सुन्दरकाण्डम्Sundara Kāṇḍa

prasaktāśrumukhītyevaṁ bruvantī janakātmajā ।
adhomukhamukhī bālā vilaptumupacakrame ।
5.24.1 ॥

unmatteva pramatteva bhrāntacitteva śocatī ।
upāvṛttā kiśorīva viveṣṭantī mahītale ।
5.24.2 ॥

rāghavasyāpramattasya rakṣasā kāmarūpiṇā ।
rāvaṇena pramathyāhamānītā krośatī balāt ।
5.24.3 ॥

rākṣasī vaśamāpannā bhartyamānā sudāruṇam ।
cintayantī suduḥkhārtā nāhaṁ jīvitumutsahe ।
5.24.4 ॥

na hi me jīvitenārtho naivārthairna ca bhūṣaṇaiḥ ।
vasantyā rākṣasī madhye vinā rāmaṁ mahāratham ।
5.24.5 ॥

dhiṅmāmanāryāmasatīṁ yāhaṁ tena vinā kṛtā ।
muhūrtamapi rakṣāmi jīvitaṁ pāpajīvitā ।
5.24.6 ॥

kā ca me jīvite śraddhā sukhe vā taṁ priyaṁ vinā ।
bhartāraṁ sāgarāntāyā vasudhāyāḥ priyaṁ vadam ।
5.24.7 ॥

bhidyatāṁ bhakṣyatāṁ vāpi śarīraṁ visṛjāmyaham ।
na cāpyahaṁ ciraṁ duḥkhaṁ saheyaṁ priyavarjitā ।
5.24.8 ॥

caraṇenāpi savyena na spṛśeyaṁ niśācaram ।
rāvaṇaṁ kiṁ punarahaṁ kāmayeyaṁ vigarhitam ।
5.24.9 ॥

pratyākhyātaṁ na jānāti nātmānaṁ nātmanaḥ kulam ।
yo nṛśaṁsa svabhāvena māṁ prārthayitumicchati ।
5.24.10 ॥

chinnā bhinnā vibhaktā vā dīpte vāgnau pradīpitā ।
rāvaṇaṁ nopatiṣṭheyaṁ kiṁ pralāpena vaś ciram ।
5.24.11 ॥

khyātaḥ prājñaḥ kṛtajñaśca sānukrośaśca rāghavaḥ ।
sadvṛtto niranukrośaḥ śaṅke madbhāgyasaṅkṣayāt ।
5.24.12 ॥

rākṣasānāṁ janasthāne sahasrāṇi caturdaśa ।
yenaikena nirastāni sa māṁ kiṁ nābhipadyate ।
5.24.13 ॥

niruddhā rāvaṇenāhamalpavīryeṇa rakṣasā ।
samarthaḥ khalu me bhartā rāvaṇaṁ hantumāhave ।
5.24.14 ॥

virādho daṇḍakāraṇye yena rākṣasapuṅgavaḥ ।
raṇe rāmeṇa nihataḥ sa māṁ kiṁ nābhipadyate ।
5.24.15 ॥

kāmaṁ madhye samudrasya laṅkeyaṁ duṣpradharṣaṇā ।
na tu rāghavabāṇānāṁ gatirodhī ha vidyate ।
5.24.16 ॥

kiṁ nu tatkāraṇaṁ yena rāmo dṛḍhaparākramaḥ ।
rakṣasāpahṛtāṁ bhāryāmiṣṭāṁ nābhyavapadyate ।
5.24.17 ॥

ihasthāṁ māṁ na jānīte śaṅke lakṣmaṇapūrvajaḥ ।
jānannapi hi tejasvī dharṣaṇāṁ marṣayiṣyati ।
5.24.18 ॥

hṛteti yo'dhigatvā māṁ rāghavāya nivedayet ।
gṛdhrarājo'pi sa raṇe rāvaṇena nipātitaḥ ।
5.24.19 ॥

kṛtaṁ karma mahattena māṁ tadābhyavapadyatā ।
tiṣṭhatā rāvaṇadvandve vṛddhenāpi jaṭāyuṣā ।
5.24.20 ॥

yadi māmiha jānīyādvartamānāṁ sa rāghavaḥ ।
adya bāṇairabhikruddhaḥ kuryāllokamarākṣasaṁ ।
5.24.21 ॥

vidhamecca purīṁ laṅkāṁ śoṣayecca mahodadhim ।
rāvaṇasya ca nīcasya kīrtiṁ nāma ca nāśayet ।
5.24.22 ॥

tato nihatanathānāṁ rākṣasīnāṁ gṛhe gṛhe ।
yathāhamevaṁ rudatī tathā bhūyo na saṁśayaḥ ।
anviṣya rakṣasāṁ laṅkāṁ kuryādrāmaḥ salakṣmaṇaḥ ।
5.24.23 ॥

na hi tābhyāṁ ripurdṛṣṭo muhūtamapi jīvati ।
citā dhūmākulapathā gṛdhramaṇḍalasaṅkulā ।
acireṇa tu laṅkeyaṁ śmaśānasadṛśī bhavet ।
5.24.24 ॥

acireṇaiva kālena prāpsyāmyeva manoratham ।
duṣprasthāno'yamākhyāti sarveṣāṁ vo viparyayaḥ ।
5.24.25 ॥

yādṛśāni tu dṛśyante laṅkāyāmaśubhāni tu ।
acireṇaiva kālena bhaviṣyati hataprabhā ।
5.24.26 ॥

nūnaṁ laṅkā hate pāpe rāvaṇe rākṣasādhipe ।
śoṣaṁ yāsyati durdharṣā pramadā vidhavā yathā ।
5.24.27 ॥

puṣyotsavasamṛddhā ca naṣṭabhartrī sarākṣasā ।
bhaviṣyati purī laṅkā naṣṭabhartrī yathāṅganā ।
5.24.28 ॥

nūnaṁ rākṣasakanyānāṁ rudantīnāṁ gṛhe gṛhe ।
śroṣyāmi nacirādeva duḥkhārtānām iha dhvanim ।
5.24.29 ॥

sāndhakārā hatadyotā hatarākṣasapuṅgavā ।
bhaviṣyati purī laṅkā nirdagdhā rāmasāyakaiḥ ।
5.24.30 ॥

yadi nāma sa śūro māṁ rāmo raktāntalocanaḥ ।
jānīyādvartamānāṁ hi rāvaṇasya niveśane ।
5.24.31 ॥

anena tu nṛśaṁsena rāvaṇenādhamena me ।
samayo yastu nirdiṣṭastasya kālo'yamāgataḥ ।
5.24.32 ॥

akāryaṁ ye na jānanti nairṛtāḥ pāpakāriṇaḥ ।
adharmāttu mahotpāto bhaviṣyati hi sāmpratam ।
5.24.33 ॥

naite dharmaṁ vijānanti rākṣasāḥ piśitāśanāḥ ।
dhruvaṁ māṁ prātarāśārthe rākṣasaḥ kalpayiṣyati ।
5.24.34 ॥

sāhaṁ kathaṁ kariṣyāmi taṁ vinā priyadarśanam ।
rāmaṁ raktāntanayanamapaśyantī suduḥkhitā ।
5.24.35 ॥

yadi kaścitpradātā me viṣasyādya bhavediha ।
kṣipraṁ vaivasvataṁ devaṁ paśyeyaṁ patinā vinā ।
5.24.36 ॥

nājānājjīvatīṁ rāmaḥ sa māṁ lakṣmaṇapūrvajaḥ ।
jānantau tau na kuryātāṁ norvyāṁ hi mama mārgaṇam ।
5.24.37 ॥

nūnaṁ mamaiva śokena sa vīro lakṣmaṇāgrajaḥ ।
devalokamito yātastyaktvā dehaṁ mahītale ।
5.24.38 ॥

dhanyā devāḥ sagandharvāḥ siddhāśca paramarṣayaḥ ।
mama paśyanti ye nāthaṁ rāmaṁ rājīvalocanam ।
5.24.39 ॥

atha vā na hi tasyārthe dharmakāmasya dhīmataḥ ।
mayā rāmasya rājarṣerbhāryayā paramātmanaḥ ।
5.24.40 ॥

dṛśyamāne bhavetprītaḥ sauhṛdaṁ nāstyapaśyataḥ ।
nāśayanti kṛtaghrāstu na rāmo nāśayiṣyati ।
5.24.41 ॥

kiṁ nu me na guṇāḥ ke citkiṁ vā bhāgya kṣayo hi me ।
yāhaṁ sītā varārheṇa hīnā rāmeṇa bhāminī ।
5.24.42 ॥

śreyo me jīvitānmartuṁ vihīnā yā mahātmanā ।
rāmādakliṣṭacāritrācchūrācchatrunibarhaṇāt ।
5.24.43 ॥

atha vā nyastaśastrau tau vane mūlaphalāśanau ।
bhrātarau hi nara śreṣṭhau carantau vanagocarau ।
5.24.44 ॥

atha vā rākṣasendreṇa rāvaṇena durātmanā ।
chadmanā ghātitau śūrau bhrātarau rāmalakṣmaṇau ।
5.24.45 ॥

sāhamevaṅgate kāle martumicchāmi sarvathā ।
na ca me vihito mṛtyurasminduḥkhe'pi vartati ।
5.24.46 ॥

dhanyāḥ khalu mahātmāno munayaḥ satyasaṁmatāḥ ।
jitātmāno mahābhāgā yeṣāṁ na staḥ priyāpriye ।
5.24.47 ॥

priyānna sambhavedduḥkhamapriyādadhikaṁ bhayam ।
tābhyāṁ hi ye viyujyante namasteṣāṁ mahātmanām ।
5.24.48 ॥

sāhaṁ tyaktā priyeṇeha rāmeṇa viditātmanā ।
prāṇāṁstyakṣyāmi pāpasya rāvaṇasya gatā vaśam ।
5.24.49 ॥