सुन्दरकाण्डम्Sundara Kāṇḍa

evaṁ bahuvidhāṁ cintāṁ cintayitvā mahākapiḥ ।
saṁśrave madhuraṁ vākyaṁ vaidehyā vyājahāra ha ।
5.31.1 ॥

rājā daśaratho nāma rathakuñjaravājimān ।
puṇyaśīlo mahākīrtirṛjurāsīnmahāyaśāḥ ।
5.31.2 ॥

rājarṣīṇāṁ guṇaśreṣṭastapasā carṣibhiḥ samaḥ ।
cakravartikule jātaḥ purandarasamo bale ।
5.31.3 ॥

ahisāratirakṣudrau ghṛṇī satyaparākramaḥ ।
mukhyaścekṣvākuvaṁśasya lakṣmīvām̐llakṣmivardhanaḥ ।
5.31.4 ॥

pārthivavyañjanairyuktaḥ pṛthuśrīḥ pārthivarṣabhaḥ ।
pṛthivyāṁ caturantāyāṁ viśrutaḥ sukhadaḥ sukhī ।
5.31.5 ॥

tasya putraḥ priyo jyeṣṭhastārādhipanibhānanaḥ ।
rāmo nāma viśeṣajñaḥ śreṣṭhaḥ sarvadhanuṣmatām ।
5.31.6 ॥

rakṣitā svasya dharmasya svajanasya ca rakṣitā ।
rakṣitā jīvalokasya dharmasya ca parantapaḥ ।
5.31.7 ॥

tasya satyābhisandhasya vṛddhasya vacanāt pituḥ ।
sabhāryaḥ saha ca bhrātrā vīraḥ pravrājito vanam ।
5.31.8 ॥

tena tatra mahāraṇye mṛgayāṁ paridhāvatā ।
rākṣasā nihatāḥ śūrā bahavaḥ kāmarūpiṇaḥ ।
5.31.9 ॥

janasthānavadhaṁ śrutvā hatau ca kharadūṣaṇau ।
tatastvamarṣāpahṛtā jānakī rāvaṇena tu ।
vañjayitvā vane rāmaṁ mṛgarūpeṇa māyayā ।
5.31.10 ॥

sa mārgamāṇastāṁ devīṁ rāmaḥ sītāmaninditām ।
āsasāda vane mitraṁ sugrīvaṁ nāma vānaram ।
5.31.11 ॥

tataḥ sa vālinaṁ hatvā rāmaḥ parapurañjayaḥ ।
prāyacchat kapirājyaṁ tat sugrīvāya mahābalaḥ ।
5.31.12 ॥

sugrīveṇāpi sandiṣṭā harayaḥ kāmarūpiṇaḥ ।
dikṣu sarvāsu tāṁ devīṁ vicinvanti sahasraśaḥ ।
5.31.13 ॥

ahaṁ saṁpātivacanācchatayojanamāyatam ।
asyā hetorviśālākṣyāḥ sāgaraṁ vegavān plutaḥ ।
5.31.14 ॥

yathārūpāṁ yathāvarṇāṁ yathālakṣmīṁ ca niścitām ।
aśrauṣaṁ rāghavasyāhaṁ seyamāsāditā mayā ।
5.31.15 ॥

virarāmaiva muktvā 'sau vācaṁ vānarapuṅgavaḥ ।
jānakī cāpi tacchṛtvā vismayaṁ paramaṁ gatā ।
5.31.16 ॥

tataḥ sā vakrakeśāntā sukeśī keśasaṁvṛtam ।
unnamya vadanaṁ bhīruḥ śiṁśupāvṛkṣamaikṣata ।
5.31.17 ॥

niśamya sītā vacanaṁ kapeśca diśaśca sarvāḥ pradiśaśca vīkṣya ।
svayaṁ praharṣaṁ paramaṁ jagāma sarvātmanā rāmamanusmarantī ।
5.31.18 ॥

sā tiryagūrdhvaṁ ca tathāpyadhastānnirīkṣamāṇā tamacintyabuddhim ।
dadarśa piṅgādhipateramātyaṁ vātātmajaṁ sūryamivodayastham ।
5.31.19 ॥