उत्तरकाण्डम्Uttara Kāṇḍa

tau rajanyāṁ prabhātāyāṁ snātau hutahutāśanau ।
yathoktamṛṣiṇā pūrvaṁ sarvaṁ tatropagāyatām ।
7.94.1 ॥ ॥

tāṁ sa śuśrāva kākutsthaḥ pūrvācāryavijirmitām ।
apūrvāṁ pāṭhyajātiṁ ca geyena samalaṅkṛtām ।
7.94.2 ॥ ॥

pramāṇairbahubhirbaddhāṁ tantrīlayasamanvitām ।
bālābhyāṁ rāghavaḥ śrutvā kautūhalaparo 'bhavat ।
7.94.3 ॥ ॥

atha karmāntare rājā samāhūya mahāmunīn ।
pārthivāṁśca naravyāghraḥ paṇḍitānnaigamāṁstathā ।
7.94.4 ॥ ॥

paurāṇikāñchabdavido ye ca vṛddhā dvijātayaḥ ।
svarāṇāṁ lakṣaṇajñāṁśca utsukāndvijasattamān ।
7.94.5 ॥ ॥

lakṣaṇajñāṁśca gāndharvānnaigamāṁśca viśeṣataḥ ।
pādākṣarasamāsajñāṁśchandaḥsu pariniṣṭhitān ।
7.94.6 ॥ ॥

kalāmātrāviśeṣajñāñjyotiṣe ca paraṁ gatān ।
kriyākalpavidaścaiva tathā kāryavido janān ।
7.94.7 ॥ ॥

bhāṣājñāniṅgitajñāṁśca naigamāṁścāpyaśeṣataḥ ।
hetūpacārakuśalān vacane cāpi haitukān ।
7.94.8 ॥ ॥

chandovidaḥ purāṇajñānvaidikāndvijasattamān ।
citrajñānvṛttasūtrajñāngītanṛtyaviśāradān ।
7.94.9 ॥ ॥

śāstrajñānnītinipuṇānvedāntārthaprabodhakān ।
etānsarvānsamānīya gātārau samaveśayat ।
7.94.10 ॥ ॥

dṛṣṭvā munigaṇāḥ sarve pārthivāśca mahaujasaḥ ।
pibanta iva cakṣurbhyāṁ rājānaṁ gāyakau ca tau ।
7.94.11 ॥ ॥

ūcuḥ parasparaṁ cedaṁ sarva eva samantataḥ ।
ubhau rāmasya sadṛśau bimbādbimbamivotthitau ।
7.94.12 ॥ ॥

jaṭilau yadi na syātāṁ na valkaladharau yadi ।
viśeṣaṁ nādhigacchāmo gāyato rāghavasya ca ।
7.94.13 ॥ ॥

teṣāṁ saṁvadatāmevaṁ śrota'ṇāṁ harṣavardhanam ।
geyaṁ pracakratustatra tāvubhau munidārakau ।
7.94.14 ॥ ॥

tataḥ pravṛttaṁ madhuraṁ gāndharvamatimānuṣam ।
na ca tṛptiṁ yayuḥ sarve śrotāro gānasampadā ।
7.94.15 ॥ ॥

pravṛttamāditaḥ pūrvasargaṁ nāradadarśitam ।
tataḥ prabhṛti sargāṁśca yāvadviṁśatyagāyatām ।
7.94.16 ॥ ॥

tato 'parāhṇasamaye rāghavaḥ samabhāṣata ।
śrutvā viṁśatisargāṁstānbhrātaraṁ bhrātṛvatsalaḥ ।
7.94.17 ॥ ॥

aṣṭādaśasahasrāṇi suvarṇasya mahātmanoḥ ।
prayaccha śīghraṁ kākutstha yadanyadabhikāṅkṣitam ।
dadau śīghraṁ sa kākutstho bālayorvai pṛthakpṛthak ।
7.94.18 ॥ ॥

dīyamānaṁ suvarṇaṁ tu nāgṛhṇītāṁ kuśīlavau ।
ūcatuśca mahātmānau kimaneneti vismitau ।
7.94.19 ॥ ॥

vanyena phalamūlena niratau vanavāsinau ।
suvarṇena hiraṇyena kiṁ kariṣyāvahe vane ।
7.94.20 ॥ ॥

tathā tayoḥ prabruvatoḥ kautūhalasamanvitāḥ ।
śrotāraścaiva rāmaśca sarva eva suvismitāḥ ।
7.94.21 ॥ ॥

tasya caivāgamaṁ rāmaḥ kāvyasya śrotumutsukaḥ ।
papraccha tau mahātejāstāvubhau munidārakau ।
7.94.22 ॥ ॥

kimpramāṇamidaṁ kāvyaṁ kā pratiṣṭhā mahātmanaḥ ।
kartā kāvyasya mahataḥ kva cāsau munipuṅgavaḥ ।
7.94.23 ॥ ॥

pṛcchantaṁ rāghavaṁ vākyamūcaturmunidārakau ।
7.94.24 ॥ ॥

vālmīkirbhagavānkartā samprāpto yajñasaṁvidham ।
yenedaṁ caritaṁ tubhyamaśeṣaṁ sampradarśitam ।
7.94.25 ॥ ॥

sannibaddhaṁ hi ślokānāṁ caturviśatsahasrakam ।
upākhyānaśataṁ caiva bhārgaveṇa tapasvinā ।
7.94.26 ॥ ॥

ādiprabhṛti vai rājanpañcasargaśatāni ca ।
kāṇḍāni ṣaṭ kṛtānīha sottarāṇi mahātmanā ।
kṛtāni guruṇāsmākamṛṣiṇā caritaṁ tava ।
7.94.27 ॥ ॥

pratiṣṭhā ' 'jīvitaṁ yāvattāvatsarvasya vartate ।
7.94.28 ॥

sottarāṇi mahātmanā ।
yadi buddhiḥ kṛtā rājañchravaṇāya mahāratha ।
karmāntare kṣaṇībhūtastacchṛṇuṣva sahānujaḥ ।
7.94.29 ॥ ॥

bāḍhamityabravīdrāmastau cānujñāpya rāghavam ।
prahṛṣṭau jagmatuḥ sthānaṁ yatrāste munipuṅgavaḥ ।
7.94.30 ॥ ॥

rāmo 'pi munibhiḥ sārdhaṁ pārthivaiśca mahātmabhiḥ ।
śrutvā tadgītimādhuryaṁ karmaśālāmupāgamat ।
7.94.31 ॥ ॥

śuśrāva tattālalayopapannaṁ sargānvitaṁ sa svaraśabdayuktam ।
tantrīlayavyañjanayogayuktaṁ kuśīlavābhyāṁ parigīyamānam ।
7.94.32 ॥