सुन्दरकाण्डम्Sundara Kāṇḍa

tāṁ tu rāmakathāṁ śrutvā vaidehī vānarārṣabhāt ।
uvāca vacanaṁ sāntvamidaṁ madhurayā girā ।
5.35.1 ॥

kva te rāmeṇa saṁsargaḥ kathaṁ jānāsi lakṣmaṇam ।
vānarāṇāṁ narāṇāṁ ca kathamāsīt samāgamaḥ ।
5.35.2 ॥

yāni rāmasya liṅgāni lakṣmaṇasya ca vānara ।
tāni bhūyaḥ samācakṣva na māṁ śokaḥ samāviśet ।
5.35.3 ॥

kīdṛśaṁ tasya saṁsthānaṁ rūpaṁ rāmasya kīdṛśam ।
kathamūrū kathaṁ bāhū lakṣmaṇasya ca śaṁsa me ।
5.35.4 ॥

evamuktastu vaidehyā hanumān mārutātmajaḥ ।
tato rāmaṁ yathāttvamākhyātumupacakrame ।
5.35.5 ॥

jānantī bata diṣṭyā māṁ vaidehi paripṛcchasi ।
bhartuḥ kamalapatrākṣi saṁsthānaṁ lakṣmaṇasya ca ।
5.35.6 ॥

yāni rāmasya cihnāni lakṣmaṇasya ca yāni vai ।
lakṣitāni viśālākṣi vadataḥ śṛṇu tāni me ।
5.35.7 ॥

rāmaḥ kamalapatrākṣaḥ sarvasattvamanoharaḥ ।
rūpadākṣiṇyasampannaḥ prasūto janakātmaje ।
5.35.8 ॥

tejasā ' 'dityasaṅkāśaḥ kṣamayā pṛthivīsamaḥ ।
bṛhaspatisamo buddhyā yaśasā vāsavopamaḥ ।
5.35.9 ॥

rakṣitā jīvalokasya svarajanasyābhirakṣitā ।
rakṣitā svasya vṛttasya dharmasya ca parantapaḥ ।
5.35.10 ॥

rāmo bhāmini lokasya cāturvarṇyasya rakṣitā ।
maryādānāṁ ca lokasya kartā kārayitā ca saḥ ।
5.35.11 ॥

arciṣmānarcito 'tyarthaṁ brahmacaryavrate sthitaḥ ।
sādhūnāmupakārajñaḥ pracārajñaśca karmaṇām ।
5.35.12 ॥

rājavidyāvinītaśca brāhmaṇānāmupāsitā ।
śrutavān śīlasampanno vinītaśca parantapaḥ ।
5.35.13 ॥

yajurvedavinītaśca vedavidbhiḥ supūjitaḥ ।
dhanurvede ca vedeṣu vedāṅgeṣu ca niṣṭhitaḥ ।
5.35.14 ॥

vipulāṁso mahābāhuḥ kambugrīvaḥ śubhānanaḥ ।
gūḍhajatruḥ sutāmrākṣo rāmo devi janaiḥ śrutaḥ ।
5.35.15 ॥

dundubhisvananirghoṣaḥ snigdhavarṇaḥ pratāpavān ।
samaḥ samavibhaktāṅgo varṇaṁ śyāmaṁ samāśritaḥ ।
5.35.16 ॥

tristhirastripralambaśca trisamastriṣu connataḥ ।
tritāmrastriṣu ca snigdho gambhīrastriṣu nityaśaḥ ।
5.35.17 ॥

trivalīvāṁstryavanataścaturvyaṅgastriśīrṣavān ।
catuṣkalaścaturlekhaścatuṣkiṣkuścatuḥ samaḥ ।
5.35.18 ॥

caturdaśasamadvandvaścaturdaṁṣṭraścaturvargatiḥ ।
mahoṣṭhahanunāsaśca pañcasnigdho 'ṣṭavaṁśavān ।
5.35.19 ॥

daśapadmo daśabṛhat tribhirvyāpto dviśuklavān ।
ṣaḍunnato navatanustribhirvāpnoti rāghavaḥ ।
5.35.20 ॥

satyadharmaparaḥ śrīmān saṁgrahānugrahe rataḥ ।
deśakālavibhāgajñaḥ sarvalokapriyaṁvadaḥ ।
5.35.21 ॥

bhrātā ca tasya dvaimātraḥ saumitriraparājitaḥ ।
anurāgeṇa rūpeṇa guṇaiścaiva tathāvidhaḥ ।
5.35.22 ॥

tāvubhau naraśārdūlau tvaddarśanasamutsukau ।
vicinvantau mahīṁ kṛtsnāmasmābhirabhisaṅgatau ।
5.35.23 ॥

tvāmeva mārgamāṇau tau vicarantau vasundharām ।
dadarśaturmṛgapatiṁ pūrvajenāvaropitam ।
5.35.24 ॥

ṛśyamūkasya pṛṣṭhe tu bahupādapasaṅkule ।
bhrāturbhayārtamāsīnaṁ sugrīvaṁ priyadarśanam ।
5.35.25 ॥

vayaṁ tu harirājaṁ taṁ sugrīvaṁ satyasaṅgaram ।
paricaryāsmahe rājyāt pūrvajenāvaropitam ।
5.35.26 ॥

tatastau cīravasanau dhanuḥpravarapāṇinau ।
ṛśyamūkasya śailasya ramyaṁ deśamupāgatau ।
5.35.27 ॥

sa tau dṛṣṭvā naravyāghrau dhanvinau vānararṣabhaḥ ।
avapluto girestasya śikharaṁ bhayamohitaḥ ।
5.35.28 ॥

tataḥ sa śikhare tasmin vānarendro vyavasthitaḥ ।
tayoḥ samīpaṁ māmeva preṣayāmāsa satvaram ।
5.35.29 ॥

tāvahaṁ puruṣavyāghrau sugrīvavacanāt prabhū ।
rūpalakṣaṇasampannau kṛtāñjalirupasthitaḥ ।
5.35.30 ॥

tau parijñātatattvārthau mayā prītisamanvitau ।
pṛṣṭhamāropya taṁ deśaṁ prāpitau puruṣarṣabhauḥ ।
5.35.31 ॥

niveditau ca tattvena sugrīvāya mahātmane ।
tayoranyonyasaṁlāpādbhṛśaṁ prītirajāyata ।
5.35.32 ॥

tatastau prītisampannau harīśvaranareśvarau ।
parasparakṛtāśvāsau kathayā pūrvavṛttayā ।
5.35.33 ॥

tataḥ sa sāntvayāmāsa sugrīvaṁ lakṣmaṇāgrajaḥ ।
strīhetorvālinā bhrātrā nirastamurutejasā ।
5.35.34 ॥

tatastvannāśajaṁ śokaṁ rāmasyākliṣṭakarmaṇaḥ ।
lakṣmaṇo vānarendrāya sugrīvāya nyavedayat ।
5.35.35 ॥

sa śrutvā vānarendrastu lakṣmaṇeneritaṁ vacaḥ ।
tadā ' 'sīnniṣprabho 'tyarthaṁ grahagrasta ivāṁśumān ।
5.35.36 ॥

tatastvadgātraśobhīni rakṣasā hriyamāṇayā ।
yānyābharaṇajālāni pātitāni mahītale ।
5.35.37 ॥

tāni sarvāṇi rāmāya ānīya hariyūthapāḥ ।
saṁhṛṣṭā darśayāmāsurgatiṁ tu na vidustava ।
5.35.38 ॥

tāni rāmāya dattāni mayaivopahṛtāni ca ।
svanavantyavakīrṇāni tasmin vigatacetasi ।
5.35.39 ॥

tānyaṅke darśanīyāni kṛtvā bahuvidhaṁ tava ।
tena devaprakāśena devena paridevitam ।
5.35.40 ॥

paśyatastāni rudatastāmyataśca punaḥ punaḥ ।
prādīpayan dāśarathestāni śokahutāśanam ।
5.35.41 ॥

śayitaṁ ca ciraṁ tena duḥkārtena mahātmanā ।
mayāpi vividhairvākyaiḥ kṛcchrādutthipitaḥ punaḥ ।
5.35.42 ॥

tāni dṛṣṭvā mahābāhurdarśayitvā muhurmuhuḥ ।
rāghavaḥ sahasaumitriḥ sugrīve saṁnyavedayat ।
5.35.43 ॥

sa tavādarśanādārye rāghavaḥ paritapyate ।
mahatā jvalatā nityamagninevāgniparvataḥ ।
5.35.44 ॥

tvatkṛte tamanidrā ca śokaścintā ca rāghavam ।
tāpayanti mahātmānamagnyāgāramivāgnayaḥ ।
5.35.45 ॥

tavādarśanaśokena rāghavaḥ pravicālyate ।
mahatā bhūmikampane mahāniva śiloccayaḥ ।
5.35.46 ॥

kānanāni suramyāṇi nadīḥ prasravaṇāni ca ।
caranna ratimāpnoti tvāmapaśyannṛpātmaje ।
5.35.47 ॥

sa tvāṁ manujaśārdūlaḥ kṣipraṁ prāpsyati rāghavaḥ ।
samitrabāndhavaṁ hatvā rāvaṇaṁ janakātmaje ।
5.35.48 ॥

sahitau rāmasugrīvāvubhāvakurutāṁ tadā ।
samayaṁ vālinaṁ hantuṁ tava cānveṣaṇaṁ tathā ।
5.35.49 ॥

tatastābhyāṁ kumārābhyāṁ vīrābhyāṁ sa harīśvaraḥ ।
kiṣkindhāṁ samupāgamya vālī yuddhe nipātitaḥ ।
5.35.50 ॥

tato nihatya tarasā rāmo vālinamāhave ।
sarvarkṣaharisaṅghānāṁ sugrīvamakarot patim ।
5.35.51 ॥

rāmasugrīvayoraikyaṁ devyevaṁ samajāyata ।
hanumamantaṁ ca māṁ viddhi tayordūtamihāgatam ।
5.35.52 ॥

svarājyaṁ prāpya sugrīvaḥ samānīya harīśvarān ।
tvadarthaṁ preṣayāmāsa diśo daśa mahābalān ।
5.35.53 ॥

ādiṣṭā vānarendreṇa sugrīveṇa mahaujasā ।
adrirājapratīkāśāḥ sarvataḥ prasthitā mahīm ।
5.35.54 ॥

tataste mārgamāṇā vai sugrīvavacanāturāḥ ।
caranti vasudhāṁ kṛtsnāṁ vayamanye ca vānarāḥ ।
5.35.55 ॥

aṅgado nāma lakṣmīvān vālisūnurmahābalaḥ ।
prasthitaḥ kāpiśārdūlastribhāgabalasaṁvṛtaḥ ।
5.35.56 ॥

teṣāṁ no vipranaṣṭānāṁ vindhye parvatasattame ।
bhṛśaṁ śokaparītānāmahorātragaṇā gatāḥ ।
5.35.57 ॥

te vayaṁ kāryanairāśyāt kālaśyātikrameṇa ca ।
bhayācca kapirājasya prāṇāṁstyaktuṁ vyavasthitāḥ ।
5.35.58 ॥

vicitya vanadurgāṇi giriprasravaṇāni ca ।
anāsādya padaṁ devyāḥ prāṇāṁstyaktuṁ samudyatāḥ ।
5.35.59 ॥

dṛṣṭvā prāyopaviṣṭāṁśca sarvān vānarapuṅgavān ।
bhṛśaṁ śokārṇave magnaḥ paryadevayadaṅgadaḥ ।
5.35.60 ॥

tavanāśaṁ ca vaidehi vālinaśca vadhaṁ tathā ।
prāyovaveśamasmākaṁ maraṇaṁ ca jaṭāyuṣaḥ ।
53.5.61 ॥

teṣāṁ naḥ svāmisandeśānnirāśānāṁ mumūrṣatām ।
kāryahetorivāyātaḥ śakunirvīryavān mahān ।
5.35.62 ॥

gṛdhrarājasya sodaryaḥ sampātirnāma gṛdhrarāṭ ।
śrutvā bhrātṛvadhaṁ kopādidaṁ vacanamabravīt ।
5.35.63 ॥

yavīyān kena ma bhrātā hataḥ kva ca nipātitaḥ ।
etadākhyātumicchāmi bhavadbhirvānarottamāḥ ।
5.35.64 ॥

aṅgado 'kathayattasya janasthāneḥ mahadvadham ।
rakṣasā bhīmarūpeṇa tvāmuddiśya yathātatham ।
5.35.65 ॥

jaṭāyuṣo vadhaṁ śrutvā duḥkhitaḥ so 'ruṇātmajaḥ ।
tvāṁ śaśaṁsa varārohe vasantīṁ rāvaṇālaye ।
5.35.66 ॥

tasya tadvacanaṁ śrutvā sampāteḥ prītivardhanam ।
aṅgapramukhāstūrṇaṁ tataḥ saṁprasthitā vayam ।
5.35.67 ॥

vindhyādutthāya saṁprāptāḥ sāgarasyāntamuttaram ।
tvaddarśanakṛtotsāhā hṛṣṭāstuṣṭāḥ plavaṅgamāḥ ।
5.35.68 ॥

aṅgadapramukhāḥ sarve velopāntamupasthitāḥ ।
cintāṁ jagmuḥ punarbhītāstvaddarśanasamutsukāḥ ।
5.35.69 ॥

tathā 'haṁ harisainyasya sāgaraṁ prekṣya sīdataḥ ।
vyavadhūya bhayaṁ tāvraṁ yojanānāṁ śataṁ plutaḥ ।
5.35.70 ॥

laṅkā cāpi mayā rātrau praviṣṭā rākṣasākulā ।
rāvaṇaśca mayā dṛṣṭastvaṁ ca śokapariplutā ।
5.35.71 ॥

etatte sarvamākhyātaṁ yathāvṛttamanindite ।
abhibhāṣasva māṁ devi dūto dāśaratheraham ।
5.35.72 ॥

taṁ māṁ rāmakṛtodyogaṁ tvannimittamihāgatam ।
sugrīvasacivaṁ devi budhyasva pavanātmajam ।
5.35.73 ॥

kuśalī tava kākutsthaḥ sarvaśastrabhṛtāṁ varaḥ ।
gurorārādhane yukto lakṣmaṇaśca sulakṣaṇaḥ ।
5.35.74 ॥

tasya vīryavato devi bhartustava hite rataḥ ।
ahamekastu saṁprāptaḥ sugrīvavacanādiha ।
5.35.75 ॥

mayeyamasahāyena caratā kāmarūpiṇā ।
dakṣiṇā diganukrāntā tvanmārgavicayaiṣiṇā ।
5.35.76 ॥

diṣṭyā 'haṁ harisainyānāṁ tvannāśamanuśocatām ।
apaneṣyāmi santāpaṁ tavābhigamaśaṁsanāt ।
5.35.77 ॥

diṣṭyā hi mama na vyarthaṁ devi sāgaralaṅghanam ।
prāpsyāmyahamidaṁ diṣṭyā tvaddarśanakṛtaṁ yaśaḥ ।
5.35.78 ॥

rāghavaśca mahāvīryaḥ kṣipraṁ tvāmabhipatsyate ।
samitrabāndhavaṁ hatvā rāvaṇaṁ rākṣasādhipam ।
5.35.79 ॥

mālyavānnāma vaidehi girīṇāmuttamo giriḥ ।
tato gacchati gokarṇaṁ parvataṁ kesarī hariḥ ।
5.35.80 ॥

sa ca devarṣibhirdiṣṭaḥ pitā mama mahākapiḥ ।
tārthe nadīpateḥ puṇye śambasādanamuddharat ।
5.35.81 ॥

tasyāhaṁ hariṇaḥ kṣetre jāto vātena maithili ।
hanumāniti vikhyāto loke svenaiva karmaṇā ।
5.35.82 ॥

viśvāsārthaṁ tu vaidehi bharturuktā mayā guṇāḥ ।
acirād rāghavo devi tvāmito nayitā 'naghe ।
5.35.83 ॥

evaṁ viśvāsitā sītā hetubhiḥ śokakarśitā ।
upapannairabhijñānairdūtaṁ tamavagacchati ।
5.35.84 ॥

atulaṁ ca gatā harṣaṁ praharṣeṇa ca jānakī ।
netrābhyāṁ vakrapakṣmabhyāṁ mumocānandajaṁ jalam ।
5.35.85 ॥

cāru tadvadanaṁ tasyāstāmraśuklāyatekṣaṇam ।
aśobhata viśālākṣyā rāhumukta ivoḍurāṭ ।
5.35.86 ॥

hanumantaṁ kapiṁ vyaktaṁ manyate nānyatheti sā ।
athovāca hanūmāṁstāmuttaraṁ priyadarśanām ।
5.35.87 ॥

etatte sarvamākhyātaṁ samāśvasihi maithili ।
kiṁ karomi kathaṁ vā te rocate pratiyāmyaham ।
5.35.88 ॥

hate 'sure saṁyati śambasādane kapipravīreṇa maharṣicodanāt ।
tato 'smi vāyuprabhavo hi maithili prabhāvatastatpratimaśca vānaraḥ ।
5.35.89 ॥