उत्तरकाण्डम्Uttara Kāṇḍa

tadā vṛtravadhaṁ sarvamakhilena sa lakṣmaṇaḥ ।
kathayitvā naraśreṣṭhaḥ kathāśeṣaṁ pracakrame ।
7.86.1 ॥ ॥

tato hate mahāvīrye vṛtre devabhayaṅkare ।
brahmahatyāvṛtaḥ śakraḥ sañjñāṁ lebhe na vṛtrahā ।
7.86.2 ॥ ॥

so 'ntamāśritya lokānāṁ naṣṭasañjño vicetanaḥ ।
kālaṁ tatrāvasatkañcidveṣṭamāna ivoragaḥ ।
7.86.3 ॥ ॥

atha naṣṭe sahasrākṣe udvignamabhavajjagat ।
bhūmiśca dhvastasaṅkāśā niḥsnehā śuṣkakānanā ।
7.86.4 ॥ ॥

niḥsrotasaśca te sarve tu hradāśca saritastathā ।
saṅkṣobhaścaiva sattvānāmanāvṛṣṭikṛto 'bhavat ।
7.86.5 ॥ ॥

kṣīyamāṇe tu loke 'sminsambhrāntamanasaḥ surāḥ ।
yaduktaṁ viṣṇunā pūrvaṁ taṁ yajñaṁ samupānayan ।
7.86.6 ॥ ॥

tataḥ sarve suragaṇāḥ sopādhyāyāḥ saharṣibhiḥ ।
taṁ deśaṁ samupājagmuryatrendro bhayamohitaḥ ।
7.86.7 ॥ ॥

te tu dṛṣṭvā sahasrākṣamāvṛtaṁ brahmahatyayā ।
taṁ puraskṛtya deveśamaśvamedhamupākraman ।
7.86.8 ॥ ॥

tato 'śvamedhaḥ sumahānmahendrasya mahātmanaḥ ।
vavṛdhe brahmahatyayāḥ pāvanārthaṁ nareśvara ।
7.86.9 ॥ ॥

tato yajñe samāpte tu brahmahatyā mahātmanaḥ ।
abhigamyābravīdvākyaṁ kva me sthānaṁ vidhāsyatha ।
7.86.10 ॥ ॥

te tāmūcustadā devāstuṣṭāḥ prītisamanvitāḥ ।
caturdhā vibhajātmānamātmanaiva durāsade ।
7.86.11 ॥ ॥

devānāṁ bhāṣitaṁ śrutvā brahmahatyā mahātmanām ।
sannidhau sthānamanyatra varayāmāsa durvasā ।
7.86.12 ॥ ॥

ekenāṁśena vatsyāmi pūrṇodāsu nadīṣu vai ।
caturo vārṣikānmāsāndarpaghnī kāmavāriṇī ।
7.86.13 ॥ ॥

bhūmyāmahaṁ sarvakālamekenāṁśena sarvadā ।
vasiṣyāmi na sandehaḥ satyenaitadbravīmi vaḥ ।
7.86.14 ॥ ॥

yo 'yamaṁśastṛtīyo me strīṣu yauvanaśāliṣu ।
trirātraṁ darpapūrṇāsu vaśiṣye darpaghātinī ।
7.86.15 ॥ ॥

hantāro brāhmaṇānye tu mṛṣāpūrvamadūṣakān ।
tāṁścaturthena bhāgena saṁśrayiṣye surarṣabhāḥ ।
7.86.16 ॥ ॥

pratyūcustāṁ tato devā yathā vadasi durvase ।
tathā bhavatu tatsarvaṁ sādhayasva yadīpsitam ।
7.86.17 ॥ ॥

tataḥ prītyā 'nvitā devāḥ sahasrākṣaṁ vavandire ।
vijvaraḥ sa ca pūtātmā vāsavaḥ samapadyata ।
7.86.18 ॥ ॥

praśāntaṁ ca jagatsarvaṁ sahasrākṣe pratiṣṭhite ।
yajñaṁ cādbhutasaṅkāśaṁ tadā śakro 'bhyapūjayat ।
7.86.19 ॥ ॥

īdṛśo hyaśvamedhasya prasādo raghunandana ।
yajasva sumahābhāga hayamedhena pārthiva ।
7.86.20 ॥ ॥

iti lakṣmaṇavākyamuttamaṁ nṛpatiratīva manoharaṁ mahātmā ।
paritoṣamavāpa hṛṣṭacetā niśamayyendrasamānavikramaujāḥ ।
7.86.21 ॥