उत्तरकाण्डम्Uttara Kāṇḍa

tasyāṁ rajanyāṁ vyuṣṭāyāṁ yajñavāṭagato nṛpaḥ ।
ṛṣīnsarvānmahātejāḥ śabdāpayati rāghavaḥ ।
7.96.1 ॥ ॥

vasiṣṭho vāmadevaśca jābāliratha kāśyapaḥ ।
viśvāmitro dīrghatapā durvāsāśca mahātapāḥ ।
7.96.2 ॥ ॥

pulastyo 'pi tathā śaktirbhārgavaścaiva vāmanaḥ ।
mārkaṇḍeyaśca dīrghāyurmaudgalyaśca mahāyaśāḥ ।
7.96.3 ॥ ॥

gargaśca cyavanaścaiva śatānandaśca dharmavit ।
bharadvājaśca tejasvī hyagniputraśca suprabhaḥ ।
7.96.4 ॥ ॥

nāradaḥ parvataścaiva gautamaśca mahāyaśāḥ ।
kātyāyanaḥ suyajñaśca hyagastyastapasāṁ nidhiḥ ।
7.96.5 ॥ ॥

ete cānye ca bahavo munayaḥ saṁśitavratāḥ ।
kautūhalasamāviṣṭāḥ sarva eva samāgatāḥ ।
7.96.6 ॥ ॥

rākṣasāśca mahāvīryā vānarāśca mahābalāḥ ।
sarva eva samājagmurmahātmānaḥ kutūhalāt ।
7.96.7 ॥ ॥

kṣatriyā ye ca śūdrāśca vaiśyāścaiva sahasraśaḥ ।
nānādeśagatāścaiva brāhmaṇāḥ saṁśitavratāḥ ।
7.96.8 ॥ ॥

jñānaniṣṭhāḥ karmaniṣṭhāḥ yoganiṣṭhāstathāpare ।
sītāśapathavīkṣārthaṁ sarva eva samāgatāḥ ।
7.96.9 ॥ ॥

tadā samāgataṁ sarvamaśmabhūtamivācalam ।
śrutvā munivarastūrṇaṁ sasītaḥ samupāgamat ।
7.96.10 ॥ ॥

tamṛṣiṁ pṛṣṭhataḥ sītā tvanvagacchadavāṅmukhī ।
kṛtāñjalirbāṣpagalā kṛtvā rāmaṁ manogatam ।
7.96.11 ॥ ॥

dṛṣṭvā śrutimivāyāntīṁ brahmāṇamanugāminīm ।
vālmīkeḥ pṛṣṭhataḥ sītāṁ sādhuvādo mahānabhūt ।
7.96.12 ॥ ॥

tato halahalāśabdaḥ sarveṣāmevamābabhau ।
duḥkhajanmaviśālena śokenākulitātmanām ।
7.96.13 ॥ ॥

sādhu rāmeti kecittu sādhu sīteti cāpare ।
ubhāveva ca tatrānye prekṣakāḥ sampracukruśuḥ ।
7.96.14 ॥ ॥

tato madhye janaughasya praviśya munipuṅgavaḥ ।
sītāsahāyo vālmīkiriti hovāca rāghavam ।
7.96.15 ॥ ॥

iyaṁ dāśarathe sītā suvratā dharmacāriṇī ।
apavādaiḥ parityaktā mamāśramasamīpataḥ ।
7.96.16 ॥ ॥

lokāpavādabhītasya tava rāma mahāvrata ।
pratyayaṁ dāsyate sītā tadanujñātumarhasi ।
7.96.17 ॥ ॥

imau tu jānakīputrāvubhau ca yamajātakau ।
sutau tavaiva durdharṣau satyametadbravīmi te ।
7.96.18 ॥ ॥

pracetaso 'haṁ daśamaḥ putro rāghavanandana ।
na smarāmyanṛtaṁ vākyamimau tu tava putrakau ।
7.96.19 ॥ ॥

bahuvarṣasahasrāṇi tapaścaryā mayā kṛtā ।
nopāśnīyāṁ phalaṁ tasyā duṣṭeyaṁ yadi maithilī ।
7.96.20 ॥ ॥

manasā karmaṇā vācā bhūtapūrvaṁ na kilbiṣam ।
tasyāḥ phalamupāśnīyāmapāpā maithilī yadi ।
7.96.21 ॥ ॥

ahaṁ pañcasu bhūteṣu manaṣṣaṣṭheṣu rāghava ।
vicintya sītāṁ śuddheti jagrāha vananirjhare ।
7.96.22 ॥ ॥

iyaṁ śuddhasamācārā apāpā patidevatā ।
lokāpavādabhītasya pratyayaṁ tava dāsyati ।
7.96.23 ॥ ॥

tasmādiyaṁ naravarātmaja śuddhabhāvā divyena dṛṣṭiviṣayeṇa tadā praviṣṭā ।
lokāpavādakaluṣīkṛtacetasā yā tyaktā tvayā priyatamā viditā 'pi śuddhā ।
7.96.24 ॥