सुन्दरकाण्डम्Sundara Kāṇḍa

tataḥ śākhāntare līnaṁ dṛṣṭvā calitamānasā ।
veṣṭitārjunavastraṁ taṁ vidyutsaṅghātapiṅgalam ।
5.32.1 ॥

sā dadarśa kapiṁ tatra praśritaṁ priyavādinam ।
phullāśokotkarābhāsaṁ taptacāmīkarekṣaṇam ।
5.32.2 ॥

maithilī cintayāmāsa vismayaṁ paramaṁ gatā ।
aho bhīmamidaṁ rūpaṁ vānarasya durāsadam ।
durnirīkṣyamiti jñātvā punareva mumoha sā ।
5.32.3 ॥

vilalāpa bhṛśaṁ sītā karuṇaṁ bhayamohitā ।
rāmarāmeti duḥkhārtā lakṣmaṇeti ca bhāminī ।
5.32.4 ॥

ruroda bahudhā sītā mandaṁ mandasvarā satī ।
5.32.5 ॥

sā taṁ dṛṣṭvā hariśreṣṭhaṁ vinītabadupasthitam ।
maithilī cintayāmāsa svapno 'yamiti bhāminī ।
5.32.6 ॥

sā vīkṣamāṇā pṛthubhugnavaktraṁ śākhāmṛgendrasya yathoktakāram ।
dadarśa piṅgadhipateramātyaṁ vātātmajaṁ buddhimatāṁ variṣṭham ।
5.32.7 ॥

sā taṁ samīkṣyaiva bhṛśaṁ visaṁjñā gatāsukalpeva babhūva sītā ।
cireṇa saṁjñā pratilabhya bhūyo vicintayāmāsa viśālanetrā ।
5.32.8 ॥

svapne mayā 'yaṁ vikṛto 'dya dṛṣṭaḥ śākhāmṛgaḥ śāstragaṇairniṣiddhaḥ ।
svastyastu rāmāya salakṣmaṇāya tathā piturme janakasya rājñaḥ ।
5.32.9 ॥

svapno 'pi nāyaṁ nahi me 'sti nidrā śokena duḥkhena ca pīḍitāyāḥ ।
sukhaṁ hi me nāsti yato 'smi hīnā tenendupūrṇapratimānanena ।
5.32.10 ॥

rāmeti rāmeti sadaiva buddhyā vicintya vācā bruvatī tameva ।
tasyānurūpāṁ ca kathāṁ tamartameva prapaśyāmi tathā śrṛṇomi ।
5.32.11 ॥

ahaṁ hi tasyādya manobhavena saṁpīḍitā tadgatasarvabhāvā ।
vicintayantī satataṁ tameva tathaiva paśyāmi tathā śṛṇomi ।
5.32.12 ॥

manorathaḥ syāditi cintayāmi tathāpi buddhyā ca vitarkayāmi ।
kiṁ kāraṇaṁ tasya hi nāsti rūpaṁ suvyaktarūpaśca vadatyayaṁ mām ।
5.32.13 ॥

namo 'stu vācaspataye savajriṇe svayambhuve caiva hutāśanāya ca ।
anena coktaṁ yadidaṁ mamāgrato vanaukasā tacca tathā 'stu nānyathā ।
5.32.14 ॥