उत्तरकाण्डम्Uttara Kāṇḍa

śrutvā kimpuruṣotpattiṁ lakṣmaṇo bharatastadā ।
āścaryamiti cābrūtāmubhau rāmaṁ janeśvaram ।
7.89.1 ॥ ॥

atha rāmaḥ kathāmetāṁ bhūya eva mahāyaśāḥ ।
kathayāmāsa dharmātmā prajāpatisutasya vai ।
7.89.2 ॥ ॥

sarvāstā vidrutā dṛṣṭvā kinnarīrṛṣisattamaḥ ।
uvāca rūpasampannāṁ tāṁ striyaṁ prahasanniva ।
7.89.3 ॥ ॥

somasyāhaṁ sudayitaḥ sutaḥ surucirānane ।
bhajasva māṁ varārohe bhaktyā snigdhena cakṣuṣā ।
7.89.4 ॥ ॥

tasya tadvacanaṁ śrutvā śūnye svajanavarjite ।
ilā suruciraprakhyaṁ pratyuvāca mahāgraham ।
7.89.5 ॥ ॥

ahaṁ kāmacarī saumya tavāsmi vaśavartinī ।
praśādhi māṁ somasuta yathecchasi tathā kuru ।
7.89.6 ॥ ॥

tasyāstadadbhutaprakhyaṁ śrutvā harṣamupāgataḥ ।
sa vai kāmī saha tayā reme candramasaḥ sutaḥ ।
7.89.7 ॥ ॥

budhasya mādhavo māsastāmilāṁ rucirānanām ।
gato ramayato 'tyarthaṁ kṣaṇavattasya kāminaḥ ।
7.89.8 ॥ ॥

atha māse tu sampūrṇe pūrṇendusadṛśānanaḥ ।
prajāpatisutaḥ śrīmāñchayane pratyabudhyata ।
7.89.9 ॥ ॥

so 'paśyatsomajaṁ tatra tapantaṁ salilāśaye ।
ūrdhvabāhuṁ nirālambaṁ taṁ rājā pratyabhāṣata ।
7.89.10 ॥ ॥

bhagavanparvataṁ durgaṁ praviṣṭo 'smi sahānugaḥ ।
na ca paśyāmi tatsainyaṁ kva nu te māmakā gatāḥ ।
7.89.11 ॥ ॥

tacchrutvā tasya rājarṣernaṣṭasañjñasya bhāṣitam ।
pratyuvāca śubhaṁ vākyaṁ sāntvayanparayā girā ।
7.89.12 ॥ ॥

aśmavarṣeṇa mahatā bhṛtyāste vinipātitāḥ ।
tvaṁ cāśramapade supto vātavarṣabhayārditaḥ ।
7.89.13 ॥ ॥

samāśvasihi bhadraṁ te nirbhayo vigatajvaraḥ ।
phalamūlāśano vīra nivaseha yathāsukham ।
7.89.14 ॥ ॥

sa rājā tena vākyena pratyāśvasto mahāmatiḥ ।
pratyuvāca tato vākyaṁ dīno bhṛtyakṣayād bhṛśam ।
7.89.15 ॥ ॥

tyakṣyāmyahaṁ svakaṁ rājyaṁ nāhaṁ bhṛtyairvinākṛtaḥ ।
vartayeyaṁ kṣaṇaṁ brahmansamanujñātumarhasi ।
7.89.16 ॥ ॥

suto dharmaparo brahmañjyeṣṭho mama mahāyaśāḥ ।
śaśabinduriti khyātaḥ sa me rājyaṁ prapatsyate ।
7.89.17 ॥ ॥

na hi śakṣyāmyahaṁ hitvā bhṛtyadārānsukhānvitān ।
prativaktuṁ mahātejaḥ kiñcidapyaśubhaṁ vacaḥ ।
7.89.18 ॥ ॥

tathā bruvati rājendre budhaḥ paramamadbhutam ।
sāntvapūrvamathovāca vāsasta iha rocatām ।
7.89.19 ॥ ॥

na santāpastvayā kāryaḥ kārdameya mahābala ।
saṁvatsaroṣitasyeha kārayiṣyāmi te hitam ।
7.89.20 ॥ ॥

tasya tadvacanaṁ śrutvā budhasyākliṣṭakarmaṇaḥ ।
vāsāya vidadhe buddhiṁ yaduktaṁ brahmavādinā ।
7.89.21 ॥ ॥

māsaṁ sa strī tadā bhūtvā ramayatyaniśaṁ śudā ।
māsaṁ puruṣabhāvena dharmabuddhiṁ cakāra saḥ ।
7.89.22 ॥ ॥

tataḥ sā navame māsi ilā somasutātsutam ।
janayāmāsa suśroṇī purūravasamūrjitam ।
7.89.23 ॥ ॥

jātamātraṁ tu suśroṇī piturhaste nyaveśayat ।
budhasya samavarṇabhamilā putraṁ mahābalam ।
7.89.24 ॥ ॥

budhastu puruṣībhūtaṁ sa vai saṁvatsarāntaram ।
kathābhī ramayāmāsa dharmayuktābhirātmavān ।
7.89.25 ॥