उत्तरकाण्डम्Uttara Kāṇḍa

kasyacittvatha kālasya sumālī nāma rākṣasaḥ ।
rasātalānmartyalokaṁ sarvaṁ vai vicacāra ha ।
7.9.1 ॥ ॥

nīlajīmūtasaṅkāśastaptakāñcanakuṇḍalaḥ ।
kanyāṁ duhitaraṁ gṛhya vinā padmamiva śriyam ।
7.9.2 ॥ ॥

rākṣasendraḥ sa tu tadā vicaranvai mahītalam ।
tadāpaśyatsa gacchantaṁ puṣpakeṇa dhaneśvaram ।
7.9.3 ॥ ॥

gacchantaṁ pitaraṁ draṣṭuṁ pulastyatanayaṁ vibhum ।
taṁ dṛṣṭvā 'marasaṅkāśaṁ svacchandaṁ tapanopamam ।
7.9.4 ॥ ॥

rasātalaṁ praviṣṭaḥ sanmartyalokātsavismayaḥ ।
ityevaṁ cintayāmāsa rākṣasānāṁ mahāmatiḥ ।
7.9.5 ॥ ॥

kiṁ kṛtaṁ śreya ityevaṁ vardhemahi kathaṁ vayam ।
athābravītsutāṁ rakṣaḥ kaikasīṁ nāma nāmataḥ ।
7.9.6 ॥ ॥

putri pradānakālo 'yaṁ yauvanaṁ vyativartate ।
pratyākhyānācca bhītaistvaṁ na varaiḥ pratigṛhyase ।
7.9.7 ॥ ॥

tvatkṛte ca vayaṁ sarve yantritā dharmabuddhayaḥ ।
tvaṁ hi sarvaguṇopetā śrīḥ sākṣādiva putrike ।
kanyāpitṛtvaṁ duḥkhaṁ hi sarveṣāṁ mānakāṅkṣiṇām ।
7.9.8 ॥ ॥

na jñāyate ca kaḥ kanyāṁ varayediti kanyake ।
7.9.9 ॥ ॥

tvaṁ hi sarvaguṇopetā śrīḥ sākṣādiva putrike ।
mātuḥ kulaṁ pitṛkulaṁ yatra caiva pradīyate ।
kulatrayaṁ sadā kanyā saṁśaye sthāpya tiṣṭhati ।
7.9.10 ॥ ॥

sā tvaṁ munivaraṁ śreṣṭhaṁ prajāpatikulodbhavam ।
bhaja viśravasaṁ putri paulastyaṁ varaya svayam ।
7.9.11 ॥ ॥

īdṛśāste bhaviṣyanti putrāḥ putri na saṁśayaḥ ।
tejasā bhāskarasamo yādṛśo 'yaṁ dhaneśvaraḥ ।
7.9.12 ॥ ॥

sā tu tadvacanaṁ śrutvā kanyakā pitṛgauravāt ।
tatropāgamya sā tasthau viśravā yatra tapyate ।
7.9.13 ॥ ॥

etasminnantare rāma pulastyatanayo dvijaḥ ।
agnihotramupātiṣṭhaccaturtha iva pāvakaḥ ।
7.9.14 ॥ ॥

avicintya tu tāṁ velāṁ dāruṇāṁ pitṛgauravāt ।
upasṛtyāgratastasya caraṇādhomukhī sthitā ।
vilikhantī muhurbhūmimaṅguṣṭhāgreṇa bhāminī ।
7.9.15 ॥ ॥

sa tu tāṁ vīkṣya suśroṇīṁ pūrṇacandranibhānanām ।
abravītparamodāro dīpyamānāṁ svatejasā ।
7.9.16 ॥ ॥

bhadre kasyāsi duhitā kuto vā tvamihāgatā ।
kiṁ kāryaṁ kasya vā hetostattvato brūhi śobhane ।
7.9.17 ॥ ॥

evamuktā tu sā kanyā kṛtāñjalirathābravīt ।
ātmaprabhāveṇa mune jñātumarhasi me matam ।
7.9.18 ॥ ॥

kiṁ tu māṁ viddhi brahmarṣe śāsanātpiturāgatām ।
kaikasī nāma nāmnāhaṁ śeṣaṁ tvaṁ jñātumarhasi ।
7.9.19 ॥ ॥

sa tu gatvā munirdhyānaṁ vākyametaduvāca ha ।
vijñātaṁ te mayā bhadre kāraṇaṁ yanmanogatam ।
7.9.20 ॥ ॥

sutābhilāṣo mattaste mattamātaṅgagāmini ।
dāruṇāyāṁ tu velāyāṁ yasmāttvaṁ māmupasthitā ।
7.9.21 ॥ ॥

śṛṇu tasmātsutānbhadre yādṛśāñjanayiṣyasi ।
dāruṇāndāruṇākārāndāruṇābhijanapriyān ।
7.9.22 ॥ ॥

prasaviṣyasi suśroṇi rākṣasānkrūrakarmaṇaḥ ।
sā tu tadvacanaṁ śrutvā praṇipatyābravīdvacaḥ ।
7.9.23 ॥ ॥

bhagavannīdṛśānputrāṁstvatto 'haṁ brahmavādinaḥ ।
necchāmi sudurācārānprasādaṁ kartumarhasi ।
7.9.24 ॥ ॥

kanyayā tvevamuktastu viśravā munipuṅgavaḥ ।
uvāca kaikasīṁ bhūyaḥ pūrṇenduriva rohiṇīm ।
7.9.25 ॥ ॥

paścimo yastava suto bhaviṣyati śubhānane ।
mama vaṁśānurūpaḥ sa dharmātmā ca bhaviṣyati ।
7.9.26 ॥ ॥

evamuktā tu sā kanyā rāma kālena kenacit ।
janayāmāsa bībhatsaṁ rakṣorūpaṁ sudāruṇam ।
7.9.27 ॥ ॥

daśagrīvaṁ mahādaṁṣṭraṁ nīlāñjanacayopamam ।
tāmroṣṭhaṁ viṁśatibhujaṁ mahāsyaṁ dīptamūrdhajam ।
7.9.28 ॥ ॥

tasmiñjāte tu tatkāle sajvālakavalāḥ śivāḥ ।
kravyādāścāpasavyāni maṇḍalāni pracakramuḥ ।
7.9.29 ॥ ॥

vavarṣa rudhiraṁ devo meghāśca kharaniḥsvanāḥ ।
prababhau na ca sūryo vai maholkāścāpatanbhuvi ।
7.9.30 ॥ ॥

cakampe jagatī caiva vavurvātāḥ sudāruṇāḥ ।
akṣobhyaḥ kṣubhitaścaiva samudraḥ saritāṁ patiḥ ।
7.9.31 ॥ ॥

atha nāmākarottasya pitāmahasamaḥ pitā ।
daśagrīvaḥ prasūto 'yaṁ daśagrīvo bhaviṣyati ।
7.9.32 ॥ ॥

tasya tvanantaraṁ jātaḥ kumbhakarṇo mahābalaḥ ।
pramāṇādyasya vipulaṁ pramāṇaṁ neha vidyate ।
7.9.33 ॥ ॥

tataḥ śūrpaṇakhā nāma sañjajñe vikṛtānanā ।
vibhīṣaṇaśca dharmātmā kaikasyāḥ paścimaḥ sutaḥ ।
7.9.34 ॥ ॥

tasmiñjāte mahāsattve puṣpavarṣaṁ papāta ha ।
7.9.35 ॥ ॥

nabhaḥsthāne dundubhayo devānāṁ prāṇadaṁstadā ।
vākyaṁ caivāntarikṣe ca sādhu sādhviti tattadā ।
7.9.36 ॥ ॥

tau tu tatra mahāraṇye vavṛdhāte mahaujasau ।
kumbhakarṇadaśagrīvau lokodvegakarau tadā ।
7.9.37 ॥ ॥

kumbhakarṇaḥ pramattastu maharṣīndharmavatsalān ।
trailokyaṁ bhakṣayannityāsantuṣṭo vicacāra ha ।
7.9.38 ॥ ॥

vibhīṣaṇastu dharmātmā nityaṁ dharme vyavasthitaḥ ।
svādhyāyaniyatāhāra uvāsa vijitendriyaḥ ।
7.9.39 ॥ ॥

atha vaiśravaṇo devastatra kālena kenacit ।
āgataḥ pitaraṁ draṣṭuṁ puṣpakeṇa dhaneśvaraḥ ।
7.9.40 ॥ ॥

taṁ dṛṣṭvā kaikasī tatra jvalantamiva tejasā ।
āgamya rākṣasī tatra daśagrīvamuvāca ha ।
7.9.41 ॥ ॥

putra vaiśravaṇaṁ paśya bhrātaraṁ tejasā vṛtam ।
bhrātṛbhāve same cāpi paśyātmānaṁ tvamīdṛśam ।
7.9.42 ॥ ॥

daśagrīva tathā yatnaṁ kuruṣvāmitavikrama ।
yathā tvamasi me putra bhava rvaiśravaṇopamaḥ ।
7.9.43 ॥ ॥

mātustadvacanaṁ śrutvā daśagrīvaḥ pratāpavān ।
amarṣamatulaṁ lebhe pratijñāṁ cākarottadā ।
7.9.44 ॥ ॥

satyaṁ te pratijānāmi bhrātṛtulyo 'dhiko 'pi vā ।
bhaviṣyāmyojasā caiva santāpaṁ tyaja hṛdgatam ।
7.9.45 ॥ ॥

tatastenaiva kopena daśagrīvaḥ sahānujaḥ ।
cikīrṣurduṣkaraṁ karma tapase dhṛtamānasaḥ ।
7.9.46 ॥ ॥

prāpsyāmi tapasā kāmamiti kṛtvā 'dhyavasya ca ।
āgacchadātmasiddhyarthaṁ gokarṇasyāśramaṁ śubham ।
7.9.47 ॥ ॥

sa rākṣasastatra sahānujastadā tapaścakārātulamugravikramaḥ ।
atoṣayaccāpi pitāmahaṁ vibhuṁ dadau sa tuṣṭaśca varāñjayāvahān ।
7.9.48 ॥