उत्तरकाण्डम्Uttara Kāṇḍa

taṁ śayānaṁ naravyāghraṁ nidrā nābhyāgamattadā ।
cintayantamanekārthaṁ rāmagītamanuttamam ।
7.72.1 ॥ ॥

tasya śabdaṁ sumadhuraṁ tantrīlayasamanvitam ।
śrutvā rātrirjagāmāśu śatrughnasya mahātmanaḥ ।
7.72.2 ॥ ॥

tasyāṁ niśāyāṁ vyuṣṭāyāṁ kṛtvā paurvāhṇikaṁ kramam ।
uvāca prāñjalirvākyaṁ śatrughno munipuṅgavam ।
7.72.3 ॥ ॥

bhagavandraṣṭumicchāmi rāghavaṁ raghunandanam ।
tvayā 'nujñātumicchāmi sahaibhiḥ saṁśitavrataiḥ ।
7.72.4 ॥ ॥

ityevaṁvādinaṁ taṁ tu śatrughnaṁ śatrutāpanam ।
vālmīkiḥ sampariṣvajya visasarja ca rāghavam ।
7.72.5 ॥ ॥

so 'bhivādya muniśreṣṭhaṁ rathamāruhya suprabham ।
ayodhyāmagamattūrṇaṁ rāghavotsukadarśanaḥ ।
7.72.6 ॥ ॥

sa praviṣṭaḥ purīṁ ramyāṁ śrīmānikṣvākunandanaḥ ।
praviveśa mahābāhuryatra rāmo mahādyutiḥ ।
7.72.7 ॥ ॥

sa rāmaṁ mantrimadhyasthaṁ pūrṇacandranibhānanam ।
paśyannamaramadhyasthaṁ sahasranayanaṁ yathā ।
7.72.8 ॥ ॥

so 'bhivādya mahātmānaṁ jvalantamiva tejasā ।
uvāca prāñjalirvākyaṁ rāmaṁ satyaparākramam ।
7.72.9 ॥ ॥

yadājñaptaṁ mahārāja sarvaṁ tatkṛtavānaham ।
hataḥ sa lavaṇaḥ pāpaḥ purī cāsya niveśitā ।
7.72.10 ॥ ॥

dvādaśaite gatā varṣāstvāṁ vinā raghunandana ।
notsaheyamahaṁ vastuṁ tvayā virahito nṛpa ।
7.72.11 ॥ ॥

sa me prasādaṁ kākutstha kuruṣvāmitavikrama ।
mātṛhīno yathā vatso na ciraṁ pravasāmyaham ।
7.72.12 ॥ ॥

evaṁ bruvāṇaṁ śatrughnaṁ pariṣvajyedamabravīt ।
mā viṣādaṁ kṛthāḥ śūra naitatkṣatriyaceṣṭitam ।
7.72.13 ॥ ॥

nāvasīdanti rājāno vipravāseṣu rāghava ।
prajā naḥ paripālyā hi kṣatradharmeṇa rāghava ।
7.72.14 ॥ ॥

kāle kāle tu māṁ vīra ayodhyāmavalokitum ।
āgaccha tvaṁ naraśreṣṭha gantāsi ca puraṁ tava ।
7.72.15 ॥ ॥

mamāpi tvaṁ sudayitaḥ prāṇairapi na saṁśayaḥ ।
avaśyaṁ karaṇīyaṁ ca rājyasya paripālanam ।
7.72.16 ॥ ॥

tasmāttvaṁ vasa kākutstha saptarātramihāvasa ।
ūrdhvaṁ gantāsi madhurāṁ sabhṛtyabalavāhanaḥ ।
7.72.17 ॥ ॥

rāmasyaitadvacaḥ śrutvā dharmayuktaṁ manogatam ।
śatrughno dīnayā vācā bāḍhamityeva cābravīt ।
7.72.18 ॥ ॥

saptarātraṁ ca kākutstho rāghavasya yathājñayā ।
uṣya tatra maheṣvāso gamanāyopacakrame ।
7.72.19 ॥ ॥

āmantrya tu mahātmānaṁ rāmaṁ satyaparākramam ।
bharataṁ lakṣmaṇaṁ caiva mahārathamupāruhat ।
7.72.20 ॥ ॥

dūramābhyāmanugato lakṣmaṇena mahātmanā ।
bharatena ca śatrughno jagāmāśu puraṁ tataḥ ।
7.72.21 ॥