उत्तरकाण्डम्Uttara Kāṇḍa

tasya tadvacanaṁ śrutvā rāmasyākliṣṭakarmaṇaḥ ।
avākchirāstathābhūtvā vākyametaduvāca ha ।
7.76.1 ॥ ॥

śūdrayonyāṁ prasūto 'smi śambūko nāma nāmataḥ ।
devatvaṁ pārthaye rāma saśarīro mahāyaśaḥ ।
7.76.2 ॥ ॥

na mithyā 'haṁ vade rāma devalokajigīṣayā ।
śūdraṁ māṁ viddhi kākutstha tapa ugraṁ samāsthitam ।
7.76.3 ॥ ॥

bhāṣatastasya śūdrasya khaḍgaṁ suruciraprabham ।
niṣkṛṣya kośādvimalaṁ śiraściccheda rāghavaḥ ।
7.76.4 ॥ ॥

tasmiñchūdre hate devāḥ sendrāḥ sāgnipurogamāḥ ।
sādhu sādhviti kākutsthaṁ praśaśaṁsurmuhurmuhuḥ ।
7.76.5 ॥ ॥

puṣpavṛṣṭirmahatyāsīddivyānāṁ susugandhinām ।
puṣpāṇāṁ vāyumuktānāṁ sarvataḥ prapapāta ha ।
7.76.6 ॥ ॥

suprītāścābruvanrāmaṁ devāḥ satyaparākramam ।
surakāryamidaṁ saumya sukṛtaṁ te mahāmate ।
7.76.7 ॥ ॥

gṛhāṇa ca varaṁ saumya yattvamicchasyarindama ।
svargabhāṅnahi śūdro 'yaṁ tvatkṛte raghunandana ।
7.76.8 ॥ ॥

devānāṁ bhāṣitaṁ śrutvā rāghavaḥ susamāhitaḥ ।
uvāca prāñjalirvākyaṁ sahasrākṣaṁ purandaram ।
7.76.9 ॥ ॥

yadi devāḥ prasannā me dvijaputraḥ sa jīvatu ।
diśantu varametaṁ me ipsitaṁ paramaṁ mama ।
7.76.10 ॥ ॥

mamāpacārādyāto 'sau brāhmaṇasyaikaputrakaḥ ।
aprāptakālaḥ kālena nīto vaivasvatakṣayam ।
7.76.11 ॥ ॥

taṁ jīvayatha bhadraṁ vo nānṛtaṁ kartumarhatha ।
dvijasya saṁśruto 'rtho me jīvayiṣyāmi te sutam ।
7.76.12 ॥ ॥

rāghavasya tu tadvākyaṁ śrutvā vibudhasattamāḥ ।
pratyucū rāghavaṁ prītā devāḥ prītisamanvitam ।
7.76.13 ॥ ॥

nirvṛto bhava kākutstha so 'sminnahani bālakaḥ ।
jīvitaṁ prāptavānbhūyaḥ sametaścāpi bandhubhiḥ ।
7.76.14 ॥ ॥

yasminmuhūrte kākutstha śūdro 'yaṁ vinipātitaḥ ।
tasminmuhūrte bālo 'sau jīvena samayujyata ।
7.76.15 ॥ ॥

svasti prāpnuhi bhadraṁ te sādhu yāma nararṣabha ।
agastyasyāśramapadaṁ draṣṭumicchāma rāghava ।
7.76.16 ॥ ॥

tasya dīkṣā samāptā hi brahmarṣeḥ sumahādyuteḥ ।
dvādaśaṁ hi gataṁ varṣaṁ jalaśayyāṁ samāsataḥ ।
7.76.17 ॥ ॥

kākutstha tadgamiṣyāmo muniṁ samabhinanditum ।
tvaṁ cāpyāgaccha bhadraṁ te draṣṭuṁ tamṛṣisattamam ।
7.76.18 ॥ ॥

sa tatheti pratijñāya devānāṁ raghunandanaḥ ।
āruroha vimānaṁ taṁ puṣpakaṁ hemabhūṣitam ।
7.76.19 ॥ ॥

tato devāḥ prayātāste vimānairbahuvistaraiḥ ।
rāmo 'pyanujagāmāśu kumbhayonestapovanam ।
7.76.20 ॥ ॥

dṛṣṭvā tu devānsamprāptānagastyastapasāṁ nidhiḥ ।
arcayāmāsa dharmātmā sarvāṁstānaviśeṣataḥ ।
7.76.21 ॥ ॥

pratigṛhya tataḥ pūjāṁ sampūjya ca mahāmunim ।
jagmuste tridaśā hṛṣṭā nākapṛṣṭhaṁ sahānugaiḥ ।
7.76.22 ॥ ॥

gateṣu teṣu kākutsthaḥ puṣpakādavaruhya ca ।
tato 'bhivādayāmāsa hyagastyamṛṣisattamam ।
7.76.23 ॥ ॥

so 'bhivādya mahātmānaṁ jvalantamiva tejasā ।
ātithyaṁ paramaṁ prāpya niṣasāda narādhipaḥ ।
7.76.24 ॥ ॥

tamuvāca mahātejāḥ kumbhayonirmahātapāḥ ।
svāgataṁ te naraśreṣṭha diṣṭyā prāpto 'si rāghava ।
7.76.25 ॥ ॥

tvaṁ me bahumato rāma guṇairbahubhiruttamaiḥ ।
atithiḥ pūjanīyaśca mama nityaṁ hṛdi sthitaḥ ।
7.76.26 ॥ ॥

surā hi kathayanti tvāmāgataṁ śūdraghātinam ।
brāhmaṇasya tu dharmeṇa tvayā jīvāpitaḥ sutaḥ ।
7.76.27 ॥ ॥

uṣyatāṁ ceha rajanī sakāśe mama rāghava ।
prabhāte puṣpakeṇa tvaṁ gantā 'si purameva hi ।
7.76.28 ॥ ॥

tvaṁ hi nārāyaṇaḥ śrīmāṁstvayi sarvaṁ pratiṣṭhitam ।
tvaṁ prabhuḥ sarvadevānāṁ puruṣastvaṁ sanātanaḥ ।
7.76.29 ॥ ॥

idaṁ cābharaṇaṁ saumya nirmitaṁ viśvakarmaṇā ।
divyaṁ divyena vapuṣā dīpyamānaṁ svatejasā ।
pratigṛhṇīṣva kākutstha matpriyaṁ kuru rāghava ।
7.76.30 ॥ ॥

dattasya hi punardāne sumahatphalamucyate ।
bharaṇe hi bhavān śaktaḥ sendrāṇāṁ marutāmapi ।
7.76.31 ॥ ॥

tvaṁ hi śaktastārayituṁ sendrānapi divaukasaḥ ।
tasmātpradāsye vidhivattatpratīccha narādhipa ।
7.76.32 ॥ ॥

divyamābharaṇaṁ citraṁ pradīptamiva bhāskaram ।
7.76.33 ॥ ॥

athovāca mahātmānamikṣvākūṇāṁ mahārathaḥ ।
rāmo matimatāṁ śreṣṭhaḥ kṣatradharmamanusmaran ।
7.76.34 ॥ ॥

pratigraho 'yaṁ bhagavanbrāhmaṇasyāvigarhitaḥ ।
gṛhṇīyāṁ kṣatriyo 'haṁ vai kathaṁ brāhmaṇapuṅgava ।
7.76.35 ॥ ॥

brāhmaṇena viśeṣeṇa dattaṁ tadvaktumarhasi ।
evamuktastu rāmeṇa pratyuvāca mahānṛṣiḥ ।
7.76.36 ॥ ॥

āsankṛtayuge rāma brahmabhūte purāyuge ।
apārthivāḥ prajāḥ sarvāḥ surāṇāṁ tu śatakratuḥ ।
7.76.37 ॥ ॥

tāḥ prajā devadeveśaṁ rājārthaṁ samupādravan ।
surāṇāṁ sthāpito rājā tvayā deva śatakratuḥ ।
7.76.38 ॥ ॥

prayaccha no hi lokeśa pārthivaṁ narapuṅgavam ।
yasmai pūjāṁ prayuñjānā dhūtapāpāścaremahi ।
na vasāmo vinā rājñā eṣa no niścayaḥ paraḥ ।
7.76.39 ॥ ॥

prajānāṁ vacanaṁ śrutvā niścayitvā 'rthamuttamam ।
7.76.40 ॥ ॥

tato brahmā suraśreṣṭho lokapālānsavāsavān ।
samāhūyābravītsarvāṁstejobhāgānprayacchata ।
7.76.41 ॥ ॥

tato dadurlokapālāḥ sarve bhāgānsvatejasaḥ ।
akṣupacca tato brahmā yato jātaḥ kṣupo nṛpaḥ ।
7.76.42 ॥ ॥

taṁ brahmā lokapālānāṁ sahāṁśaiḥ samayojayat ।
tato dadau nṛpaṁ tāsāṁ prajānāmīśvaraṁ kṣupam ।
7.76.43 ॥ ॥

tatraindreṇa ca bhāgena mahīmājñāpayannṛpaḥ ।
vāruṇena tu bhāgena vapuḥ puṣyati pārthivaḥ ।
7.76.44 ॥ ॥

kaubereṇa tu bhāgena vittamāsāṁ dadau tadā ।
yastu yāmyo 'bhavadbhāgastena śāsti sma sa prajāḥ ।
7.76.45 ॥ ॥

tatraindreṇa naraśreṣṭha bhāgena raghunandana ।
pratigṛhṇīṣva bhadraṁ te tāraṇārthaṁ mama prabho ।
7.76.46 ॥ ॥

tasya tadvacanaṁ śrutvā ṛṣeḥ paramadhārmikam ।
tadrāmaḥ pratijagrāha munerābharaṇaṁ varam ।
7.76.47 ॥ ॥

pratigṛhya tato rāmastadābharaṇamuttamam ।
āgamaṁ tasya dīptasya praṣṭumevopacakrame ।
7.76.48 ॥ ॥

atyadbhutamidaṁ divyaṁ vapuṣā yuktamuttamam ।
kathaṁ vā bhagavatā prāptaṁ kuto vā kena vā hṛtam ।
7.76.49 ॥ ॥

kutūhalitayā brahmanpṛcchāmi tvāṁ mahāyaśaḥ ।
āścaryāṇāṁ bahūnāṁ hi nidhiḥ paramako bhavān ।
7.76.50 ॥ ॥

evaṁ bruvati kākutsthe munirvākyamathābravīt ।
śṛṇu rāma yathāvṛttaṁ purā tretāyuge yuge ।
7.76.51 ॥ ॥

ramaṇīyapradeśe 'smin vane yaddṛṣṭavānaham ।
āścaryaṁ me mahābāho dānamāśritya kevalam ।
7.76.52 ॥