उत्तरकाण्डम्Uttara Kāṇḍa

evaṁ bruvadbhirṛṣibhiḥ kākutstho vākyamabravīt ।
kiṁ kāryaṁ brūta munayo bhayaṁ tāvadapaitu vaḥ ।
7.61.1 ॥ ॥

tathā bruvati kākutsthe bhārgavo vākyamabravīt ।
bhayānāṁ śṛṇu yanmūlaṁ deśasya ca nareśvara ।
7.61.2 ॥ ॥

pūrvaṁ kṛtayuge rājandaiteyaḥ sumahābalaḥ ।
lolāputro 'bhavajjyeṣṭho madhurnāma mahāsuraḥ ।
7.61.3 ॥ ॥

brahmaṇyaśca śaraṇyaśca buddhyā ca pariniṣṭhitaḥ ।
suraiśca paramodāraiḥ prītistasyātulā 'bhavat ।
7.61.4 ॥ ॥

sa madhurvīryasampanno dharme ca susamāhitaḥ ।
bahuvarṣasahasrāṇi rudraprītyā 'karottapaḥ ।
7.61.5 ॥ ॥

rudraḥ prīto 'bhavattasmai varaṁ dātuṁ yayau ca saḥ ।
bahumānācca rudreṇa dattastasyādbhuto varaḥ ।
7.61.6 ॥ ॥

śūlaṁ śūlādviniṣkṛṣya mahāvīryaṁ mahāprabham ।
dadau mahātmā suprīto vākyaṁ caitaduvāca ha ।
7.61.7 ॥ ॥

tvayāyamatulo dharmo matprasādakaraḥ kṛtaḥ ।
prītyā paramayā yukto dadāmyāyudhamuttamam ।
7.61.8 ॥ ॥

yāvatsuraiśca vipraiśca na virudhyermahāsura ।
tāvacchūlaṁ tavedaṁ syādanyathā nāśamepyati ।
7.61.9 ॥ ॥

yaśca tvāmabhiyuñjīta yuddhāya vigatajvaraḥ ।
taṁ śūlo bhasmasātkṛtvā punareṣyati te karam ।
7.61.10 ॥ ॥

evaṁ rudrādvaraṁ labdhvā bhūya eva mahāsuraḥ ।
praṇipatya mahādevaṁ vākyametaduvāca ha ।
7.61.11 ॥ ॥

bhagavanmama vaṁśasya śūlametadanuttamam ।
bhavettu satataṁ deva surāṇāmīśvaro hyasi ।
7.61.12 ॥ ॥

taṁ bruvāṇaṁ madhuṁ devaḥ sarvabhūtapatiḥ śivaḥ ।
pratyuvāca mahātejā naitadevaṁ bhaviṣyati ।
7.61.13 ॥ ॥

mā bhūtte viphalā vāṇī matprasādakṛtā śubhā ।
bhavataḥ putramekaṁ tu śūlametadbhajiṣyate ।
7.61.14 ॥ ॥

yāvatkarasthaḥ śūlo 'yaṁ bhaviṣyati sutasya te ।
avadhyaḥ sarvabhūtānāṁ śūlahasto bhaviṣyati ।
7.61.15 ॥ ॥

evaṁ madhurvaraṁ labdhvā devātsumahadadbhutam ।
bhavanaṁ so 'suraśreṣṭhaḥ kārayāmāsa suprabham ।
7.61.16 ॥ ॥

tasya patnī mahābhāgā priyā kumbhīnasīti yā ।
viśvāvasorapatyaṁ sā hyanalāyāṁ mahāprabhā ।
7.61.17 ॥ ॥

tasyāḥ putro mahāvīryo lavaṇo nāma dāruṇaḥ ।
bālyātprabhṛti duṣṭātmā pāpānyeva samācarat ।
7.61.18 ॥ ॥

taṁ putraṁ durvinītaṁ tu dṛṣṭvā krodhasamanvitaḥ ।
madhuḥ sa śokamāpede na cainaṁ kiñcidabravīt ।
7.61.19 ॥ ॥

sa vihāya tvimaṁ lokaṁ praviṣṭo varuṇālayam ।
śūlaṁ niveśya lavaṇe varaṁ tasmai nyavedayat ।
7.61.20 ॥ ॥

sa prabhāveṇa śūlasya daurātmyenātmanastathā ।
santāpayati lokāṁstrīnviśeṣeṇa ca tāpasān ।
7.61.21 ॥ ॥

evaṁprabhāvo lavaṇaḥ śūlaṁ caiva tathāvidham ।
śrutvā pramāṇaṁ kākutstha tvaṁ hi naḥ paramā gatiḥ ।
7.61.22 ॥ ॥

bahavaḥ pārthivā rāma bhayārtairṛṣibhiḥ purā ।
abhayaṁ yācitā vīra trātāraṁ na ca vidmahe ।
7.61.23 ॥ ॥

te vayaṁ rāvaṇaṁ śrutvā hataṁ sabalavāhanam ।
trātāraṁ vidmahe tāta nānyaṁ bhuvi narādhipam ।
tatparitrātumicchāmo lavaṇādbhayapīḍitān ।
7.61.24 ॥ ॥

iti rāma niveditaṁ tu te bhayajaṁ kāraṇamutthitaṁ ca yat ।
vinivārayituṁ bhavānkṣamaḥ kuru taṁ kāmamahīnavikrama ।
7.61.25 ॥