उत्तरकाण्डम्Uttara Kāṇḍa

athābravīnmuniṁ rāmaḥ kathaṁ te bhrātaro vane ।
kīdṛśaṁ tu tadā brahmaṁstapastepurmahābalāḥ ।
7.10.1 ॥ ॥

agastyastvabravīttatra rāmaṁ suprītamānasam ।
tāṁstāndharmavidhīṁstatra bhrātaraste samāviśan ।
7.10.2 ॥ ॥

kumbhakarṇastato yatto nityaṁ dharmapathe sthitaḥ ।
tatāpa grīṣmakāle tu pañcāgnīnparitaḥ sthitaḥ ।
7.10.3 ॥ ॥

meghāmbusikto varṣāsu vīrāsanamasevata ।
nityaṁ ca śiśire kāle jalamadhyapratiśrayaḥ ।
7.10.4 ॥ ॥

evaṁ varṣasahasrāṇi daśa tasyāticakramuḥ ।
dharme prayatamānasya satpathe niṣṭhitasya ca ।
7.10.5 ॥ ॥

vibhīṣaṇastu dharmātmā nityaṁ dharmaparaḥ śuciḥ ।
pañcavarṣasahasrāṇi pādenaikena tasthivān ।
7.10.6 ॥ ॥

samāpte niyame tasya nanṛtuścāpsarogaṇāḥ ।
papāta puṣpavarṣaṁ ca kṣubhitāścāpi devatāḥ ।
7.10.7 ॥ ॥

pañcavarṣasahasrāṇi sūryaṁ caivānvavartata ।
tasthau cordhvaśirobāhuḥ svādhyāyadhṛtamānasaḥ ।
7.10.8 ॥ ॥

evaṁ vibhīṣaṇasyāpi svargasthasyeva nandane ।
daśavarṣasahasrāṇi gatāni niyatātmanaḥ ।
7.10.9 ॥ ॥

daśavarṣasahasraṁ tu nirāhāro daśānanaḥ ।
pūrṇe varṣasahasre tu śiraścāgnau juhāva saḥ ।
7.10.10 ॥ ॥

evaṁ varṣasahasrāṇi nava tasyāticakramuḥ ।
śirāṁsi nava cāpyasya praviṣṭāni hutāśanam ।
7.10.11 ॥ ॥

atha varṣasahasre tu daśame daśamaṁ śiraḥ ।
chettukāme daśagrīve prāptastatra pitāmahaḥ ।
7.10.12 ॥ ॥

pitāmahastu suprītaḥ sārdhaṁ devairupasthitaḥ ।
tava tāvaddaśagrīva prīto 'smītyabhyabhāṣata ।
7.10.13 ॥ ॥

śīghraṁ varaya dharmajña varo yaste 'bhikāṅkṣitaḥ ।
kaṁ te kāmaṁ karomyadya na vṛthā te pariśramaḥ ।
7.10.14 ॥ ॥

athābravīdṛśagrīvaḥ prahṛṣṭenāntarātmanā ।
praṇamya śirasā devaṁ harṣagadgadayā girā ।
7.10.15 ॥ ॥

bhagavanprāṇināṁ nityaṁ nānyatra maraṇādbhayam ।
nāsti mṛtyusamaḥ śatruramaratvamahaṁ vṛṇe ।
7.10.16 ॥ ॥

evamuktastadā brahmā daśagrīvamuvāca ha ।
nāsti sarvāmaratvaṁ te varamanyaṁ vṛṇīṣva me ।
7.10.17 ॥ ॥

evamukte tadā rāma brahmaṇā lokakartṛṇā ।
daśagrīva uvācedaṁ kṛtāñjalirathāgrataḥ ।
7.10.18 ॥ ॥

suparṇanāgayakṣāṇāṁ daityadānavarakṣasām ।
avadhyo 'haṁ prajādhyakṣa devatānāṁ ca śāśvata ।
7.10.19 ॥ ॥

nahi cintā mamānyeṣu prāṇiṣvamarapūjita ।
tṛṇabhūtā hi te manye prāṇino mānuṣādayaḥ ।
7.10.20 ॥ ॥

evamuktastu dharmātmā daśagrīveṇa rakṣasā ।
uvāca vacanaṁ devaḥ saha devaiḥ pitāmahaḥ ।
7.10.21 ॥ ॥

bhaviṣyatyevametatte vaco rākṣasapuṅgava ।
evamuktvā tu taṁ rāma daśagrīvaṁ pitāmahaḥ ।
7.10.22 ॥ ॥

śṛṇu cāpi varo bhūyaḥ prītasyeha śubho mama ।
hutāni yāni śīrṣāṇi pūrvamagnau tvayānagha ।
7.10.23 ॥ ॥

punastāni bhaviṣyanti tathaiva tava rākṣasa ।
vitarāmīha te saumya varaṁ cānyaṁ durāsadam ।
7.10.24 ॥ ॥

chandatastava rūpaṁ ca manasā yadyathepsitam ।
bhaviṣyati na sandeho madvarāttavarākṣasa ।
7.10.25 ॥ ॥

evaṁ pitāmahoktasya daśagrīvasya rakṣasaḥ ।
agnau hutāni śīrṣāṇi punastānyutthitāni vai ।
7.10.26 ॥ ॥

evamuktvā tu taṁ rāma daśagrīvaṁ pitāmahaḥ ।
vibhīṣaṇamathovāca vākyaṁ lokapitāmahaḥ ।
7.10.27 ॥ ॥

vibhīṣaṇa tvayā vatsa dharmasaṁhitabuddhinā ।
parituṣṭo 'smi dharmātmanvaraṁ varaya suvrata ।
7.10.28 ॥ ॥

vibhīṣaṇastu dharmātmā vacanaṁ prāha sāñjaliḥ ।
vṛtaḥ sarvaguṇairnityaṁ candramā raśmibhiryathā ।
7.10.29 ॥ ॥

bhagavankṛtakṛtyo 'haṁ yanme lokaguruḥ svayam ।
prītena yadi dātavyo varo me śṛṇu suvrata ।
7.10.30 ॥ ॥

paramāpadgatasyāpi dharme mama matirbhavet ।
aśikṣitaṁ ca brahmāstraṁ bhagavanpratibhātu me ।
7.10.31 ॥ ॥

yā yā me jāyate buddhiryeṣu yeṣvāśrameṣu ca ।
sā sā bhavatu dharmiṣṭhā taṁ tu dharmaṁ ca pālaye ।
7.10.32 ॥ ॥

eṣa me paramodāra varaḥ paramako mataḥ ।
nahi dharmābhiraktānāṁ loke kiñcana durlabham ।
7.10.33 ॥ ॥

punaḥ prajāpatiḥ prīto vibhīṣaṇamuvāca ha ।
dharmiṣṭhastvaṁ yathā vatsa tathā caitadbhaviṣyati ।
7.10.34 ॥ ॥

yasmādrākṣasayonau te jātasyāmitranāśana ।
nādharme jāyate buddhiramaratvaṁ dadāmi te ।
7.10.35 ॥ ॥

ityuktvā kumbhakarṇāya varaṁ dātumupasthitam ।
prajāpatiṁ surāḥ sarve vākyaṁ prāñjalayo 'bruvan ।
7.10.36 ॥ ॥

na tāvatkumbhakarṇāya pradātavyo varastvayā ।
jānīṣe hi yathā lokāṁstrāsayatyeṣa durmatiḥ ।
7.10.37 ॥ ॥

nandane 'psarasaḥ sapta mahendrānucarā daśa ।
anena bhakṣitā brahmannṛṣayo mānuṣāstathā ।
7.10.38 ॥ ॥

alabdhavarapūrveṇa yatkṛtaṁ rākṣasena tu ।
tadeṣa varalabdhaḥ syādbhakṣayedbhuvanatrayam ।
7.10.39 ॥ ॥

varavyājena moho 'smai dīyatāmamitaprabha ।
lokānāṁ svasti caivaṁ syādbhavedasya ca sannatiḥ ।
7.10.40 ॥ ॥

evamuktaḥ surairbrahmā 'cintayat padmasambhavaḥ ।
cintitā copatasthe 'sya pārśvaṁ devī sarasvatī ।
7.10.41 ॥ ॥

prāñjaliḥ sā tu pārśvasthā prāha vākyaṁ sarasvatī ।
iyamasmyāgatā deva kiṁ kāryaṁ karavāṇyaham ।
7.10.42 ॥ ॥

prajāpatistuṁ tāṁ prāptāṁ prāha vākyaṁ sarasvatīm ।
vāṇi tvaṁ rākṣasendrasya bhava yā devatepsitā ।
7.10.43 ॥ ॥

tathetyuktvā praviṣṭā sā prajāpatirathābravīt ।
kumbhakarṇa mahābāho varaṁ varaya yo mataḥ ।
7.10.44 ॥ ॥

kumbhakarṇastu tadvākyaṁ śrutvā vacanamabravīt ।
svaptuṁ varṣāṇyanekāni devadeva mamepsitam ।
7.10.45 ॥ ॥

evamastviti taṁ coktvā prāyādbrahmā suraiḥ samam ।
devī sarasvatī caiva rākṣasaṁ taṁ jahau punaḥ ।
7.10.46 ॥ ॥

brahmaṇā saha deveṣu gateṣu ca nabhaḥsthalam ।
vimukto 'sau sarasvatyā svāṁ sañjñāṁ ca tato gataḥ ।
7.10.47 ॥ ॥

kumbhakarṇastu duṣṭātmā cintayāmāsa duḥkhitaḥ ।
īdṛśaṁ kimidaṁ vākyaṁ mamādya vadanāccyutam ।
7.10.48 ॥ ॥

ahaṁ vyāmohito devairiti manye tadā ' 'gataiḥ ।
evaṁ labdhavarāḥ sarve bhrātaro dīptatejasaḥ ।
śleṣmātakavanaṁ gatvā tatra te nyavasansukham ।
7.10.49 ॥