matpṛṣṭamadhiruhya tvaṁ tarākāśamahārṇavau ।
5.37.25 ॥

na hi me saṁprayātasya tvāmito nayato 'ṅgane ।
anugantuṁ gatiṁ śaktāḥ sarve laṅkānivāsinaḥ ।
5.37.26 ॥

yathaivāhamiha prāptastathaivāhamasaṁśayaḥ ।
yāsyāmi paśya vaidehi tvāmudyamya vihāyasam ।
5.37.27 ॥

maithilī tu hariśreṣṭhāt śrutvā vacanamadbhutam ।
harṣavismitasarvāṅgī hanumantamathābravīt ।
5.37.28 ॥

hanuman dūramadhvānaṁ kathaṁ māṁ voḍhumicchasi ।
tadeva khalu te manye kapitvaṁ hariyūthapa ।
5.37.29 ॥

kathaṁ vā 'lpaśarīrastvaṁ māmito netumicchasi ।
sakāśaṁ mānavendrasya bharturme plavagarṣabha ।
5.37.30 ॥

sītāyā vacanaṁ śrutvā hanumān mārutātmajaḥ ।
cintayāmāsa lakṣmīvān navaṁ paribhavaṁ kṛtam ।
5.37.31 ॥

na me jānāti sattvaṁ vā prabhāvaṁ vā 'sitekṣaṇā ।
tasmāt paśyatu vaidahī yadrūpaṁ mama kāmataḥ ।
5.37.32 ॥

iti sañcintya hanumāṁstadā plavagasattamaḥ ।
darśayāmāsa vaidehyāḥ svarūpamarimardanaḥ ।
5.37.33 ॥

sa tasmāt pādapāddhīmānāplutya plavagarṣabhaḥ ।
tato vardhitumārebhe sītāpratyayakāraṇāt ।
5.37.34 ॥

merumandarasaṅkāśo babhau dīptānalaprabhaḥ ।
agrato vyavatasthe ca sītāyā vānarottamaḥ ।
5.37.35 ॥

hariḥ parvatasaṅkāśastāmravaktro mahābalaḥ ।
vajradaṁṣṭranakho bhīmo vaidehīmidamabravīt ।
5.37.36 ॥

saparvatavanoddeśāṁ sāṭṭaprakāratoraṇām ।
laṅkāmimāṁ sanāthāṁ va nayituṁ śaktirasti me ।
5.37.37 ॥

tadavasthāpyatāṁ buddhiralaṁ devi vikāṅkṣayā ।
viśokaṁ kuru vaidehi rāghavaṁ sahalakṣmaṇam ।
5.37.38 ॥

taṁ dṛṣṭvā bhīmasaṅkāśamuvāca janakātmajā ।
padmapatraviśālākṣī mārutasyaurasaṁ sutam ।
5.37.39 ॥

tava sattvaṁ balaṁ caiva vijānāmi mahākape ।
vāyoriva gatiṁ cāpi tejaścāgnerivādbhutam ।
5.37.40 ॥

prākṛto 'nyaḥ kathaṁ cemāṁ bhūmimāgantumarhati ।
udadheraprameyasya pāraṁ vānarapuṅgava ।
5.37.41 ॥

jānāmi gamane śaktiṁ nayane cāpi te mama ।
avaśyaṁ saṁpradhāryāśu kāryasiddhirmahātmanaḥ ।
5.37.42 ॥

ayuktaṁ tu kapiśreṣṭha mama gantuṁ tvayā 'nagha ।
vāyuvegasavegasya vego māṁ mohayettava ।
5.37.43 ॥

ahamākāśamāpannā hyuparyupari sāgaram ।
prapateyaṁ hi te pṛṣṭhādbhayād vegena gacchataḥ ।
5.37.44 ॥

patitā sāgare cāhaṁ timinakrajhaṣākule ।
bhaveyamāśu vivaśā yādasāmannamuttamam ।
5.37.45 ॥

na ca śakṣye tvayā sārdhaṁ gantuṁ śatruvināśana ।
kalatravati sandehastvayyapi syādasaṁśayaḥ ।
5.37.46 ॥

hriyamāṇaṁ tu māṁ dṛṣṭvā rākṣasā bhīmavikramāḥ ।
anugaccheyurādiṣṭā rāvaṇena durātmanā ।
5.37.47 ॥

taistvaṁ parivṛtaḥ śūraiḥ śūlamudgarapāṇibhiḥ ।
bhavestvaṁ saṁśayaṁ prāpto mayā vīra kalatravān ।
5.37.48 ॥

sāyudhā bahavo vyomni rākṣasāstvaṁ nirāyudhaḥ ।
kathaṁ śakṣyasi saṁyātuṁ māṁ caiva parirakṣitum ।
5.37.49 ॥

yuddhyamānasya rakṣobhistava taiḥ krūrakarmabhiḥ ।
prapateyaṁ hi te pṛṣṭhād bhayārtā kapisattama ।
5.37.50 ॥

atha rakṣāṁsi bhīmāni mahānti balavanti ca ।
kathaṁcit sāmparāye tvāṁ jayeyuḥ kapisattama ।
5.37.51 ॥

athavā yuddhyamānasya pateyaṁ vimukhasya te ।
patitāṁ ca gṛhītvā māṁ nayeyuḥ pāparākṣasāḥ ।
5.37.52 ॥

māṁ vā hareyustvaddhastād viśaseyurathāpi vā ।
avyavasthau hi dṛśyete yuddhe jayaparājayau ।
5.37.53 ॥

ahaṁ vāpi vipadyeyaṁ rakṣobhirabhitarjitā ।
tvatprayatno hariśroṣṭha bhavenniṣphala eva tu ।
5.37.54 ॥

kāmaṁ tvamasi paryāptau nihantuṁ sarvarākṣasān ।
rāghavasya yaśo hīyettvayā śastaistu rākṣasaiḥ ।
5.37.55 ॥

athavā ' 'dāya rakṣāṁsi nyaseyuḥ saṁvṛte hi mām ।
yatra te nābhijānīyurharayo nāpi rāghavau ।
ārambhastu madartho 'yaṁ tatastava nirarthakaḥ ।
5.37.56 ॥

tvayā hi saha rāmasya mahānāgamane guṇaḥ ।
5.37.57 ॥

mayi jīvitamāyattaṁ rāghavasya mahātmanaḥ ।
bhrāta'ṇāṁ ca mahābāho tava rājakulasya ca ।
5.37.58 ॥

tau nirāśau madarthaṁ tu śokasantāpakarśitau ।
saha sarvarkṣaharibhistyakṣyataḥ prāṇasaṁgraham ।
5.37.59 ॥

bhartṛmaktiṁ puraskṛtya rāmādanyasya vānara ।
na spṛśāmi śarīraṁ tu puṁso vārarapuṅgavaḥ ।
5.37.60 ॥

yadahaṁ gātrasaṁsparśaṁ rāvaṇasya balādgatā ।
anīśā kiṁ kariṣyāmi vināthā vivaśā satī ।
5.37.61 ॥

yadi rāmo daśagrīvamiha hatvā sabāndhavam ।
māmito gṛhya gaccheta tattasya sadṛśaṁ bhavet ।
5.37.62 ॥

śrutā hi dṛṣṭāśca mayā parākramā mahātmanastasya raṇāvamardinaḥ ।
na devagandharvabhujaṅgarākṣasā bhavanti rāmeṇa samā hi saṁyuge ।
5.37.63 ॥

samīkṣya taṁ saṁyati citrakārmukaṁ mahābalaṁ vāsavatulyavikramam ।
salakṣmaṇaṁ ko viṣaheta rāghavaṁ hutāśanaṁ dīptamivānileritam ।
5.37.64 ॥

salakṣmaṇaṁ rāghavamājimardanaṁ diśāgajaṁ mattamiva vyavasthitam ।
saheta ko vānaramukhya saṁyuge yugāntasūryapratimaṁ śarārciṣam ।
5.37.65 ॥

sa me hariśreṣṭha salakṣmaṇaṁ patiṁ sayūthapaṁ kṣipramihopapādaya ।
cirāya rāmaṁ prati śokakarśitāṁ kuruṣva māṁ vānaramukhya harṣitām ।
5.37.66 ॥