उत्तरकाण्डम्Uttara Kāṇḍa

ṛṣervacanamājñāya rāmaḥ sandhyāmupāsitum ।
upākramatsaraḥ puṇyamapsarogaṇasevitam ।
7.82.1 ॥ ॥

tatrodakamupaspṛśya sandhyāmanvāsya paścimām ।
āśramaṁ prāviśadrāmaḥ kumbhayonermahātmanaḥ ।
7.82.2 ॥ ॥

tasyāgastyo bahuguṇaṁ kandamūlaṁ tathauṣadhim ।
śālyādīni pavitrāṇi bhojanārthamakalpayat ।
7.82.3 ॥ ॥

sa bhuktavānnaraśreṣṭhastadannamamṛtopamam ।
prītaśca parituṣṭaśca tāṁ rātriṁ samupāviśat ।
7.82.4 ॥ ॥

prabhāte kālyamutthāya kṛtvā ' 'hnikamarindamaḥ ।
ṛṣiṁ samupacakrāma gamanāya raghūttamaḥ ।
7.82.5 ॥ ॥

abhivādyābravīdrāmo maharṣiṁ kumbhasambhavam ।
āpṛcche svāṁ purīṁ gantuṁ māmanujñātumarhasi ।
7.82.6 ॥ ॥

dhanyo 'smyanugṛhīto 'smi darśanena mahātmanaḥ ।
draṣṭuṁ caivāgamiṣyāmi pāvanārthamihātmanaḥ ।
7.82.7 ॥ ॥

tathā vadati kākutsthe vākyamadbhutadarśanam ।
uvāca paramaprīto dharmanetrastapodhanaḥ ।
7.82.8 ॥ ॥

atyadbhutamidaṁ vākyaṁ tava rāma śubhākṣaram ।
pāvanaḥ sarvabhūtānāṁ tvameva raghunandana ।
7.82.9 ॥ ॥

muhūrtamapi rāma tvāṁ ye ca paśyanti kecana ।
pāvitāḥ svargabhūtāśca pūjyāste sarvadaivataiḥ ।
7.82.10 ॥ ॥

ye ca tvāṁ ghoracakṣurbhiḥ paśyanti prāṇino bhuvi ।
hatāste yamadaṇḍena sadyo nirayagāminaḥ ।
7.82.11 ॥ ॥

īdṛśastvaṁ raghuśreṣṭha pāvanaḥ sarvadehinām ।
bhuvi tvāṁ kathayanto 'pi siddhimeṣyanti rāghava ।
7.82.12 ॥ ॥

gaccha cāriṣṭamavyāgraḥ panthānamakutobhayam ।
praśādhi rājyaṁ dharmeṇa gatirhi jagato bhavān ।
7.82.13 ॥ ॥

evamuktastu muninā prāñjaliḥ pragraho nṛpaḥ ।
abhyavādayata prājñastamṛṣiṁ puṇyaśālinam ।
7.82.14 ॥ ॥

abhivādya muniśreṣṭhaṁ tāṁśca sarvāṁstapodhanān ।
adhyārohattadavyagraḥ puṣpakaṁ hemabhūṣitam ।
7.82.15 ॥ ॥

taṁ prayāntaṁ munigaṇā hyāśīrvādaiḥ samantataḥ ।
apūjayanmahendrābhaṁ sahasrākṣamivāmarāḥ ।
7.82.16 ॥ ॥

svasthaḥ sa dadṛśe rāmaḥ puṣpake hemabhūṣite ।
śaśī meghasamīpastho yathā jaladharāgame ।
7.82.17 ॥ ॥

tato 'rdhadivase prāpte pūjyamānastatastataḥ ।
ayodhyāṁ prāpya kākutstho madhyakakṣyāmavāruhat ।
7.82.18 ॥ ॥

tato visṛjya ruciraṁ puṣpakaṁ kāmagāmi tat ।
visarjayitvā gaccheti svasti te 'stviti ca prabhuḥ ।
7.82.19 ॥ ॥

kakṣāntaravinikṣiptaṁ dvāssthaṁ rāmo 'bravīdvacaḥ ।
lakṣmaṇaṁ bharataṁ caiva gatvā tau laghuvikramau ।
mamāgamanamākhyāya śabdāpayata mā ciram ।
7.82.20 ॥