उत्तरकाण्डम्Uttara Kāṇḍa

vartamāne tathābhūte yajñe ca paramādbhute ।
saśiṣya ājagāmāśu vālmīkirmunipuṅgavaḥ ।
7.93.1 ॥ ॥

sa dṛṣṭvā divyasaṅkāśaṁ yajñamadbhutadarśanam ।
ekānte ṛṣivāṭānāṁ cakāra uṭajāñchubhān ।
7.93.2 ॥ ॥

śakaṭāṁśca bahūnpūrṇānphalamūlaiśca śobhanān ।
vālmīkivāṭe rucire sthāpayannavidūrataḥ ।
7.93.3 ॥ ॥

āsītsupūjito rājñā munibhiśca mahātmabhiḥ ।
vālmīkiḥ sumahātejā nyavasatparamātmavān ।
7.93.4 ॥ ॥

sa śiṣyāvabravīddhṛṣṭau yuvāṁ gatvā samāhitau ।
kṛtsnaṁ rāmāyaṇaṁ kāvyaṁ gāyethāṁ parayā mudā ।
7.93.5 ॥ ॥

ṛṣivāṭeṣu puṇyeṣu brāhmaṇāvasatheṣu ca ।
rathyāsu rājamārgeṣu pārthivānāṁ gṛheṣu ca ।
7.93.6 ॥ ॥

rāmasya bhavanadvāri yatra karma ca kurvate ।
ṛtvijāmagrataścaiva tatra geyaṁ viśeṣataḥ ।
7.93.7 ॥ ॥

imāni ca phalānyatra svādūni vividhāni ca ।
jātāni parvatāgreṣu cāsvādyāsvādya gāyatām ।
7.93.8 ॥ ॥

na yāsyathaḥ śramaṁ vatsau bhakṣayitvā phalāni vai ।
mūlāni ca sumṛṣṭāni nagarādbahirāsyathaḥ ।
7.93.9 ॥ ॥

yadi śabdāpayedrāmaḥ śravaṇāya mahīpatiḥ ।
ṛṣīṇāmupaviṣṭānāṁ tato geyaṁ pravartatām ।
7.93.10 ॥ ॥

divase viṁśatiḥ sargā geyā madhurayā girā ।
pramāṇairbahubhistatra yathoddiṣṭā mayā purā ।
7.93.11 ॥ ॥

lobhaścāpi na kartavyaḥ svalpo 'pi dhanakāṅkṣayā ।
kiṁ dhanenāśramasthānāṁ phalamūlopajīvinā ।
7.93.12 ॥ ॥

yadi pṛcchetsa kākutstho yuvāṁ kasyeti dārakau ।
āvāṁ vālmīkiśiṣyau svo brūtamevaṁ narādhipam ।
7.93.13 ॥ ॥

imāstantrīḥ sumadhurāḥ sthānaṁ vā 'pūrvadarśanam ।
mūrcchayitvā sumadhuraṁ gāyatāṁ vigatajvarau ।
7.93.14 ॥ ॥

ādiprabhṛti geyaṁ syānna cāvajñāya pārthivam ।
pitā hi sarvabhūtānāṁ rājā bhaviti dharmataḥ ।
7.93.15 ॥ ॥

tadyuvāṁ hṛṣṭamanasau śvaḥ prabhāte samāsthitau ।
gāyethāṁ madhuraṁ geyaṁ tantrīlayasamanvitam ।
7.93.16 ॥ ॥

iti sandiśya bahuśo muniḥ prācetasastadā ।
vālmīkiḥ paramodārastūṣṇīmāsīnmahāyaśāḥ ।
7.93.17 ॥ ॥

sandiṣṭau muninā tena tāvubhau maithilīsutau ।
tathaiva karavāveti nirjagmaturarindamau ।
7.93.18 ॥ ॥

tāmadbhutāṁ tau hṛdaye kumārau niveśya vāṇīmṛṣibhāṣitāṁ tadā ।
samutsukau tau samamūṣaturniśāṁ yathā 'śvinau bhārgavanītisaṁhitām ।
7.93.19 ॥