उत्तरकाण्डम्Uttara Kāṇḍa

tacchrutvā bhāṣitaṁ tasya rāmasyākliṣṭa karmaṇaḥ ।
dvāssthaḥ kumārāvāhūya rāghavāya nyavedayat ।
7.83.1 ॥ ॥

dṛṣṭvā tu rāghavaḥ prāptau priyau bharatalakṣmaṇau ।
pariṣvajya tadā rāmo vākyametaduvāca ha ।
7.83.2 ॥ ॥

kṛtaṁ mayā yathā tathyaṁ dvijakāryamanuttamam ।
dharmasetumatho bhūyaḥ kartumicchāmi rāghavau ।
7.83.3 ॥ ॥

akṣayyaścāvyayaścaiva dharmaseturmato mama ।
dharmaprasādhakaṁ hyetat sarvapāpapraṇāśanam ।
7.83.4 ॥ ॥

yuvābhyāmātmabhūtābhyāṁ rājasūyamanuttamam ।
sahito yaṣṭumicchāmi tatra dharmo hi śāśvataḥ ।
7.83.5 ॥ ॥

iṣṭvā tu rājasūyena mitraḥ śatrunibarhaṇaḥ ।
suhutena suyajñena varuṇatvamupāgamat ।
7.83.6 ॥ ॥

somaśca rājasūyena iṣṭvā dharmeṇa dharmavit ।
prāptaśca sarvalokeṣu kīrtisthānaṁ ca śāśvatam ।
7.83.7 ॥ ॥

asminnahani yacchreyaścintyatāṁ tanmayā saha ।
hitaṁ cāyatiyuktaṁ ca prayatau kartumarhathaḥ ।
7.83.8 ॥ ॥

śrutvā tu rāghavasyaitadvākyaṁ vākyaviśāradaḥ ।
bharataḥ prāñjalirbhūtvā vākyametaduvāca ha ।
7.83.9 ॥ ॥

tvayi dharmaḥ paraḥ sādho tvayi sarvā vasundharā ।
pratiṣṭhitā mahābāho yaśaścāmitavikrama ।
7.83.10 ॥ ॥

mahīpālāśca sarve tvāṁ prajāpatimivāmarāḥ ।
nirīkṣante mahātmānaṁ lokānāthaṁ yathā vayam ।
7.83.11 ॥ ॥

putrāśca pitṛvadrājanpaśyanti tvāṁ mahābala ।
pṛthivyā gatibhūto 'si prāṇināmapi rāghava ।
7.83.12 ॥ ॥

sa tvamevaṁvidhaṁ yajñamāhartāsi kathaṁ nṛpa ।
pṛthivyāṁ rājavaṁśānāṁ vināśo yatra dṛśyate ।
7.83.13 ॥ ॥

pṛthivyāṁ ye ca puruṣā rājanpauruṣamāgatāḥ ।
sarveṣāṁ bhavitā tatra saṅkṣayaḥ sarvakopajaḥ ।
7.83.14 ॥ ॥

sa tvaṁ puruṣaśārdūla guṇairatulavikrama ।
pṛthivīṁ nārhase hantuṁ vaśe hi tava vartate ।
7.83.15 ॥ ॥

bharatasya tu tadvākyaṁ śrutvā 'mṛtamayaṁ tadā ।
praharṣamatulaṁ lebhe rāmaḥ satyaparākramaḥ ।
7.83.16 ॥ ॥

uvāca ca śubhaṁ vākyaṁ kaikeyyānandavardhanam ।
prīto 'smi parituṣṭo 'smi tavādya vacane 'nagha ।
7.83.17 ॥ ॥

idaṁ vacanamaklībaṁ tvayā dharmasamāhitam ।
vyāhṛtaṁ puruṣavyāghra pṛthivyāḥ paripālanam ।
7.83.18 ॥ ॥

eṣyadasmadabhiprāyādrājasūyātkratūttamāt ।
nivartayāmi dharmajña tava suvyāhṛtena ca ।
7.83.19 ॥ ॥

lokapīḍākaraṁ karma na kartavyaṁ vicakṣaṇaiḥ ।
bālānāṁ tu śubhaṁ vākyaṁ grāhya lakṣmaṇapūrvaja ।
tasmācchṛṇomi te vākyaṁ sādhu yuktaṁ mahāmate ।
7.83.20 ॥