उत्तरकाण्डम्Uttara Kāṇḍa

hanyamāne bale tasminpadmanābhena pṛṣṭhataḥ ।
mālvānsannivṛtto 'tha velāmetya ivārṇavaḥ ।
7.8.1 ॥ ॥

saṁraktanayanaḥ kopāccalanmaulirniśācaraḥ ।
padmanābhamidaṁ prāha vacanaṁ puruṣottamam ।
7.8.2 ॥ ॥

nārāyaṇa na jānīṣe kṣātradharmaṁ purātanam ।
ayuddhamanaso bhītānasmānhaṁsi yathetaraḥ ।
7.8.3 ॥ ॥

parāṅmukhavadhaṁ pāpaṁ yaḥ karotyasuretaraḥ ।
sa hantā na gataḥ svargaṁ labhate puṇyakarmaṇām ।
7.8.4 ॥ ॥

yuddhaśraddhā 'thavā te 'sti śaṅkhacakragadādhara ।
4ahaṁ sthito 'smi paśyāmi balaṁ darśaya yattava ।
7.8.5 ॥ ॥

mālyavantaṁ sthitaṁ dṛṣṭvā mālyavantamivācalam ।
uvāca rākṣasendraṁ taṁ devarājānujo balī ।
7.8.6 ॥ ॥

yuṣmatto bhayabhītānāṁ devānāṁ vai mayā 'bhayam ।
rākṣasotsādanaṁ dattaṁ tadetadanupālyate ।
7.8.7 ॥ ॥

prāṇairapi priyaṁ kāryaṁ devānāṁ hi sadā mayā ।
so 'haṁ vo nihaniṣyāmi rasātalagatānapi ।
7.8.8 ॥ ॥

devadevaṁ bruvāṇaṁ taṁ raktāmburuhalocanam ।
śaktyā bibheda saṅkruddho rākṣasendro bhujāntare ।
7.8.9 ॥ ॥

mālyavadbhujanirmuktā śaktirghaṇṭākṛtasvanā ।
harerurasi babhrāja meghastheva śatahradā ।
7.8.10 ॥ ॥

tatastāmeva cotkṛṣya śaktiṁ śaktidharapriyaḥ ।
mālyavantaṁ samuddiśya cikṣepāmburuhekṣaṇaḥ ।
7.8.11 ॥ ॥

skandotsṛṣṭeva sā śaktirgovindakaranissṛtā ।
kāṅkṣantī rākṣasaṁ prāyānmāhendrīvāñjanācalam ।
7.8.12 ॥ ॥

sā tasyorasi vistīrṇe hārabhārā 'vabhāsite ।
apatadrākṣasendrasya girikūṭa ivāśaniḥ ।
7.8.13 ॥ ॥

tayā bhinnatanutrāṇaḥ prāviśadvipulaṁ tamaḥ ।
mālyavānpunarāśvastastasthau giririvācalaḥ ।
7.8.14 ॥ ॥

tataḥ kārṣṇāyasaṁ śūlaṁ kaṇṭakairbahubhirvatam ।
pragṛhyābhyahanaddevaṁ stanayorantare dṛḍham ।
7.8.15 ॥ ॥

tathaiva raṇaraktastu muṣṭinā vāsavānujam ।
tāḍayitvā dhanurmātramapakrānto niśācaraḥ ।
7.8.16 ॥ ॥

tato 'mbare mahāñchabdaḥ sādhusādhviti coditaḥ ।
āhatya rākṣaso viṣṇuṁ garuḍaṁ cāpyatāḍayat ।
7.8.17 ॥ ॥

vainateyastataḥ kruddhaḥ pakṣavātena rākṣasam ।
vyapohadbalavānvāyuḥ śuṣkaparṇacayaṁ yathā ।
7.8.18 ॥ ॥

dvijendrapakṣavātena drāvitaṁ dṛśya pūrvajam ।
sumālī svabalaiḥ sārdhaṁ laṅkāmabhimukho yayau ।
7.8.19 ॥ ॥

pakṣavātabaloddhūto mālyavānapi rākṣasaḥ ।
svabalena samāgamya yayau laṅkāṁ hriyā vṛtaḥ ।
7.8.20 ॥ ॥

evaṁ te rākṣasā tena hariṇā kamalekṣaṇa ।
bahuśaḥ saṁyuge bhagnā hatapravaranāyakāḥ ।
7.8.21 ॥ ॥

aśaknuvantaste viṣṇuṁ pratiyoddhuṁ bhayārditāḥ ।
tyaktvā laṅkāṁ gatā vastuṁ pātālaṁ sahapatnayaḥ ।
7.8.22 ॥ ॥

sumālinaṁ samāsādya rākṣasaṁ raghusattama ।
sthitāḥ prakhyātavīryāste vaṁśe sālakaṭaṅkaṭe ।
7.8.23 ॥ ॥

ye tvayā nihatāste tu paulastyā nāma rākṣasāḥ sumālī mālyavānmālī ye ca teṣāṁ puraḥsarāḥ ।
sarve tebhyo mahābhāgā rāvaṇādbalavattarāḥ ।
7.8.24 ॥ ॥

na cānyo rākṣasānhantā surārīndevakaṇṭakān ।
ṛte nārāyaṇaṁ devaṁ śaṅkhacakragadādharam ।
7.8.25 ॥ ॥

bhavānnārāyaṇo devaścaturbāhuḥ sanātanaḥ ।
rākṣasānhantumutpanno hyajeyaḥ prabhuravyayaḥ ।
7.8.26 ॥ ॥

naṣṭadharmavyavasthātā kāle kāle prajākaraḥ ।
utpadyate dasyuvadhe śaraṇāgatavatsalaḥ ।
7.8.27 ॥ ॥

eṣā mayā tava narādhipa rākṣasānāmutpattiradya kathitā sakalā yathāvat ।
bhūyo nibodha raghusattama rāvaṇasya janmaprabhāvamatulaṁ sasutasya sarvam ।
7.8.28 ॥ ॥

cirātsumālī vyacaradrasātalaṁ sa rākṣaso viṣṇubhayārditastadā ।
putraiśca pautraiśca samanvito balī tatastu laṅkāmavasaddhaneśvaraḥ ।
7.8.29 ॥