उत्तरकाण्डम्Uttara Kāṇḍa

etadākhyāya kākutstho bhrātṛbhyāmamitaprabhaḥ ।
lakṣmaṇaṁ punarevāha dharmayuktamidaṁ vacaḥ ।
7.91.1 ॥ ॥

vasiṣṭhaṁ vāmadevaṁ ca jābālimatha kaśyapam ।
dvijāṁśca sarvapravarānaśvamedhapuraskṛtān ।
7.91.2 ॥ ॥

etānsarvānsamānīya mantrayitvā ca lakṣmaṇa ।
hayaṁ lakṣaṇasampannaṁ vimokṣyāmi samādhinā ।
7.91.3 ॥ ॥

tadvākyaṁ rāghaveṇoktaṁ śrutvā tvaritavikramaḥ ।
dvijānsarvānsamāhūya darśayāmāsa rāghavam ।
7.91.4 ॥ ॥

te dṛṣṭvā devasaṅkāśaṁ kṛtapādābhivandanam ।
rāghavaṁ sudurādharṣamāśīrbhiḥ samapūjayan ।
7.91.5 ॥ ॥

prāñjaliḥ sa tadā bhūtvā rāghavo dvijasattamān ।
ācacakṣe 'śvamedhasya hyabhiprāyaṁ mahāyaśāḥ ।
7.91.6 ॥ ॥

te tu rāmasya tacchrutvā namaskṛtvā vṛṣadhvajam ।
aśvamedhaṁ dvijāḥ sarve pūjayanti sma sarvaśaḥ ।
7.91.7 ॥ ॥

sa teṣāṁ dvijamukhyānāṁ vākyamadbhutadarśanam ।
aśvamedhāśritaṁ śrutvā bhṛśaṁ prīto 'bhavattadā ।
7.91.8 ॥ ॥

vijñāya karma tatteṣāṁ rāmo lakṣmaṇamabravīt ।
preṣayasva drutaṁ dūtān sugrīvāya mahātmane ।
7.91.9 ॥ ॥

yathā mahadbhirharibhirbahubhiśca vanaukasām ।
sārdhamāgaccha bhadraṁ te hyanubhoktuṁ mahotsavam ।
7.91.10 ॥ ॥

bibhīṣaṇaśca rakṣobhiḥ kāmagairbahubhirvṛtaḥ ।
aśvamedhaṁ mahāyajñamāyātvatulavikramaḥ ।
7.91.11 ॥ ॥

rājānaśca mahābhāgā ye me priyacikīrṣavaḥ ।
sānugāḥ kṣipramāyāntu yajñaṁ draṣṭumanuttamam ।
7.91.12 ॥ ॥

deśāntaragatā ye ca dvijā dharmasamāhitāḥ ।
āmantrayasva tānsarvānaśvamedhāya lakṣmaṇa ।
7.91.13 ॥ ॥

ṛṣayaśca mahābāho āhūyantāṁ tapodhanāḥ ।
deśāntaragatāḥ sarve sadārāśca dvijātayaḥ ।
tathaiva tālāvacarāstathaiva naṭanartakāḥ ।
7.91.14 ॥ ॥

yajñavāṭaśca sumahāngomatyā naimiśe vane ।
ājñāpyatāṁ mahābāho taddhi puṇyamanuttamam ।
7.91.15 ॥ ॥

śāntayaśca mahābāho pravartyantāṁ samantataḥ ।
7.91.16 ॥ ॥

śataśaścāpi dharmajñāḥ kratumukhyamanuttamam ।
anubhūya mahāyajñaṁ naimiśe raghunandana ।
7.91.17 ॥ ॥

tuṣṭaḥ puṣṭaśca sarvo 'sau mānitaśca yathāvidhi ।
prītiṁ yāsyati dharmajña śīghramāmantryatāṁ janaḥ ।
7.91.18 ॥ ॥

śataṁ vāhasahasrāṇāṁ taṇḍulānāṁ vapuṣmatām ।
ayutaṁ tilamudgānāṁ prayātvagre mahābala ।
7.91.19 ॥ ॥

caṇakānāṁ kulitthānāṁ māṣāṇāṁ lavaṇasya ca ।
ato 'nurūpaṁ snehaṁ ca gandhaṁ saṅkṣiptameva ca ।
7.91.20 ॥ ॥

suvarṇakoṭyo bahulā hiraṇyasya śatottarāḥ ।
agrato bharataḥ kṛtvā gacchatvagre samādhinā ।
7.91.21 ॥ ॥

antarā paṇyavīthyaśca sarve ca naṭanartakāḥ ।
sūdā nāryaśca bahavo nityaṁ yauvanaśālinaḥ ।
7.91.22 ॥ ॥

bharatena tu sārdhaṁ te yāntu sainyāni cāgrataḥ ।
naigamā balavṛddhāśca dvijāśca susamāhitāḥ ।
7.91.23 ॥ ॥

karmāntikānvardhakinaḥ kośādhyakṣāṁśca naigamān ।
mama māta'stathā sarvāḥ kumārāntaḥpurāṇi ca ।
7.91.24 ॥ ॥

kāñcanīṁ mama patnīṁ ca dīkṣāyāṁ jñāṁśca karmaṇi ।
agrato bharataḥ kṛtvā gacchatvagre mahāyaśāḥ ।
7.91.25 ॥ ॥

upakāryā mahārhāśca pārthivānāṁ mahaujasām ।
sānugānāṁ naraśreṣṭho vyādideśa mahābalaḥ ।
7.91.26 ॥