उत्तरकाण्डम्Uttara Kāṇḍa

tato dvādaśame varṣe śatraghno rāmapālitām ।
ayodhyāṁ cakame gantumalpabhṛtyabalānugaḥ ।
7.71.1 ॥ ॥

tato mantripurogāṁśca balamukhyānnivartya ca ।
jagāma hayamukhyaiśca rathānāṁ ca śatena saḥ ।
7.71.2 ॥ ॥

sa gatvā gaṇitānvāsānsaptāṣṭau raghunandanaḥ ।
vālmīkyāśramamāgatya vāsaṁ cakre mahāyaśāḥ ।
7.71.3 ॥ ॥

so 'bhivādya tataḥ pādau vālmīkeḥ puruṣarṣabhaḥ ।
pādyamardhyaṁ tathātithyaṁ jagrāha munihastataḥ ।
7.71.4 ॥ ॥

bahurūpāḥ sumadhurāḥ kathāstatra sahasraśaḥ ।
kathayāmāsa sa muniḥ śatrughnāya mahātmane ।
7.71.5 ॥ ॥

uvāca ca munirvākyaṁ lavaṇasya vadhāśritam ।
suduṣkaraṁ kṛtaṁ karma lavaṇaṁ nighnatā tvayā ।
7.71.6 ॥ ॥

bahavaḥ pārthivāḥ saumya hatāḥ sabalavāhanāḥ ।
lavaṇena mahābāho yudhyamānā mahābalāḥ ।
7.71.7 ॥ ॥

sa tvayā nihataḥ pāpo līlayā puruṣarṣabha ।
jagataśca bhayaṁ tatra praśāntaṁ tava tejasā ।
7.71.8 ॥ ॥

rāvaṇasya vadho ghoro yatnena mahatā kṛtaḥ ।
idaṁ tu sumahatkarma tvayā kṛtamayatnataḥ ।
7.71.9 ॥ ॥

prītiścāsminparā jātā devānāṁ lavaṇe hate ।
bhūtānāṁ caiva sarveṣāṁ jagataśca priyaṁ kṛtam ।
7.71.10 ॥ ॥

tacca yuddhaṁ mayā dṛṣṭaṁ yathāvatpuruṣarṣabha ।
sabhāyāṁ vāsavasyātha upaviṣṭena rāghava ।
7.71.11 ॥ ॥

mamāpi paramā prītirhṛdi śatrughna vartate ।
upāghrāsyāmi te mūrdhni snehasyaiṣā parā gatiḥ ।
7.71.12 ॥ ॥

ityuktvā mūrdhni śatrughnamupāghrāya mahāmuniḥ ।
ātithyamakarottasya ye ca tasya padānugāḥ ।
7.71.13 ॥ ॥

sa bhuktavānnaraśreṣṭho gītamādhuryamuttamam ।
śuśrāva rāmacaritaṁ tasminkāle yathākṛmam ।
7.71.14 ॥ ॥

tantrīlayasamāyuktaṁ tristhānakaraṇānvitam ।
saṁskṛtaṁ lakṣaṇopetaṁ samatālasamanvitam ।
śuśrāva rāmacaritaṁ tasminkāle purā kṛtam ।
7.71.15 ॥ ॥

tānyakṣarāṇi satyāni yathāvṛttāni pūrvaśaḥ ।
śrutvā puruṣaśārdūlo visañjño bāṣpalocanaḥ ।
7.71.16 ॥ ॥

sa muhūrtamivāsañjño viniḥśvasya muhurmuhuḥ ।
tasmin gīte yathāvṛttaṁ vartamānamivāśṛṇot ।
7.71.17 ॥ ॥

padānugāśca ye rājñastāṁ śrutvā gītisampadam ।
avāṅmukhāśca dīnāśca hyāścaryamiti cābruvan ।
7.71.18 ॥ ॥

parasparaṁ ca ye tatra sainikāḥ sambabhāṣire ।
kimidaṁ kva ca vartāmaḥ kimetatsvapnadarśanam ।
7.71.19 ॥ ॥

artho yo naḥ purā dṛṣṭastamāśramapade punaḥ ।
śṛṇumaḥ kimidaṁ svapno gītabandhaṁ śriyo bhavet ।
7.71.20 ॥ ॥

vismayaṁ te paraṁ gatvā śatrughnamidamabruvan ।
sādhu pṛccha naraśreṣṭha vālmīkiṁ munipuṅgavam ।
7.71.21 ॥ ॥

śatrughnastvabravītsarvānkautūhalasamanvitān ।
sainikā na kṣamo 'smākaṁ paripraṣṭumihedṛśaḥ ।
7.71.22 ॥ ॥

āścaryāṇi bahūnīha bhavantyasyāśrame muneḥ ।
na tu kautūhalādyuktamanveṣṭuṁ taṁ mahāmunim ।
7.71.23 ॥ ॥

evaṁ tadvākyamuktvā ca sainikānraghunandanaḥ ।
abhivādya maharṣiṁ taṁ svaṁ niveśaṁ yayau tadā ।
7.71.24 ॥