उत्तरकाण्डम्Uttara Kāṇḍa

sumālī varalabdhāṁstu jñātvā caitānniśācarān ।
udatiṣṭhadbhayaṁ tyaktvā sānugaḥ sa rasātalāt ।
7.11.1 ॥ ॥

mārīcaśca prahastaśca virūpākṣo mahodaraḥ ।
udatiṣṭhansusaṁrabdhāḥ sacivāstasya rakṣasaḥ ।
7.11.2 ॥ ॥

sumālī sacivaiḥ sārdhaṁ vṛto rākṣasapuṅgavaiḥ ।
abhigamya daśagrīvaṁ pariṣvajyedamabravīt ।
7.11.3 ॥ ॥

diṣṭyā te vatsa samprāptaścintito 'yaṁ manorathaḥ ।
yastvaṁ tribhuvanaśreṣṭhāllabdhavānvaramuttamam ।
7.11.4 ॥ ॥

yatkṛte ca vayaṁ laṅkāṁ tyakatvā yātā rasātalam ।
tadgataṁ no mahābāho mahadviṣṇukṛtaṁ bhayam ।
7.11.5 ॥ ॥

asakṛttadbhayādbhītāḥ parityajya svamālayam ।
vidrutāḥ sahitāḥ sarve praviṣṭāḥ sma rasātalam ।
7.11.6 ॥ ॥

asmadīyā ca laṅkeyaṁ nagarī rākṣasocitā ।
niveśitā tava bhrātrā dhanādhyakṣeṇa dhīmatā ।
7.11.7 ॥ ॥

yadi nāmātra śakyaṁ syātsāmnā dānena vānagha ।
tarasā vā mahābāho pratyānetuṁ kṛtaṁ bhavet ।
7.11.8 ॥ ॥

tvaṁ tu laṅkeśvarastāta bhaviṣyasi na saṁśayaḥ ।
tvayā rākṣasavaṁśo 'yaṁ nimagno 'pi samuddhṛtaḥ ।
sarveṣāṁ naḥ prabhuścaiva bhaviṣyasi mahābala ।
7.11.9 ॥ ॥

athābravīddaśagrīvo mātāmahamupasthitam ।
vitteśo gururasmākaṁ nārhase vaktumīdṛśam ।
7.11.10 ॥ ॥

sāmnāpi rākṣasendreṇa pratyākhyāto garīyasā ।
kiñcinnāha tadā rakṣo jñātvā tasya cakīrṣitam ।
7.11.11 ॥ ॥

kasyacittvatha kālasya vasantaṁ rāvaṇaṁ tataḥ ।
uktavantaṁ tathā vākyaṁ daśagrīvaṁ niśācaraḥ ।
7.11.12 ॥ ॥

prahastaḥ praśritaṁ vākyamidamāha sa kāraṇam ।
7.11.13 ॥ ॥

daśagrīva mahābāho nārhastvaṁ vaktumīdṛśam ।
saubhrātraṁ nāsti śūrāṇāṁ śṛṇu cedaṁ vaco mama ।
7.11.14 ॥ ॥

aditiśca ditiścaiva bhaginyau sahite hi te ।
bhārye paramarūpiṇyau kaśyapasya prajāpateḥ ।
7.11.15 ॥ ॥

aditirjanayāmāsa devāṁstribhuvaneśvarān ।
ditistvajanayatputrānkaśyapasyātmasambhavān ।
7.11.16 ॥ ॥

daityānāṁ kila dharmajña purīyaṁ savanārṇavā ।
saparvatā mahī vīra te 'bhavanprabhaviṣṇavaḥ ।
7.11.17 ॥ ॥

nihatya tāṁstu samare viṣṇunā prabhaviṣṇunā ।
devānāṁ vaśamānītaṁ trailokyamidamavyayam ।
7.11.18 ॥ ॥

naitadeko bhavāneva kariṣyati viparyayam ।
surāsurairācaritaṁ tatkuruṣva vaco mama ।
7.11.19 ॥ ॥

evamukto daśagrīvaḥ prahṛṣṭenāntarātmanā ।
cintayitvā muhūrtaṁ vai bāḍhamityeva so 'bravīt ।
7.11.20 ॥ ॥

sa tu tenaiva harṣeṇa tasminnahani vīryavān ।
vanaṁ gato daśagrīvaḥ saha taiḥ kṣaṇadācaraiḥ ।
7.11.21 ॥ ॥

trikūṭasthaḥ sa tu tadā daśagrīvo niśācaraḥ ।
preṣayāmāsa dautyena prahastaṁ vākyakovidam ।
7.11.22 ॥ ॥

prahasta śīghraṁ gaccha tvaṁ brūhi nairṛtapuṅgavam ।
vacasā mama vitteśaṁ sāmapūrvamidaṁ vacaḥ ।
7.11.23 ॥ ॥

iyaṁ laṅkā purī rājanrākṣasānāṁ mahātmanām ।
tvayā niveśitā saumya naitadyuktaṁ tavānagha ।
7.11.24 ॥ ॥

tadbhavānyadi no hyadya dadyādatulavikrama ।
kṛtā bhavenmama prītirdhurmaścaivānupālitaḥ ।
7.11.25 ॥ ॥

sa tu gatvā purīṁ laṅkāṁ dhanadena surakṣitām ।
abravītparamodāraṁ vittapālamidaṁ vacaḥ ।
7.11.26 ॥ ॥

preṣito 'haṁ tava bhrātrā daśagrīveṇa suvrata ।
tvatsamīpaṁ mahābāho sarvaśastrabhṛtāṁ vara ।
7.11.27 ॥ ॥

tacchrūyatāṁ mahāprājña sarvaśāstraviśārada ।
vacanaṁ mama vitteśa yadbravīti daśānanaḥ ।
7.11.28 ॥ ॥

iyaṁ kila purī ramyā sumālipramukhaiḥ purā ।
bhuktapūrvā viśālākṣa rākṣasairbhīmavikramaiḥ ।
7.11.29 ॥ ॥

tena vijñāpyate so 'yaṁ sāmprataṁ viśravātmaja ।
tadeṣā dīyatāṁ tāta yācatastasya sāmataḥ ।
7.11.30 ॥ ॥

prahastādabhisaṁśrutya devo vaiśravaṇo vacaḥ ।
pratyuvāca prahastaṁ taṁ vākyaṁ vākyaviśāradaḥ ।
7.11.31 ॥ ॥

dattā mameyaṁ pitrā tu laṅkā śūnyā niśācaraiḥ ।
nivāsite ca me yakṣairdānamānādibhirguṇaiḥ ।
7.11.32 ॥ ॥

brūhi gaccha daśagrīvaṁ puraṁ rājyaṁ ca yanmama ।
tavāpyetanmahābāho bhuṅkṣva rājyamakaṇṭakam ।
7.11.33 ॥ ॥

evamuktvā dhanādhyakṣo jagāma piturantikam ।
7.11.34 ॥ ॥

abhivādya guruṁ prāha rāvaṇasya yadīpsitam ।
eṣa tāta daśagrīvo dūtaṁ preṣitavānmama ।
7.11.35 ॥ ॥

dīyatāṁ nagarī laṅkā pūrvaṁ rakṣogaṇoṣitā ।
mayātra yadanuṣṭheyaṁ tanmamācakṣva suvrata ।
7.11.36 ॥ ॥

brahmarṣistvevamukto 'sau viśravā munipuṅgavaḥ ।
prāñjaliṁ dhanadaṁ prāha śṛṇu putra vaco mama ।
7.11.37 ॥ ॥

daśagrīvo mahābāhuruktavānmama sannidhau ।
mayā nirbhartsitaścāsīdbahuśoktaḥ sudurmatiḥ ।
7.11.38 ॥ ॥

sa krodhena mayā cokto dhvaṁsate ca punaḥ punaḥ ।
śreyo 'bhiyuktaṁ dharmyaṁ ca śṛṇu putra vaco mama ।
7.11.39 ॥ ॥

varapradānasammūḍho mānyā 'mānyān sa durmatiḥ ।
na vetti mama śāpācca prakṛtiṁ dāruṇāṁ gataḥ ।
7.11.40 ॥ ॥

tasmādgaccha mahābāho kailāsaṁ dharaṇīdharam ।
niveśaya nivāsārthaṁ tyaktvā laṅkāṁ sahānugaḥ ।
7.11.41 ॥ ॥

tatra mandākinī ramyā nadīnāmuttamā nadī ।
kāñcanaiḥ sūryasaṅkāśaiḥ paṅkajaiḥ saṁvṛtodakā ।
7.11.42 ॥ ॥

kumudairutpalaiścaiva tathā 'nyaiśca sugandhibhiḥ ।
7.11.43 ॥ ॥

tatra devāḥ sagandharvāḥ sāpsaroragakiṁnarāḥ ।
vihāraśīlāḥ satataṁ ramante sarvadā ' 'śritāḥ ।
7.11.44 ॥ ॥

na hi kṣamaṁ tavānena vairaṁ dhanada rakṣasā ।
jānīṣe hi yathā 'nena labdhaḥ paramako varaḥ ।
7.11.45 ॥ ॥

evamukto gṛhītvā ' 'śu tadvacaḥ pitṛgauravāt ।
sadāraputraḥ sāmānyaḥ savāhanadhano gataḥ ।
7.11.46 ॥ ॥

prahasto 'tha daśagrīvaṁ gatvā vacanamabravīt ।
prahṛṣṭātmā mahātmānaṁ sahāmātyaṁ sahānujam ।
7.11.47 ॥ ॥

śūnyā sā nagarī laṅkā tyakttvaināṁ dhanado gataḥ ।
praviśya tāṁ sahāsmābhiḥ svadharmaṁ pratipālaya ।
7.11.48 ॥ ॥

evamukto daśagrīvaḥ prahastena mahābalaḥ ।
viveśa nagarīṁ laṅkāṁ bhrātṛbhiḥ sabalānugaiḥ ।
7.11.49 ॥ ॥

dhanadena parityaktāṁ suvibhaktamahāpathām ।
āruroha sa devāriḥ svargaṁ devādhipo yathā ।
7.11.50 ॥ ॥

sa cābhiṣiktaḥ kṣaṇadācaraistadā niveśayāmāsa purīṁ daśānanaḥ ।
nikāmapūrṇā ca babhūva sā purī niśācarairnīlabalāhakopamaiḥ ।
7.11.51 ॥ ॥

dhaneśvarastvatha pitṛvākyagauravānnyaveśayacchaśivimale girau purīm ।
svalaṅkṛtairbhavanavarairvibhūṣitāṁ purandarasveva tadā 'marāvatīm ।
7.11.52 ॥