उत्तरकाण्डम्Uttara Kāṇḍa

tāṁ kathāmilasambaddhāṁ rāmeṇa samudīritām ।
lakṣmaṇo bharataścaiva śrutvā paramavismitau ।
7.88.1 ॥ ॥

tau rāmaṁ prāñjalī bhūtvā tasya rājño mahātmanaḥ ।
vistaraṁ tasya bhāvasya tadā papracchatuḥ punaḥ ।
7.88.2 ॥ ॥

kathaṁ sa rājā strībhūto vartayāmāsa durgatiḥ ।
puruṣaḥ sa yadā bhūtaḥ kāṁ vṛttiṁ vartayatyasau ।
7.88.3 ॥ ॥

tayostadbhāṣitaṁ śrutvā kautūhalasamanvitam ।
kathayāmāsa kākutsthastasya rājño yathāgatam ।
7.88.4 ॥ ॥

tameva prathamaṁ māsaṁ strībhūtā lokasundarī ।
tābhiḥ parivṛtā strībhirye ca pūrvapadānugāḥ ।
7.88.5 ॥ ॥

tatkānanaṁ vigāhvāśu vijahre lokasundarī ।
drumagulmalatākīrṇaṁ padbhyāṁ padmadalekṣaṇā ।
7.88.6 ॥ ॥

vāhanāni ca sarvāṇi sā tyaktvā vai samantataḥ ।
parvatābhogavivare tasminreme ilā tadā ।
7.88.7 ॥ ॥

atha tasminvanoddeśe parvatasyāvidūrataḥ ।
saraḥ suruciraprakhyaṁ nānāpakṣigaṇairyutam ।
7.88.8 ॥ ॥

dadarśa sā tvilā tasminbudhaṁ somasutaṁ tadā ।
jvalantaṁ svena vapuṣā pūrṇasomamivoditam ।
7.88.9 ॥ ॥

tapantaṁ ca tapastīvramambhomadhye durāsadam ।
yaśaskaraṁ kāmakaraṁ kāruṇye paryavasthitam ।
7.88.10 ॥ ॥

sā taṁ jalāśayaṁ sarvaṁ kṣobhayāmāsa vismitā ।
sahagaiḥ pūrvapuruṣaiḥ strībhūtai raghunandana ।
7.88.11 ॥ ॥

budhastu tāṁ samīkṣyaiva kāmabāṇavaśaṁ gataḥ ।
nopalebhe tadā ' 'tmānaṁ sañcacāla tadā ' 'mbhasi ।
7.88.12 ॥ ॥

ilāṁ nirīkṣamāṇastu trailokyābhyadhikāṁ śubhām ।
cintāṁ samabhyatikrāmat kā nviyaṁ devatādhikā ।
7.88.13 ॥ ॥

na devīṣu na nāgīṣu nāsurīṣvapsaraḥsu ca ।
dṛṣṭapūrvā mayā kācidrūpeṇānena śobhitā ।
7.88.14 ॥ ॥

sadṛśīyaṁ mama bhavedyadi nānyaparigrahaḥ ।
iti buddhiṁ samāsthāya jalātkūlamupāgamat ।
7.88.15 ॥ ॥

āśramaṁ samupāgamya tatastāḥ pramadottamāḥ ।
śabdāpayata dharmātmā tāścainaṁ ca vavandire ।
7.88.16 ॥ ॥

sa tāḥ papraccha dharmātmā kasyaiṣā lokasundarī ।
kimarthamāgatā caiva sarvamākhyāta mā ciram ।
7.88.17 ॥ ॥

śubhaṁ tu tasya tadvākyaṁ madhuraṁ madhurākṣaram ।
śrutvā striyaśca tāḥ sarvā ūcurmadhurayā girā ।
7.88.18 ॥ ॥

asmākameṣā suśroṇī prabhutve vartate sadā ।
apatiḥ kānanānteṣu sahāsmābhiścaratyasau ।
7.88.19 ॥ ॥

tadvākyamavyaktapadaṁ tāsāṁ strīṇāṁ niśamya ca ।
vidyāmāvartanīṁ puṇyāmāvartayata sa dvijaḥ ।
7.88.20 ॥ ॥

so 'rthaṁ viditvā sakalaṁ tasya rājño yathāgatam ।
sarvā eva striyastāśca babhāṣe munipuṅgavaḥ ।
7.88.21 ॥ ॥

atra kimpuruṣīrbhūtvā śailarodhasi vatsyatha ।
āvāsastu girāvasmiñchīghrameva vidhīyatām ।
7.88.22 ॥ ॥

mūlapatraphalaiḥ sarvā vartayiṣyatha nityadā ।
striyaḥ kimpuruṣānnāma bharta'nsamupalapsyatha ।
7.88.23 ॥ ॥

tāḥ śrutvā somaputrasya vācaṁ kimpuruṣīkṛtāḥ ।
upāsāñcakrire śailaṁ vadhvastā bahulāstadā ।
7.88.24 ॥